NEHEMIA 1 - ASII LAKDAP Bible (BSI)

¹ Arka Hakalia se Nehemia raq mung peng wantaq kra jaqsham manphan. Kra akhing na ngi Nehemia ka Parsia mung nyungchong Susa chela na riikang. Kra bala ka Kisleb lü bala riito. Kra akhing na Parsia mung langwantiwe ajong hokhamwe Artajarses riito. Apaiq raq mung lang wanli maq rawii wiiroqnai she riito.

Jerusalem Miitu Nehemia Tsantsi

² Iphu inotiim phong wa naijamti Hanani ka akongti maiq ahinti shea raüta, Judia wang maq awa ngi phana saü wato. Krai mren, ngi raq tsangshiq ma, Jerusalem na siti mungmaiqse ka jamkho singa tlaq, kiimaq naishiqnok Jehudinok Bebilon mung na munglu asiwa wa, Jerusalem na jangwantiiti kra, jamkho singa tlaq nguta, tsütsa ka waiso kang.

³ Kiijiishe, tsangshiq raq, “Nashiq mungti, munglu shumwi ma tsuq wan mak deati, lun wantiiti thun ka, kai chamchao mong niili sitlo. Kiimaq pongmung maiqse raq pinthum jomniim shaqshaq shummiitlo. Jerusalem chela long peruk kriimin wiita bunkito. Kiimaq peruk kilam kilü thun kriimin wa maq chaq raüta, wiita tiithen baiqto,” nguta tsangshiq chongto.

⁴ Ngi ka ara tsütsa tai lata ngaki kang. Latiishe hoqsiq kang. Ngi ka ranaiq naitsam dung min siq mang maq, makphai trok lata hoq wan kang. Lata Shiikeawe jaq wa akha achu jaü wan kang.

⁵ “O, ramungtan na siti, Tati Shiikeawe lei! Ümniika ajong pinthum, kiimaq naishiq ka ümman na kai tiihai laita siwa tiikai. Ümniika tongshong ramkhap sham wanti. Kiimaq tri aming lang wanti ma, tsapkapkap maq mangchan rüm wanti.

⁶ Tatiwe lei, ngi phanü na liilaq. Laüta ngi raq ranaiq rawa ümdisekong, Israilnok miitu achu jaü tiikang ara tailaq. Ngi raq naishiq Israilnok raq ngarai tang wan kai dea nguta mra tiidii tiikang. Kiimaq ngi nai naititiim raq, ngarai ka tang wan kai dea.

⁷ Ngohea dea tengto. Naishiq raq ümman na pinthum ashut pahea dea klo wan kai. Laita ümtsan tiibi wan kai. Ümniiraq naishiq ma ara sham wan rong laq nguta aming akuq haü ka, lang wan mai dea. Kriika tengto. Ümniiraq ümdise Mosheq lümaq naishiq ma thungtri aming akuq haü ka lang wan maidea riikai.

⁸ Riita ümchaü min, ümniiraq man na Mosheq ma jamlai kiqkham bomtsi wa khakuq laü, kra bomtsi ka ümtsan na tiitsang laq. Ümniiraq Mosheq ma akha chongkuq laü: ‘Namshiq Israilnok raq ibom tai man maq, ikiq khii lanta, tongshong tri wokhong na siwan man riihan jiila, ngi raq namshiq ka tiipin miijin mijobaiqha. Lata pongmung maiqse wokhong na mitiichamchao pha.

⁹ Shatmaq tiina, namshiq raq maiqmii ngarai kra tiidii lanta, iwokhong na jang wan nonghan jiila; ngi raq namshiq ma jamlai aming tri wa khakuq kang, kra thun kra lang wan nong lanta shongnga wan nong han jiila; ngi raq namshiq ka iwokhong na hali mishea wan nong kang. Ngi raq namshiq ka ara mangjong hiqdiim ara hamli na; shokrap norii na atiipin jobaiq wan ha kiiwa; ngi shomnoq wan miitu hiqshong bashi tiihong tsea kang kriiba na hali mitriichom hea wan nong kang,’ nguta ngulaü.

¹⁰ “Riita, Tatiwe lei, tsangshiq ka ümsengi, kiimaq ümjaqshise kong. Ümningkun ajong nai aheng maq tsangshiq ka dokda wan laü.

¹¹ Ümchaü ngi achu jaü ara trekuq laq. Kiimaq, ümjaqshisetiim ahinti ümmang shreng wantibi thun achu jaü tlaq kra tre kuq laq. Ngi ma ümchaü ranaiq tiihongkuqlaq ara hokhamwe man na achu jaütiikang ara!” Kiitinchoji, ngi ka hokhamwe jam na, apaiq ma che tsümketi luqkhap riikang.