NEHEMIA 3 - ASII LAKDAP Bible (BSI)

Jerusalem Chela Tro Ruk Tiihea Hainongto

¹ Riita, ara chongtiikai chela tro wa ruk thun kra, akha tiihea hai wankai. Ramwe ajong pinthumwe Eliashib nai apaiq kongtitiim riika, Sku Kilam ba kra tiiheato. Raüta kriiba ka Shiikeawe ma kiinong kuqto. Raüta kilü thun ka aheawiq she tiihongto. Tsangshiq raq khetuk long ruk Sku Kilam Chong maq phaho raüta, Shishi Longkham Tiipse nai Hananel Longkham Tiipse ba na saüli tiihea haito. Ruk kra tiihea hai lot jai she, tsangshiq raq kriiba long ruk ka achu jaü raüta Shiikeawe ma kiinong kuqto.

² Jeriko chela na siti nokmaiqse riika, armaq phaho raüta ruk ka panshi tsangshiq rii arai kuq kra tiiheato. Imri se Jakkur sengi riika, Jeriko chelati raq haitaq ba maq rai phaho raüta, tsangshiq rii araikuq ruk khechong kra tiihea haito.

³ Hassenaa weraü sengi riika, Ngiq Kilamchong ba tiihea haito. Tsangshiq raq kilam da chong pumpat kiimaq kilam chong tipi pum thun kra, kiimaq kilam chong thun kra wiita samheawiq tiihong raüta haito. Raütiishe kra tiipha tüchang jinpan khili maq tüto. Kiimaq kilüla chang pepan tiihongto.

⁴ Uria se Meremoth, apaiq ka Hakkos ma asaü, riika Hassenaa sengi raq haitaq jaqtho maq tiichap pha raüta, long khetuk kra tiihea haito. Kiimaq Berekhia se Meshullam, apaiq ka Moshejabel ma asaü, kra riika Meremoth raq tiihea haitaq jaqtho maq tiichap pha wan raüta, long khetuk ka tiihea haito. Baana se Jadok riika, Meshullam raq haitaq jaqtho maq pha wan raüta, long khetuk ka tiihea haito.

⁵ Kiimahali, Tekoa chela na siti nokmaiqse riika, Jadok raq haitaq kra jaqtho maq tiichap wan raüta, long khetuk kra tiihea haito. Shatmaq tiina, kra chela na siti tsangshiq welabi riika, tsangshiq rii jaqsham apheakuq kra, tsangshiq jaq miika shamki mai nguta jaqsham liiketi ashun asheatibi bom ka taimak akhü riito.

⁶ Pasea se Joiada nai Besodeia se Meshullam riika, long khetuk ka Jeshana Kilamchong ba maq tiichap phaho raüta tiihea haito. Tsangshiq raq Kilamchong wa pumpat nai kilüda tipi kra wiita tiihongto. Raüta jinpan khili nai jinpan maq kilü lachang kra tiihongto.

⁷ Kiimaq kra jaqtho miika, Gibeon chela wa Melatia, kiimaq Meronoth chela wa, Jadon tsangnai wenai raq, kiimaq Gibeon chelati nokmaiqse raq, nai Mijpa chelati nokmaiqse riika, Joiada nai Moshullam sengi raq tiihea haitaq jaqtho maq tiichap wan raüta, long khetuk ka tiihea haito. Tsangshiq riika Euphretis Jürai maq Shenyap nü mung Wanghuptiwe sichang jam kra tho na saüli tiiheato.

⁸ Kiimaq kra jaq tho miika, chaq aseng lotti phong wa Harnia se Ujjiel raq tiihea haito. Kiimaq kra jaqtho miika, phanrap homseng kloliitiwe Hannania raq tiihea haito. Raüta ruk mang Apiiwiq Ba ngutlaq kiijaq tiisaüli tiihea haito.

⁹ Kra jaq tho miika, Hur se Rephaia, apaiq ka Jerusalem hong wa khoko na siti mungmaiqse kra pengti raq tiihea haito.

