JOSHUA 9 - ASII LAKDAP Bible (BSI)

Gibeon Chelati Raq Joshua Laoto

¹ Israilnok raq rekhat tang wantaq thun tsütsa ka, Jordan rai maq shenyap mung na siti maiqmung thun kunli niishe nyam wanto. Pum na siti mung thun na, pumjiji na siti mung thun na, kiimaq Mediterenian khamjongkii mung thun kiijaq nyam wanto. Hiqkhu nü wa Lebanon mung kiina saüli nyam wanto. Riita ara hokhambi thun arka, Hitaiq mung, Amoraiq mung, Kanan mung, Perijaiq mung, Hiwaiq mung, kiimaq Jebusaiq mung hokhambi riito.

² Tsangshiq tarü ka adam na pongto. Raüta Joshua nai Israilnok rai riikhat miitu phentiip she phoq wanto.

³ Shatmaq Hiwaiqnok Gibeon chelati riika, Joshua raq Jeriko chela nai Ai chela ka jamkho riita, kra tsütsa ka taito.

⁴ Raüta tsangshiq raq, apaiq ka alao chang nguta tri ka shatto. Krai mren, tsangshiq ka kiho raüta, phaq nai sea ka tiijeto. Raüta tsangshiq kumtoq kong raikhü na achüshe puchü riiqshin thoila na, phaq nai sea kra thopto. Kiimaq che thii chang ngamkhü tsabum thun kiimin, tsabum chü, ngamkhü kra atiidiim chhang araq, thun kiijaq thiito.

⁵ Kiimaq tsangshiq maiqmii dü niika, wunthaü riinaü samtong achü ariim thun kra samraqraq, kiimaq tsangshiq hokpa ngamkhü khorom thun kiimin achü ariim, achhang araq kra pa raüta wato. Kiimaq tsangshiq raq winsii thop ahowan kiimin ashin kaiwi she, atsaü she howanto.

⁶ Raütiishe tsangshiq ka Israilnok sichang piitiip Gilgal chela kiina wato. Raüta tsangshiq raq Joshua nai Israilnok ma, “Naishiq ka naimung luhea maq akihai. Naishiq ümpha na saüwa kai arka, ümpuk na nyap wa, tongshong wa nguta wakai,” nguta chongto.

⁷ Shatmaq Israilnok raq, “Naishiq raq namshiq rai wehea riija tong ka shongmai. Jursap namshiq ka arbinjü na aje na siti wa riila?” nguta chongto.

⁸ Kiijiishe, tsangshiq raq, “Naishiq ka ümdisetiim. Ümwokhong na,” nguta Joshua ma chongto. Kiijiishe Joshua raq, “Namshiq ka junok wa? Ümbawa akihan wa?” nguta waito.

⁹ Kiijiishe, tsangshiq raq akhiishe phankuqto: “Shiilangwe lei, naishiq ka mung luhea maq akihai. Jamkhano ngukla, naishiq raq, Tatiwe üm Shiikeawe tsütsa ka taikai. Apaiq raq Ejip mung na jamlai wa shamtaq kra wiita taikai.

¹⁰ Kiimaq apaiq raq Jordan rai maq shedong mung na siti, Amoraiqnok hokham wenai, Heshbon chela Hokhamwe Sihon, kiimaq Ashtaroth chela na siti, Bashan mung Hokhamwe Og, kra jamkho riitaq kra tsütsa ka taikai.

¹¹ Nai mung rümti welabi thun kiimaq mungmaiqse tarü raq, naishiq ma wanhiq khum miitu lamsea tiije ronglaq. Lanta Joshua rai riihumki kirongkiq nguta thaüto. Naishiq ka ümpuk na nyapki rongkiq kiimaq naishiq rai tongshong laq nguta ümniima tiichongkai tiikito.

¹² Naishiq winsii thop thun ara liimaüta. Ümniirai riihumkai naishiq jam maq wanhiq khum tiido phaho akhing niika, arthun arka, ake ketsatsa riito. Shatmaq liimaüta! Ümchaü ka ara winsii thop thun armin, shinriiqriiq she, atsaü kaikun she.

¹³ Kiimaq ara che thiiho chang ngamkhü tsabum thun armin, naishiq riika tsabum anye na athiiho hai. Shatmaq liimaüta! Arthun armin atiichai kai wishe. Lamluhea kha maq, wanhiq khumtsi raq naishiq khu akhea nai khorom thun armin wiita puchü riiqshin she.”

