JOSHUA 2 - ASII LAKDAP Bible (BSI)

Joshua Raq Jeriko Chela Na Siwe Tiiwato

¹ Raütiishe Joshua raq Shittim hiq maq Kanan wang binjü kra kiimaq akhek ka Jeriko chela kra ahukse maq walanta sisin liiwa rongkiq nguta siwe anai tiiwato. Tsangnai ka Jeriko chela na saü raüta, kra rawa ka mephe nyung Rahab jam na jap wan nguta düwato.

² Jeriko chela rümti hokhamwe raq Israilnok siwebi saüwato. Raüta tsangmung sisin wa wato nguta tsütsa ka taito.

³ Kra tairaüta, “Ümjam na wanwenai wataq kriika namung ara sisin wan nguta wato! Tsangnai ka ana sheaho laq!” nguta raq Rahab ma bom ka tiichongkito!

⁴ Shatmaq kra nyung raq maiqwenai kra apaü riibaiqto. Raüta, “Tengto, maiqwenai ka i jam na wato dea. Shatmaq ngi raq tsangnai ka ümriibati wa kriika sapmang.

⁵ Kiimaq raji ranyaq wan tlaq chela kilamchong kra shabaiq wan akhing na tsangnai ka ijam wa ahin na tiidohoto. Tsangnai ka ümnüno kihotaq kriika ngi raq sapmang. Namshiq raq tsangnai ka jaqlo thit joho ronglaq. Hanjiila, tsangnai ka aje wiili miloho han,” nguta Rahab raq bom ka treto.

⁶ (Shatmaq kra nyung raq maiqwe nai ka wukhu thung kiina shea wan raüta, apaiq raq wukhu thung na raikii shinte phong pahea athü kra phong mong na pangbaiqto.)

⁷ Krai mren, hokhamwe sengi raq kra wenai ka Jordan rai na kaichang lam nü kiina, Jordan rai jinwan tlaq jürap chang ba kiina saüli johoto. Tsangshiq maiqjohoti kra kaiho ri li she chela kilamchong kriimin shabaiqto.

⁸ Siwenai ka mikon wan shaq liipan na Rahab ka wukhu na wato.

⁹ Raüta apaiq raq, “Ngi raq asap ha, Tatiwe raq namshiq ma naimung arka kiinong kuqbaiqto she. Armungti maiq wiita ka namshiq hai ma phiip riishe tsaitlo.

¹⁰ Jamkhano ngukla, namshiq ka Ejip mung maq laü wan lan akhing na, Tatiwe raq namshiq wawan miitu lam tanke wan, Khamshii khamjong rai kra wiita shinriiq trübaiqto nguta tsütsa ka taikai. Kiimaq ara Jordan rai reko binjü wiiq na siti Amoraiq mungti hokhamwe nai Sihon hokhamwe nai Ok hokhamwe kriimin, namshiq raq long wan lanta jamkho tiimiqchup jiipbaiq wan lan kriimin naishiq raq tsütsa ka taikai she.

¹¹ Naishiq raq kra tsütsa ka tailaita, naishiq ka pinthum atiikhairokrok she hai wan kai. Naishiq ka namshiq ma haima, tsitsü min dong mak she. Tengto. Namshiq Tatiwe Shiikeawe ka ramungtan nai mangjong hiq ara rümti dea.

¹² Riita, ümchaü min, ngi raq namnai ka jamkho lungwii tsantsii maq khrum kuq kang, kiikhiisii hali, namshiq riimin, ngi nai ijamtitiim ka mikhrum hai nguta apaiq mang na ngi raq kamli chang sinkham miithii kii shongthü ronglaq.

¹³ Namshiq raq inyung nai iwe kra, kiimaq iphu ino maiqwesetiim kra kiimaq inung inotiim jechaksetiim kra kiimaq tsangshiq jamtitiim tarü, namshiq raq tsatbaiq mai mitiiwong kuq hai nguta ngi ma kiqkham kuqthü ronglaq!” nguta Rahab raq tsangnai ma chongto.

