JOSHUA 4 - ASII LAKDAP Bible (BSI)

Manphan Longshong

¹ Kiimaq ümtiikiiwa Israilnok mungmaiqse raq Jordan rai ka jin wan lottaq, Tatiwe raq Joshua ma akha chongto,

² “Israilnok maiqphan phanroqshi ri phannai kiiwa phanshi wa maiq weshi shi tsea laq.

³ Laüta tsangshiq ma, ramwebi chap chang ba Jordan rai jümong ba jüphii kiiwa, longkaü kaüroqshi ri kaü nai dowan ronglaq nguta chonglaq. Raüta longkaü thun ka piwan raüta athi rawa ümbano piitiip tei wan tlan kiijaq phong rong laq.”

⁴ Krai mren, Joshua raq Israilnok phongwa maiq ka weroqshi ri wenai tseato. Raüta heato.

⁵ Kiimaq tsangshiq ma akha aming kuqto, “Namshiq ka Tatiwe Shiikeawe Tongshong Tek khaki na Jordan rai mong jüphii kiina wawanli ronglaq. Lanta namshiq maiq loweatek raq Israilnok maiq phantek miitu longkaü ka kaüchhuq chhuq phaq na piwan ronglaq.

⁶ Ara longkaü thun arka mungmaiqse ma Tatiwe raq jamlai jaqwa shamkuqtaq kra tiitsang wan miitu miraq. Rawiichii ji na namsetiim raq ara longkaü phong arka jamlai miitu athü wa nguta miwai.

⁷ Namshiq raq tsangshiq ma, Tatiwe Tongshong Tek raq Jordan rai jin wan kiita, Jordan rai kham ka süroq rükito nguta michongkuq han. Ara longkaü phong arka Israilnok ma pattup miitu ümchaü akhing na Jordan rai ka jamkho jin wantaq kra manphan tiitsang chang manphan miraq.”

⁸ Aming kuqtaq krai mren, tsangshiq riimin jaq ka shamto. Tatiwe raq Joshua ma jamkho aming kuqtaq kra phanphan, Israilnok maiqphan phanroqshi ri phannai raq kra jürai phiisü kok mong ba tiithi kiiwa longkaü ka kaüroqshi ri kaü nai dowan wato. Raüta Israilnok mungmaiqse raq kra rawa lamjap wantaq hiq ba kiijaq phong wanto.

⁹ Kiimaq, Joshua raq Tongshong Tek piwanti ramwebi chap wan chang ba Jordan rai kok mong ba kiijaq, longkaü kaüroqshiri kaünai hali, Israilnok maiqphan phanroqshi ri phannai kra maiqphan aweatek kaüshishi tiiphong wanto. (Riita ara longkaü thun arka, ümchaü min kriijaq sishat asili.)

¹⁰ Tatiwe raq Joshua ma kra jaqsham miitu aming kuqtaq kra phanphan, Israilnok raq jaqsham ka mingut wan shaq wiiwii, ramwebi ka kra Jordan raikok phii mong ba kiijaq chapshatli chapto. Arka Mosheq riimin akha klo wan chang nguta aming kethüje dongdii riito. Mungmaiqse riimin jürai ka jaqlo witwit jin wanto.

¹¹ Riita mungmaiqse ka konü tareko na kunkun she saüto angu niishetiq, Tatiwe Tongshong Tek piti ramwebi ka mungmaiqse ma lamshea sinkhu niishe hali wawan nongto.

¹² Mosheq raq aming tatthütaq kra phanphan, Ruben phan kiimaq Gad phan kiimaq Manase phan wa khoko srea nolabi thun ka, rekhat ma tiijeshat maq, Israilnok mungmaiqse ma sinkhu na jü ka jin wawanto.

¹³ Tatiwe khaki na rewebi rekhat ma khekham maiq hingroqblai tinkhan, raq Jeriko tho na hiqthungtan kra jin wanto.

¹⁴ Kra ranaiq Tatiwe raq jaqsham kuqtaq kra chhiraüta mungmaiqse raq, Joshua ka ajong pinthumwe dea nguta tak wanto. Tsangshiq raq Mosheq ka jamkho shreng wantaq kra phanphan Joshua kiimin arilung pattup tsangshiq raq shreng wanto.

¹⁵ Kiijiishe Tatiwe raq Joshua ma,

¹⁶ Tongshong Tek piwanti ramwebi ka Jordan rai phii mong kiiwa, takii niishe warong ra, nguta aming kuq laq nguta thaüto.

¹⁷ Krai mren, Joshua raq, aming kuqto.

¹⁸ Krai mren ramwebi ka jüraikii na saü wanri li she, Jordan rai kham ka kongkhu na jamkho tareko na saülili, tümlüm tümli achhang lowantaq kiikha chhang wan nongto.

¹⁹ Israilnok raq Jordan rai ka apha wan jipi lü wa jiha raroqshi ranaiq na jin wanto. Raüta Gilgal chela tho na shedong nü tiithi na tsangshiq piitiip tei wanto.

²⁰ Kiijaq Joshua raq Jordan rai wa longkaü kaüroqshi ri kaünai tiipi wantaq kra shongto.

²¹ Raüta Joshua raq Israilnok ma akha chongto, “Rawiichii namsetiim raq, ara longkaü phong arka jaram aphong wan wa nguta bom wai raüla,

²² namshiq raq tsangshiq ma, Israilnok raq Jordan rai ka phiisü süroqroq jin wantaq manphan kra miphan kuqhan.

²³ Tsangshiq ma, Tatiwe Shiikeawe raq, nashiq miitu Khamshii Khamjong rai jamkho tiisüroq trübaiqtaq, kiikhiisii, Jordan rai kiimin namshiq raq mijin wanlot shaq wiiwii, tiisübaiqto nguta chongkuq ronglaq.

²⁴ Arningkhan mangjong hiq na siti maiq tlotli raq, Tatiwe ningkun jonglu ka ümtinkhan wa kra misap wan. Kiimaq namshiq riimin Tatiwe namshiq Shiikeawe ka pattup pat-sa mishreng wan han.”