¹⁴ Kra chongtaq krai mren, Israilnok riimin tsangshiq jaq wa shiipan pin la na phaq asea akuq wan ka wiijam taoto. Shatmaq kra miitu tsangshiq raq Tatiwe rai ka riiwaimak dea.

¹⁵ Joshua raq Gibeon hiqti rai phuno riija tongshongto. Tsangshiq ka khat mak tiisito. Kiimaq Israilnok welabi riimin phuno riija tongshong tri ka samhea mithü rong i nguta phumram kham maq batkuqto.

¹⁶ Tongshong lot jai ranaiqtsam jai miishe, Israilnok raq arnok arka kra binjü na aje na sitinok nguta sapto.

¹⁷ Krai mren, Israilnok ka tsangshiqnok ritkai kihoto. Raüta ranaiqtsam jaimaq tsangshiqnok sichang chela thun kiina saühoto. Kra chela thun ka arthun ara: Gibeon chela, Chephira chela, Beeroth chela, kiimaq Kiriath Jearim chela.

¹⁸ Shatmaq, Israilnok raq tsangshiq ka tsatlot mak she riito. Jamkhano ngukla, tsang welabi raq, Tatiwe Israilnok Shiikeawe mang na tongshong phumram kham atiibok wishe riito. Kriikha na Israilnok mungmaiqse raq, welabi ma bottrangto.

¹⁹ Shatmaq welabi raq, “Nashiq raq Israilnok Tati Shiikeawe mang na tsangshiq ma sinkham kuq kai she. Kriikha na ümchaü nashiq raq tsangshiq ka khatki lot mai she.

²⁰ Nashiq raq tsangshiq ka atra tiisi chang she dongdii. Jamkhano ngukla nashiq raq tongshong tumkham kok towan kai she. Nashiq raq tri ka lang mai riihaila, Shiikeawe raq nashiq ma mo mitiiho.

²¹ Tsangshiq ka bamsilaq. Shatmaq tsangshiq raq nashiq miitu pe daqke chang miraq kiimaq kham thiike chang miraq.” Welabi raq bom ka akha chong kuqto.

²² Kiijiishe Joshua raq Gibeon chelati ka apaiq phana sheaki rongkiq nguta aming kuqto. Raüta apaiq raq tsangshiq ma waito, “Namshiq raq naishiq ka jam nguto laolan? Namshiq ka ajaq aje na siti taü maq, nam mung ka aluwiq na, nguta arot jaram chonglan?

²³ Namshiq raq ara shutlan khana, Shiikeawe raq namshiq ka tiishut baiqto she. Namshiqnok ka pattup di miili she mija han. Lanta pe midaq han kiimaq i Shiikeawe asii jam na lang chang kham mipi han.”

²⁴ Tsangshiq raq treto, “Shiilangwe lei, naishiq raq akha jamto klokai ngukla, naishiq raq tengteng bom ka akha taikai, Tatiwe namshiq Shiikeawe raq ajaqshi se Mosheq ma, apaiq raq armung ara kunli namshiq ma kebaiq wan miitu aming ake kun she. Krai mren, namshiq raq armung ka long wan wan lanta, maiq thun ka ajiipbaiq wan nguli mirhan nguta asaphai. Naishiq raq ara klokai ka, namshiq ma haisitsi ma phiip laita klokai. Naishiq raq naishiq miisaq tiichhii wan miitu klokai.

²⁵ Riita, ümchaü min, naishiq ka ümjaq khon mong niishe. Ümniiraq jamlai wa ahea nguta tiima tlaü kra phan phan klolaq.”

²⁶ Krai mren, Joshua riimin akhiishe kloto: Apaiq raq tsangshiq ka tiiwong kuqto. Kiimaq Israilnok ma tsangshiq ka tiitsat baiq mak dea riito.

²⁷ Shatmaq apaiq raq tsangshiq ka di ma tiija baiqto. Raüta Israilnok miitu nai Tatiwe berong-wacha na lang miitu chin tiithamto. Kiimaq kham tiipito. Ümchaü akhing na saüli, Tatiwe raq apaiq shomnoq chang ba ka ümriibano tiihong wantlaq, kiijaq tsangshiq raq ara jaq ka shamkuqtlo.