¹⁰ Kra jaqtho miika, Harumaph se Jedaia raq tiihea haito. Kriika apaiq jam tho na riito. Kra jaqtho miika, Hashabneia se Hattush raq tiihea haito.

¹¹ Kiimaq, Harim se Malchija nai Pahath Mob se Hassub riika, ara jaqthiq tho maq tiihea haito. Kiimaq, Winsii Lumchang Watum Khamchong ba na saüli haito.

¹² Kra jaqtho miika, Jerusalem chela hong wa khoko pengti Hallohesh se Shollum raq tiihea haito. Asetiim jechaksere riimin jaqsham ka khrum kuq damto.

¹³ Hanun nai Janoa chela na siti nokmaiqse riika, Jüwii Kilamchong ba kra tiihea haito. Tsangshiq raq kilü thun tiihea raüta tiihongto. Raüta kilü thun kra lachang jinpan maq keabaiqto. Raüta kilü lachang jinpan kra tiihongto. Raüta tsangshiq raq ruk khetuk ka alu nü na 440 mitar haito. Tsangshiq raq hai wantaq kriika Sinchiitsap Phong Kilamchong na tiisaüli haito.

¹⁴ Beth Hacherem wang pengti, Rechab se Malchija riika, Sinchiitsap Phong Kilamchong ba tiihea haito. Apaiq raq kilü thun ka haito, raüta, kilamchong na jinpan maq keabaiqto. Raüta kilü lachang jinpan thun kra tiihongto.

¹⁵ Kiimahali, Mijpa wang pengti Kolhoje se Shollum riika, Khamdü Kilamchong ba kra tiihea haito. Apaiq raq Kilamchong lam kra tiiham wandamto. Raüta kilü ka tiihea haito. Raüta kilü ka kilüchü tiihong chang ba kiijaq riikhaqli tiihong hainongto. Raüta kilü tiipha chang jinpan maq keabaiqto. Kiimaq kilü lachang jinpan thun tiihongto. Apaiq riika Shela Thamchum ba maq phaho raüta, hokham petsiro sonruk na saüli tiiham raüta, Dawit Chela ngutlaq hiq ba maq maiqkhum chang long hiqkhuphi lam kiijaq saüli tiihea haito.

¹⁶ Kiimaq, Bethjur hong wa khoko mungmaiqse pengti Ajbuk riika, kra jaqtho maq pha raüta, Dawit maalap chang makho ba kiimaq riita, thamchum ba kiimaq raüta, phenlanok sichang piitiip kiina saüli tiihea haito.

Ruk Tiihea Haiti Lewinok

¹⁷ Arjaq chongtiikai Lewi weraü thun raq, nanok jaqtho kiimaq pha wan raüta ruk ka banai batsam wa athiq kra tiihea haito. Kra hai wantaq ba thun ka arba thun ara riito. Bani se Rehum riika Ajbuk raq haitaq jaqtho kiimaq tiichap pha wan raüta haito. Keila hong na siti mungmaiqse khoko peng wantiwe Hashabiah riika, asengi la na, Rehum jaqthiq ba maq tiichap pha wan raüta tiihea haito.

¹⁸ Kra jaqtho miika, Keila hong na siti mungmaiqse khoko peng wantiwe Hanadad se Bawai raq tiihea haito.

¹⁹ Kra jaqtho miika, Mijpa binjü wiiq peng wantiwe Joshua se Ejar raq haito. Apaiq riika, chuntsi nyiimwin khok rinkea ba maq pha wan raüta, lamha dü wan tlaq kiijaq saüli tiihea haito.

²⁰ Kra jaqtho miika, Jabbai se Barukh raq haito. Apaiq riika, Ramwe Ajong Pinthumwe Eliashib jam na wachang lam kilam chong ba kiina saüli tiihea haito.

