JOSHUA 14 - ASII LAKDAP Bible (BSI)

Jordan Rai Maq Shenyap Nü Mung Hiq Chumkuqto

¹ Riita, arjaq arka Kanan mung wa, Jordan rai maq shenyap nü mung ka Israilnok liipan na hiq ka jamkho chongkuqtaq kra chongtlo. Ramwe Eleajar, Nan se Joshua, kiimaq Israilnok phan wa kaüwa weraü welabi raq mung hiq ka tsangshiq mungmaiqse liipan na riichumto.

² Tatiwe raq Mosheq ma aming kuqtaq krai mren, Jordan rai maq shenyap nü mung ka, maiqphan phan tiikaü ri phankho rii hiq ka, langlii raüta, lang raq thaütlaq kra phan chumkuqto.

^3-4 Mosheq raq Jordan rai maq shedong nü wang hiq ka maiqphan phan nai ri phankho rii kongkhuphii achumke wishe riito. (Joseph saüsephan ka maiqphan phannai ma tiikhoto: Manase nai Ephraim.) Shatmiitiina, Mosheq raq Lewi phan miika tsangshiq rii hiq chumkuq mak dea riito. Kra rii na tsangshiq miika asichang chela atro na nyamse kong tiihaichang nyiimlung rü wak ram asisi chela thun kra pheakuqto.

⁵ Israilnok raq Kanan mung hiq ka Tatiwe raq Mosheq ma aming kuqtaq, kra tiiphan phan riichumto.

Hebron Chela Ka Kelib Ma Kuqto

⁶ Ranaiqshi Juda phan wa, maiq wiijamti ka Joshua phana wato. Kra phong wa weshi ka Kelib. Apaiq ka Jephunne se Kennijaiq ta wa. Kelib raq Joshua ma, “Tatiwe raq apaiq jaqshise Mosheq ma Kadesh Barnea chela maq nanai miitu jamlai bom wa chongkuqtaq irka, ümniiraq asap haü.

⁷ Tatiwe jaqshise Mosheq raq Kadesh Barnea hiq maq ngi ma Kanan mung ka sisin wa tiiwataq akhing na irawii ka wiiroqblai maiq riikang. Krai mren, ngi raq apaiq ma Kanan mungti ka jamkho chhiwa kang, kra tsütsa ka riikhaqli apaiq ma tiitai chongkuqho kang.

⁸ Shatmaq, ngi rai wadamti siwebi ahinti raq nashiqnok ka atiihai khoti riito. Shatmaq ngi raq Tatiwe I Shiikeawe aming ka tsapkapkap langkang.

⁹ Ngi raq riikhaqli jaqshamkuq kang krai mren, ngi raq iji maq ni wan kang mung kriiwa, isetiim nai ngi rii hiqshong michumkuq kang nguta Mosheq raq ngi ma kiqkham kuqto.

¹⁰ Shatmaq, liilaq! Tatiwe raq Mosheq ma kra bom chongkuqtaq kriimaq, ümchaü ka rawiiroqblai ri wiibiingi she lea wanto. Tatiwe raq Mosheq ma kra bom chongkuqtaq akhing na, Israilnok ka kumtsaiphii mung na mang laü wan riito. Riita ija, Tatiwe raq ngi ma kiq khamkuqtaq krai mren, ümchaü niitaq ngi ka khu asang maq rümtlo. Liimaüta! Ngi ka ümchaü irawii roqtiichat ri wiibiingi she.

¹¹ Kiimaq ngi ka ümchaü min kuilajongli sitiikang. Mosheq raq ngi ka Kanan mung hiq sisin wa tiiwataq akhing na jamkho kuila jong riikang, ümchaü min kra taqtaqli sitiikang. Ngi ka ümchaü min rekhat kai amai sreajong sitiikang. Kiimaq alaiq athaiq jaqsham miitu khekham sitiikang.

¹² Riita, ümchaü min, ikongtitiim nai ngi raq kra tsütsa chongkuqho kai akhing na, Tatiwe raq ngi ma mikuqha nguta kiqkham kuqtaq, krai mren, ara ku akin binjü thun arka ngi rii chumkuq laq. Kiitiikaq naishiq raq ümniima kra binjü na sitinok ka Anakim phan, jonghea luhea phan sitlo nguta chonghokai ihata. Kiimaq tsangshiqnok sichang chela thun ka, ajong min jong hea, trotam maq long maq aruk nguta chonghokai ihata. Li jiimin, Tatiwe ka ngi rai asi miraq. Tatiwe raq ngi ma jamkho kiqkham khuqtaq kra phanphan, ngi raq tsangshiq ka khat lata, chela thun ka mijii wanha,” nguta Kelib raq Joshua ma chongto.

¹³ Krai mren, Joshua riimin, Jephunne se Kelib ma achu shiiman kuqto. Raüta apaiq rii tachong hiqshong Hebron chela kra chumkuqto.

¹⁴ Riita, Hebron chela ka ümchaü niitaq saüli, Jephunne se, Kenijaiq ta Kelib saü asetiim riidea siqtlo. Jamkhano ngukla, apaiq raq Tatiwe Israilnok Shiikeawe aming ka tsapkapkap maq lang wanto.

¹⁵ Kriima kongkhu niika, Hebron chela ka Arba chela ngutlo. (Arba ka Anakim phan wa, tarü thaq na nolajong pinthum riito.) Riita ümchaü kra mung ka mungtsing she sitlo.