JOSHUA 3 - ASII LAKDAP Bible (BSI)

Israilnok Raq Jordan Rai Jin Wanto

¹ Anap ranaiq miishe Joshua nai Israilnok tlotli ka ranap chu miili tiidoto. Raüta tsangshiq lamjap wan chang Shittim hiqshong kriiwa tiido wanto. Raüta Jordan rai kii kiina jap wanto. Raüta Jordan rai kra jin wan miitu tiijeme wanto.

² Kra lamjap piitiip na ranaiqtsam hai jai she, welabi thun ka mungmaiqse sitlaq piitiip mong kiina khumshkhum maq ki raüta,

³ akha aming kuqto, “Singmung maiqse lei, tai ronglaq, ümtiikiiwa ramwebi raq namshiq Tati Shiikeawe Tongshong Tek ka piraü she chhihan la, namshiq piitiip ka run ronglaq. Lanta tsangshiq jai phan phan warong laq.

⁴ Namshiq ka ana ümtiikiimin waman shaq. Kriikha na tsangshiq raq lam mishea. Shatmaq, namshiq ka Tongshong Tek tho na tiinap hea naq khum rongkiq. Namshiq ka Tongshong Tek jai na kilomitar shi tiihea lanta khum ronglaq.”

⁵ Joshua raq mungmaiqse ma chongto, “Namshiq khum ka tiisii ronglaq. Jamkhano ngukla, Tatiwe raq anap ranaiq namshiq phong na amao chang jaq misham.”

⁶ Kra chongkuq raütiishe, apaiq raq ramwebi ma Tongshong Tek kra piraüta mungmaiqse ma sinkhu na lamshea waronglaq nguta thaüto. Krai mren tsangshiq riimin kra phanphan wawanto.

⁷ Tatiwe raq Joshua ma nguto, “Ümchaü ranaiq ngi raq jamlai jaq wa shamtiikang, kra chhiraüta Israilnok raq ümniika ajong pinthum dea nguta mishreng phaho kiimaq tsangshiq raq, ngi ka Mosheq rai jamkho kongshi kiimshi maq sikang, kiikha ümniirai min sidam tiikang nguta misap.

⁸ Tongshong Tek piti ramwebi ma chonglaq, tsangshiq ka Jordan rai kii na saüwan raüla, jü rai ka jin pha wan chang. Raüta phanshi rap raüta jükii tho kiimaq jümong na chapkai chang.”

⁹ Kiijiishe, Joshua raq mungmaiqse ma chongto, “Ana itho na warong ra. Lanta Tati Shiikeawe raq jamlai wa chongtlaq kra tiitsang tai rong laq.

¹⁰ Namshiq ka jamkho Kanan mung na nyap wan wan, milong wan han, Tatiwe apaiq raq, Kanannok, Hitaiqnok, Hiwaiqnok, Perijaiqnok, Girgashaiqnok, Amoraiqnok, kiimaq Jebusaiqnok thun kra wiita thumthum mijobaiq. Raüta, namshiq raq atra Shiikeawe ka namshiq rai nguta misap wan han.

¹¹ Arka mangjong tlotli ma Tatiwe Tongshong Tek kra namshiq ma sinkhu na konü jüreko na jin wan lot jai shetiq misap wan han.

¹² Riita ümchaü min, Israilnok maiqphan phanroqshi ri phan nai kiiwa, phanshi wa maiq weshishi kra tsea rong laq.

¹³ Riita ara mangjong hiq tlotli rümti Tatiwe Tongshong Tek kra piti ramwebi raq Jordan rai kham kiijaq ji maq rappha wan raüla, Jordan rai kham kai ka atsaq she mirki. Kham ka raikhu nü na hiq bashi na atiihap she mirki. Raüta khamkai ka atsaq she mirki.”

^14-15 Kra akhing ka bunwong hanchoji. Krai mren jürai ka chhanghea ama riito. Mungmaiqse ka piitiip kiiwa tiido wanto. Raüta Jordan rai jin wan wawanto. Ramwebi ka Tongshong Tek kra pi raüta, mungmaiqse ma sinkhu na wawan lito. Riita ramwebi raq Jordan rai jü kiijaq tsangshiq ji maq kham mong na niwan ri li she,

¹⁶ Jordan rai kham kai ka atsaq she riikito. Kra khamkok tiihap kitaq hiq ba ka raikhu nünü na alu wi maq tiihap kito. Kriiba ka Adam chela tho na riito. Adam chela ka Jarethan hiqshong tho na riito. Jordan rai kok ka Amaa Khamjong Chum kiina kiho tlo. Kra jükok kra trütha phiisü ma tiija tlii jükhü maq hapbaiqto. Krai mren, Israilnok raq Jordan rai ka Jeriko chela re tho maq jin wanto.

¹⁷ Nokwe raq jükok ka süroqroq hea konü jüreko niishe jin wanto. Mungmaiqse kunli konü jüreko na mijin wan lot shaq wiiwii, ramwebi ka Tatiwe Tongshong Tek kra pishat maq Jordan raikhü mong ba na phii süroqroq hea kriijaq chapruq li chapto.