²¹ Kra jaqtho miika, Hakkoj ma asaü lam Uria se Meremoth raq haito. Apaiq riika, Eliashib jam rinkea sup wan tlaq kiijaq saüli tiihea haito.

Ruk Haiwanti Ramwebi

²² Kra jaqtho miika, arjaq chongtiikai ramwebi thun raq ruk ka batsam bablai maq tiihea haito: Jerusalem tro na siti ramwebi thun riika Eliashib jam rinkea ba tiithi maq pha wan raüta tiihea haito.

²³ Kra jaqtho miika, Benjamin nai Hasshub raq tsangshiq jam rinkea tiithi ba thun kra tiihea haito. Kra jaqtho miika, Anania ma asaü lam kiimaq Maaseia ma ase Ajaria raq tiihea haito. Kriiba ka apaiq jam rinkea tiithi ba riito.

²⁴ Kra jaqtho miika, Henadad se Binnui raq tiihea haito. Apaiq riika Ajaria jamkea maq phaho raüta rukshok kiina saüli tiihea haito.

^25-26 Kra jaqtho miika, Ujai se Palal raq tiihea haito. Apaiq riika, khetuk tapshok nong ba kiimaq phawan raüta, lamthaq nüti hokham jam kongmong chong tho na kintsong chang ba keathung kiijaq saüli haito. Kra jaqtho miika, Parosh se Pedaia raq haito. Apaiq riika, tapshoknong ba kiimaq pha wan raüta, Shedong nü siim na Khamrai Kilamchong kra ham wan tlii raüta, Shomjam kheti kintsongti chapchang kongmong chong kra hamli na haito. (Arka chela mong wa maiqhiq bashi, Ophel ngutlaq ba kra nangnga chongtlo. Kiijiika Shomjam na jaqshamti jaqshisetiim sitlo.)

Ruk Tiiheati Ahinti Thun

²⁷ Kra jaqtho miika, Tekoa hiqshongti raq tiihea haito. Kiimaq tsangshiqnok kongnai ngojati riika, Shomjam kheti kinsongti tsongchang, ajongwiq diilu khamtiip tiithi maq kha riire ba maq pha raüta, Ophel hiq ba tiithi kiina saüli tiihea haito.

²⁸ Kra jaqtho miika, ramwebi raq tiihea haito. Tsangshiq riika kiimaq tiichap haipha raüta, Kumrang Kilamchong kiimaq hiqkhu nü ba ruk kiiwa tsangshiq maiqmii jamkea tiithi baba tiihea haito.

²⁹ Kra jaqtho miika, Immar se Jadok raq tiihea haito. Apaiq riika, apaiq maiqmii jamkea tiithi kriimaq haito. Kra jaqtho miika, Shedong Nü Kilamchong kheti, Shekania se Shemaia raq tiihea haito.

³⁰ Kra jaqtho miika, Shelemia se Hanania kiimaq Jalaph setiim phongwa wetrok ngojawe, ase Hanun raq tiihea haito. Arka tsangshiq raq banai ngoja she tiihea haito. Kra jaqtho miika, Berekhia se Moshullam raq tiihea haito. Apaiq riika, apaiq jamkea tiithi ba tiihea haito.

³¹ Kra jaqtho miika, chaq aseng loti Malchija raq tiihea haito. Apaiq riika, Shomjam jaqshamti jaqshisetiim sichang nai laopanbi sichang tiithi kiijaq saüli haito. Arba arka Miphkad Kilamchong ba riito. Arka hiqkhu nü nai shedong nü ruksiim tapshok ba ruk khuthaq na ahai jamkhok ashi sitlaq kriiba na saüli haito.

³² Kra jaqtho miika, chaq aseng lotibi nai laopanbi raq tiihea haito. Tsangshiq riika, ruksiim tapshok ba na khok sitlaq kiimaq pha raüta, Sku Kilamchong ba kiina saüli haito. Arka ruk tiihea hai jaqsham wiqkhikha tiithum shat wan chang ba riito.