JOSHUA 6 - ASII LAKDAP Bible (BSI)

Israilnok Raq Jeriko Khat Raüta Jiiwanto

¹ Jeriko chela kilü thun ka Israilnok nyapwa jiiq nguta among nü maq laje siisaq thüto. Raüta sreabi raq kheshat riito. Jumin chela mong na walot mak kiimaq jumin kinphai na tiidong mak riito.

² Kra akhing na Tatiwe raq Joshua ma nguto, “Ngi raq Jeriko chela ka tsangshiq hokhamwe krai nong nong maq, mungmaiqse srea nolabi wiita ümjaq khon mong na kiinong kuq kang she.

³ Ümniiraq ümsengi srea nolabi kra shea laüta chela tro na ranaiqshi na troshishi, ratrok na saüli kom khumlaq.

⁴ Tongshong Tek khaki na, ramwebi wemiishi, tsangshiq jaq na lerong chü achhuq chhuq shamraq chhaq maq, riikong riikong khum chang. Ramiishi ranaiq na, ümsengi srea nolabi thun shea laüta, ramwebi min nongshnong maq chela tro na jang miishi tro khum chang. Kra akhing na ramwebi riika tsangshiq lerong kra tsü raüta khum chang.

⁵ Kiijiishe, tsangshiq raq lerong ka adam na tiihong raüta dang alu maq tsü chang. Namshiq raq kra tairi, maiqwere tarü raq tiihong lanta gitrang ratlo. Kra raüla, chela tro wa ruk ka wiita mithamki. Kiijiishe nolabi kunli ka chela mong na phongtsok she khat wan chang.”

⁶ Raüta Joshua raq ramwebi ka heato. Raüta tsangshiq ma akha chongto, “Tongshong Tek pironglaq, lanta kra khaki na wemiishi lamshea lerong doraq maq khum ronglaq.”

⁷ Kra raütiishe apaiq raq asengi ma chela tro na khum miitushe aming kuqto. Tatiwe Tongshong Tek khaki na sreabi kongshi lamshea tiiwato.

^8-9 Joshua raq aming kuqtaq kra phan phan, lerong tsüwanti ramwebi ma sinkhu na, lamsheati srea nolabi kongshi tiiwato. Kra jai na sreabi jai nü maq kheti kriishe wato. Riita ara chongtiikai akhing na lerong ka tsü wan ruq tsüto.

¹⁰ Shatmaq, Joshua raq asengi ma, apaiq raq aming mikuq shaq wiiwii, asii min raamak, bom poshi min bom maimak, nguta aming tatto.

¹¹ Krai mren, apaiq raq asengi arkong ma, Tatiwe Tongshong Tek ka chela tro na komshi khumki rongkiq nguta aming kuqto. Raüta troshi khum jai, tsangshiq piitiip na jangki nongto. Raüta kra rawa ka piitiip na japto.

^12-13 Joshua ka anap ranaiq na, ranap chu maq chapto. Raüta jangnai ngoja she, kongkhu ranaiq khumtaq kra phan phan hali, ramwebi nai srea nolabi ka chela tro na khum nongto: Apha na lamsheati phenlabi; kra jai na lerong tsüti ramwebi wemiishi; kra jai na ramwebi Tongshong Tek piti; kra jai na atiisup niika, akheti phenlabi kra khumto. Tsangshiq ka lerong tsii wan ruq maq khumto.

¹⁴ Kra ranaiqnai ngoja ranaiq niimin, tsangshiq ka chela tro na troshi khumto. Raüta tsangshiq piitiip na janghoto. Tsangshiq raq akha chela tro na khum ka ratrok na saüli khumto.

¹⁵ Ramiishi ranaiq ngoja niishe, tsangshiq ka ranapchu maq rawü tsuprup tsupriiq niili chap pha wanto. Raüta rahin jaq khumtaq kra phan phan, jang miishi tro khumto. Ara ramiishi ngoja ranaiq niili, tsangshiq raq chela tro na jang miishi kom khumto.

