Mikha 3 - ASII LAKDAP Bible (BSI)

Mika Raq Israilnok Hokhambi Nai Shammibi Shratlo

¹ Israilnok tuwebi lei tairong laq! Namshiq raq tri raütu ka tingting shamchang riimak shea?

² Shatmaq namshiq raq tingting tri ka ashishe riitlan. Lanta ashut tri kra lang tlan, Namshiq raq isengi mungmaiqse ka akhü koq lanta tiichamchao tlan. Kiimaq tsangshiq ka riitsi tsaitsiiq siphaq tlan!

³ Namshiq raq isenginok phaqbaiq holan. Namshiq raq tsangshiq ka, arii na saüli li tsiiq phaq tlan. Arok arii bunlaklak tiiq baiq tlan. Lanta angam ka chum phaq tlan.

⁴ Namshiq ningthoi ranaiq ka saü wanto she. Kra akhing na namshiq ka, mihoq phaq han. Shatmaq Tatiwe raq namshiq achu jaü tremak miraq. Apaiq raq namshiq achu jaü ka taimak she miraq. Jamkhano ngukla namshiq raq ashut thunglai pahea klo lan.

⁵ Isenginok ka shammibi raq laolii hoto. Shammi jaq maq keti miika, khu asang miraq nguta tam kuq tlo. Shatmaq jaqmaq kuqmakti miika, redong na mitsai han nguta shiikeng tlo.

⁶ Tatiwe raq arot shammibi akha shratlo. “Shammibi lei, namshiq rilung ka thum wanto she. Rashe ka achashe, rajishe. Namshiq raq isengi nok ajiq na sheaholan. Kriikha na namshiq shammi jaq sham ka thumto she. Riisham makchhi min ahüshe. Riisham bom min chong lot man she.”

⁷ Riisham bom chongti raq jea she mingaü.” Jamkhano ngukla tsangshiq raq achongkuq riisham bomtsi ka teng mak. Tsangshiq ka jeangaü raütli she mitsai, jamkhano ngukla Shiikeawe raq, tsangshiq achujaü ka tremak.

⁸ Shatmaq ngi kla Tatiwe ningkun raq asho awo kiimaq, apaiq wenyi raq alüm alei sitiikang. Kiimaq Israilnok raq jamlai ngarai wa klotlaq kra, tiichhit tra chongke miitu, achaq awaq ningkun tri kuqtlo.

⁹ Jakob jamti tuwebi nai, Israilnok aki shillangbi lei, tai ronglaq, ngi chongpha, tingting tri shisheti, ajiq ka alam ma tiijatibi, alam nang ka ajiq ngu.

¹⁰ Namshiq raq Shiikeawe chela Jerusalem hai wan chang jamkhü ka, maiqtsat lanta mat raü maq sürii wan tlan, kiimaq ashut tri raütu maq kha lanta sü rii wan tlan.

¹¹ Chela pengti welabi raq tsiiqlap siq raüta peng wantlo. Ramwebi raq Thungtri ka, jaq maq lapphaq miituli shrin kuqtlo, Shammibi raq amaq lap ma riisham bom chong tlo, Raüta tsangshiq tarü raq, “Tatiwe naishiq rai asi. Nashiq tiihaisong chang jammin ahü,” nguta tsütsit tlo.

¹² Namshiq raq arümkhan ashut klo tlan khana, Jajon ka ni ma athubaiq ikha mishthen baiq. Jerusalem ka then wan raüta, hiqmiq changkhü miishe mijaki, kiimaq Noqku Jamjong kin ka, rumnyangkhi miishe mijaki