JOSHUA 7 - ASII LAKDAP Bible (BSI)

Achan Raq Tatiwe Aming Jinto

¹ Shamtaq Tatiwe raq Israilnok ma, Jeriko chela wa phanrap hupsam ka wiita ashthen baiq chang phanshi ra min jaqkaiq maq shamkai maimak nguta aming akuq ka langmak dea riito. Maiq weshi amang Achan ngutlaq kriiraq, kra aming ka lang mak jinto. Kra ningkhan Tatiwe ka Israilnok ma atsan khiqhea walü wa ikha riito. Achan ka Karmi se. Apaiq ma ati ka Jabdi. Kiimaq tsangta mang ka Jera ta. Kiimaq tsangshiq weraü ka Juda phan wa.

² Joshua raq maiq wiijam ka Jeriko chela maq Ai chela na tiiwato. Ai chela ka Bethel chela maq shedong nü na. Kiimaq Bethawen chela tho na riito. Joshua raq sreabi ma, kra binjü ka samheawiq sisin wa rongkiq nguta tiiwato. Tsangshiq ka waraüta sisin wato.

³ Raüta tsütsa ka Joshua ma akha chonghoto, “Ai chela khatwa ka wiitarü warai ngomin raamak. Sreabi hingnai riimak la hingtsam tin khanli tiiwa laq. Kra khatwa ka phenlabi tlotli ka naq tiiwakiq. Kra chela ka ajongwiq riimak.”

⁴ Krai mren, Israilnok sreabi hingtsam tin wa raüta, Ai chela ka long wato. Shatmaq tsangshiq ka khatlot mak, jai na jangto.

⁵ Ai chelati raq Israilnok ka, chela kilamchong maq joho raüta, long piikii chang binjü kiina saüli johoto. Raüta kra lamhong binjü kiiwiili Ai chelati raq, Israilnok ka maiq roqtsamri wetrok tin tsatbaiqto. Kra ningkhan Israilnok ka tsaiji ajom she riito kiimaq ahai she riito.

⁶ Kriikha niishe, tsanbi hosi tsi nin wan lot mak she raüta, Joshua nai Israilnok maiqlare nyungwere thun kra, tsangdü na asam khu akhea kriimin chaiham chaihea raüta, Tatiwe Tongshong Tek khaki na hiq na bumrang achu jaü hoqsii trang wanto. Raüta kiijaq ranap chu maq riita raji na saüli, tsangkha kam na botkhulai maq nyat raüta tsanbi hosi tsi ma akap atsea hoqsiqto.

⁷ Raüta Joshua raq akhiishe achu jaüto, “Ajong Pinthum Tatiwe le! Riita, ümniiraq naishiq ka ara Jordan rai reko na jaramli wa sheawan laü? Naishiq ka Amoraiqnok jaq na kiinongkebaiq miishea shea wan laü? Naishiq ka ashthen baiq miitu shea? Riita, naishiq ka Jordan rai reko niili jamto simai riikai?

⁸ O, Tatiwe lei, ngi raq jamlai she wa michong? Israilnok ri rekhat tang mak dea jangkitaq?

⁹ Ümchaü sanha, Kanannok raq kiimaq armung na siti mung ahinti tarü raq, ara tsütsa ara mitai. Raüta tsangshiq raq naishiq ka trotam maq kom wan raütiishe mikhat wan! Raüla ümkhushü jonglu ka jamkhiishe wa mitiiwong haü?”

Tatiwe Aming Jinto

¹⁰ Kiijiishe, Tatiwe raq Joshua ma chongto, “Tiido laq! Ümniika hiq na akha jaram bumsea wa?

¹¹ Israilnok raq ngarai tangto! Ngi raq tsangshiq ma tongshong jaqkhaq raü atiipa kuqha kra samhea thü ronglaq nguta aming akuqha kra panbaiqto. Tsangshiq raq atiithen baiqchang hupsam wiijam ka lamhoto. Tsangshiq raq hukhoto. Raüta kra miitu arot riito. Raüta tsangshiq hupsam rai she thühoto.

¹² Arningkhan tiina Israilnok ka rewe khaki na chap wan lot mak she riitaq. Tsangshiq raq rewe ka khatlot mak dea jangkito. Jamkhano ngukla tsangshiq maiqmii kiimin ashthen baiq chang phan manson thiikho na araü baiq wishe jakito! Ngi raq namshiq ma, jaqkaiq maq naqsham rongkiq nguta aming akuqha hupsam thun kra shiithen baiq man wiiwii, ngi ka namshiq rai sidam mang she!

¹³ Tiido laq! mungmaiqse ka tiisiilaq, laüta tsangshiq ka anap ngi phana riihumwa miitu tiije laq. Jamkhano ngukla ngi Israilnok Tatiwe Shiikeawe raq akha chong chang asi: ‘Israilnok lei, ngi raq namshiq ma ashthenbaiq chang hupsam nguta chongkang kra namshiq jaq na wiijam asi! Namshiq raq kra hupsam thun ka lambaiq man wiiwii, namshiq raq namjaqti ka khatlot man mirhan!’