¹⁶ Chela tro na jang miishi she tro khumto angu na, ramwebi raq lerong tsüho namnam she kriijaq, Joshua raq asengi ma ümchaü ka gitrang rong liishe nguta aming kuqto. Kiimaq apaiq raq tsangshiq ma, “Tatiwe raq namshiq ma chela ka wenkuqto she!

¹⁷ Chela nai chela mong na ümchuwa sitlaq kra thumthum shiithen baiq ratlo. Arka Tatiwe ma honglu na ake kun she. Mephe nyung Rahab nai ajamtitiim kriili tiichong chang. Jamkhano ngukla apaiq raq nashiq siwenai kra paükuqto.

¹⁸ Shatmaq ashthenbaiq chang hupsam kra namshiq raq jaqkaiq maq shamkai raamak. Kra riihanla, namshiq raq Israilnok piitiip na chamchao kiimaq athen ajen mitiisaü han.

¹⁹ Phanrap hup nai sam kampho maq atiiq, chaq maq atiiq, nairai maq atiiq, kiimaq jin maq atiiq, thun wiita ka Tatiwe rii pong na asii ngamrea arai thüwi she. Arka Tatiwe tsamtiip khok na thü chang,” nguta aming kuqto.

²⁰ Krai mren ramwebi raq lerong ka tsütrangto. Sreabi raq lerong tsüwa trang kra tai raüta, tiihong raüta gitrangto. Krai mren, chela tro ruk ka riidungtsok tham wanto. Kiijiishe Israilnok rewebi raq, lamha kra dürang raüta chela mong na khat wanto. Raüta chela ka jiiwanto.

²¹ Tsangshiq raq nepja maq, chelati maiqwere kiimaq jechakre, nyungwe nose wiita jiipbaiqto. Tsangshiq raq nyamse thun minsaü, skukong, kiimaq kumtoq kong wiita jiipbaiqto.

Rahab Nai Ajamtitiim Atiiwong Riikuqto

²² Raütiishe, Joshua raq siwenai kiima thaüto, “Namnai raq mephe nyung ma, bom khamkuq lan kra phan phan, apaiq jam kiina walanta, apaiq nai ajamtitiim ka kinphai na sheawa rongkiq.”

²³ Krai mren, tsangnai ka wato. Raüta Rahab ka kinphai na awe kiimaq anyung, kiimaq anung anotiim, kiimaq apaiq jamtitiim wiita adam na shea wato. Tsangshiq raq tsangshiq tarü, wiijamtam kiimaq tsangshiq disetiim thun kiimin Israilnok piitiip tho na tiiwong shat na sheahoto.

²⁴ Kra lot raütiishe, tsangshiq raq chela ka wa maq tiibunlak, hiq maq hutse chaqbaiqto. Shatmaq hup asam thun chaq maq atiiq, kampho maq atiiq, miiki maq atiiq, kiimaq jin maq atiiq thun ka, tsangshiq raq ümchuwa riichom taq kriika, lamho raüta Tatiwe tsamtiip khok na thühoto.

²⁵ Shatmaq, Joshua raq mephe nyung Rahab nai ajamtitiim thun ka tsat mak, tiiwong kuqto. Jamkhano ngukla apaiq raq Jeriko chela na atiiwa siwenai ka, kra nyung raq apaü raüta tiiwongkuqto. (Arnyung ma asaü ase phan ka ümchaü niitaq Israil mung na sitlo.)

²⁶ Kra akhing na, Joshua raq Jeriko chela ma akha sonto, “Jurwa Jeriko chela ka tiihea hainong tlaq, kriiti raq Tatiwe manson akha miho. Jurwa chela jamkhü sürii tlaq, ase chhikhuwe mitsai. Jurwa chela kilam thun tiihea haitlaq, ase nobungwe mitsai.”

²⁷ Krai mren, Tatiwe ka Joshua rai lomshat riito. Kriikha maq, Joshua khushü jonglu ka mung tlotli na phoi wanto.