¹⁴ Kiijiishe kriiwe nai raq, “Nainai miisaq ka namshiq miisaq maq song! Ümniiraq nainai arjaq jamlai miitu wa wakai ara nanok ma chongmaü dam laüta thü haüla, ümtiikiiwa Tatiwe raq, naishiq ma armung ara kuqjiiq, kra akhing na, naishiq riimin ümniirai kiimaq ümjamtitiim rai sinkham bomtsi ka riikhaqli mithü hai,” nguta kriinyung ma nguto.

¹⁵ Kra raütiishe apaiq raq, tsangnai ka kitanpu maq raülo maq rukphai na tiisatbaiqto. Jamkhano ngukla apaiq jam ka longmaq ahai chela tro ruk kra rukphai nü khetuk kiijaq tiinapsaq na ahai.

¹⁶ Apaiq raq nguto, “Namnai ka ku akin binjü nünü kiina wa lanta tiipaü wa rongkiq.” “Riimak la, hokhamwe sreabi raq namnai ka humrat jiiq. Namnai ka kin binjü kiina ranaiqtsam tiipaü wa rongkiq. Namnai joti sreabi ka chela na jang wanto she angu niishetiq, namnai ka leaho ronglaq,” nguta kra nyung raq tsangnai ma chongkuqto.

¹⁷ Kriiwenai raq, kriinyung ma nguto, “Ümniiraq nainai ma kiq tiikham laü kra riikhaqli mithü kai.

¹⁸ Kiitiina, ümniiriika akha riichang. Naishiq raq ümra akhing niiwa ara nammung ara long tiikai, kra akhing na, ara raüshiilo arka ümchaü ümniiraq nainai tiisat laü khetuk kitanpu arjaq chan laüta thülaq. Laüta ümnyung nai ümwe kiimaq ümphu ümnotiim thun ka, kiimaq ümjamtitiim tarü ümjam mong arjaq triitam laüta ngarong laq.

¹⁹ Riita ara bom riikham tiikai arai mren, ümjamti phong wa maiq ashi ra ka ara ümjam mong arwa kinphai niila dongki raüla, kriiti khupo ka tsangshiq maiqmii riili miho. Naishiq ka sepii miraq. Shamtaq ümjam mong wa maiq ka tsat raüla, kra mat kha ka naishiq khuthaq na miraq.

²⁰ Shatmaq tiina, ümniiraq ara naishiq jaqsham ara nanok ma chong haüla, ümniiraq naishiq ma ara tumkham tiinyang tlaü arka naishiq khuthaq na mra ahü she miraq.”

²¹ Krai mren, kriinyung riimin tsangnai bom ka treto. Raüta tsangnai ka khu asang maq tiiwa baiqto. Tsangnai kaihori she, apaiq raq kra raüshii lo kra khetuk kilüpu kiijaq chan thüto.

²² Kra siwe nai ka ku akin binjü kiina wawan raüta tiipaü wato. Hokhamwe sengibi raq tsangnai ka hiqshong tlotli na ranaiqtsam ritto. Shatmaq tsangshiq raq tsangnai ka hummak riito. Kra ningkhan she tsangshiq ka Jeriko niishe jang wan nongto.

²³ Kiijiishe siwe nai ka ku akin binjü kiiwa tsangnai jijai lam nü kiina hali jangho nongto. Raüta, Jordan rai reko nü kiina hali jang wan nongto. Raüta Joshua phana jang wan nongto. Raüta tsangnai raq tsangnai wanhiq khum lam maq phanrap riihumtaq kra Joshua miishe kunkun phanchan kuqto.

²⁴ Kiimaq tsangnai raq akha nguto, “Tengto, Tatiwe raq nashiq ma armung arka kiinong kuqto she. Kiijaq siti mungmaiqse ka, nashiqnok ma haima, phiip raq atsai sitlo.”