¹⁴ Arningkhan, anap ranap na, tsangshiq aphan aphan maq, khaki na mitiichap wan. Kiiwa ngi raq ümra phan wa tsun tiikang, kra phan ka aweraü raü maq khaki na michap. Kiiwa juweraü wa tsun tiikang, kra weraü ka ata ata miishe michap. Kiiwa juta wa ngi raq tsun tiikang, kra ta ka maiq weshishi miishe michap.

¹⁵ Raüta juwe wa tsun tiikang, kiimaq apaiq jaq na ashthen baiq chang hupsam kra humjiiq, kriiwe ka apaiq rai ajamtitiim kiimaq ahup asam ümchuwa ajaq na sitlaq krai adam na, wa maq chaqbaiqchang. Jamkhano ngukla apaiq raq Israilnok khuthaq na phiiptsi chang jea tiingaüto kiimaq ngi raq akuqha tongshong tri jinto.”

Ashutwe Ka Lambaiqto

¹⁶ Anap ranaiq niishe, ranap chu miili, Joshua raq Israilnok ka aphan aphan maq khaki na tsun raüta tiichapto. Raüta Juda phan kra tsunto.

¹⁷ Apaiq raq Juda phan kra khaki na tiichapto. Raüta aweraü phan maq tiichapto. Raüta Jera weraü kra lang raq thaüto. Krai mren, Jera weraü wa maiq ka ata ata miishe khaki na tiichap raüta tseato. Jabdi tajamti kra thaüto.

¹⁸ Kra raütiishe apaiq raq Jabdi tahii jamti ka weshi shi maq tsea raüta tiichapto. Raüta kra phong wa Karmi se Achan, Jabdi ma asaü kra lang raq thaüto. Krai mren Achan ka khaki na tsea raüta tiichapto.

¹⁹ Kiijiishe, Joshua raq Achan ma, “Ise Achan lei, ümchaü min chonglaq, Tatiwe, Israilnok Shiikeawe man na, tengteng chonglaq. Kiimaq üm mra ka tiidii laq. Ümchaü ngi ma chonglaq, ümniiraq jamlai wa riilaü? Ümniiraq ngi ma naq paükiq,” nguta waito.

²⁰ Kiijiishe, Achan raq treto, “Tengto, shutkang dea. Ngi raq Tatiwe, Israilnok Shiikeawe man na ngarai tangkang. Ngi raq akha shutkang.

²¹ Sepat lopi hupsam lapkai phong kiijaq, ngi raq Bebilon mung wa khea samtongjong kaü ashi, toknai tin kampho ngam, kiimaq chaq ngam pan ka tokthiq kra chhikang. Isiikha tsi ninlot mang kha maq, arthun ara lam wan kang. Namshiq raq kriithun ka Ijam tombutiip na, kampho ka atakiq na lapthü kang kra mihum han.”

²² Krai mren, Joshua raq maiq wiijamti tiikito. Tsangshiq ka tlatchhat juraüta tombutiip kiijaq rit kito. Krai mren ngohea dea, ashthenbaiq chang hupsam thun ka, kiijaq kampho ngam ka atakiq na raüta tlap raü humto.

²³ Tsangshiq raq kra hupsam thun ka tombutiip mong wa lam wanto. Raüta Joshua nai Israilnok khaki na Tatiwe man na phongto.

²⁴ Raütiishe, Joshua nai Israilnok mungmaiqse wiita raq, Achan ka kampho, samtongjong kaü, kiimaq chaq ngam pan, kiimaq Achhan setiim maiqwesere, kiimaq asetiim jechaksere, apaiq minsaü kong, kumtoq kong, kiimaq skukong, kiimaq apaiq tombutiip kra, kiimaq apaiq jaq na hupsam ümchuwa rümtlaq kra thun krai nong nong maq laphoto; raüta tsangshiq raq tsangshiq ka Chamchao Hiqwii kiiniishe sheahoto.

²⁵ Kiimaq Joshua raq akha nguto, “Ümniiraq naishiq khuthaq na atin khan chamchao jam nguto tiisaü laü? Ümchaü san, Tatiwe raq ümnii miimin chamchao she mitii saü!” Raütiishe, mungmaiqse kunli raq Achan ka longmaq tiitsailaq tiiqbaiqto. Kiimaq tsangshiq raq ajamtitiim thun kiimin longmaq tiiqbaiqto. Raüta tsangshiq hupsam thun krai adam na wa maq chaqbaiqto.

²⁶ Tsangshiq raq apaiq maachiim na long maq phongnyung kaüshi she rongbaiqto. Kra longphong ka ümchaü min asili. Kra ningkhan tiina, kra hiq ba ka ümchaü min Chamchao Hiqwii nguta ngutlo. Kra lot jaishe Tatiwe ka tsangshiq ma khiqmak she riito.