JOSHUA 11 - ASII LAKDAP Bible (BSI)

Joshua Raq Jabin Nai Akongtitiim Khat Raüta Tangto

¹ Riita Israilnok raq maiqmung thun khat raüta tang wanto nguta tsütsa ka Hajor chela hokhamwe Jabin raq taito. Raüta apaiq raq tsütsa ka, Madon chela Hokhamwe Jobab ma, kiimaq Shimron chela hokhamwe, kiimaq Achshaph chela hokhamwe,

² kiimaq hiqkhu nü mung pum na siti hokhambi ma, Gelili Thamchum maq hiqmai nü wang Jordan rai tan binjü na siti ma, kinji wang binjü na siti ma, kiimaq khamjongkii wang binjü na Dor chela tho na siti ma tsütsa ka tiichong kito.

³ Kiimaq apaiq raq tsütsa ka Jordan raikii siimhapri wang binjü na siti Kanannok ma, kiimaq Amoraiqnok ma, Hitaiqnok ma, Perijaiqnok ma, kiimaq kin binjü wang na siti Jebusaiqnok ma, kiimaq Harmon Pumji wang binjü wa Mijpa tan na siti Hiwaiqnok miimin tsütsa ka tiichonghoto.

⁴ Krai mren, tsangshiq ka tsangshiq phenlabi shea raüta wato. Tsangshiqnok phenlabi ka khamjong chumkii na kumtsai riiphong tlaq ikha awea lot chang riimak. Kriithaq niimin tsangshiq jaq niika kumrang kong nai kumrang leng pahea asi.

⁵ Arthun hokhambi ka adam na pong raüta, tsangshiq phenlabi ka shea raüta wato. Raüta Israilnok khat ma Meron Jürai tan na piitiip teito.

⁶ Tatiwe raq Joshua ma nguto, “Ümniika tsangshiq ma naqhaikiq. Anap ranaiq atincho na, ngi raq tsangshiq ka Israilnok miitu wiita ajiipbaiq wishe mirha. Ümniiraq tsangshiq kumrang kong hok ka tiikü sebaiq laq. Kiimaq tsangshiq kumrang leng thun ka wa maq chaqbaiq laq.”

⁷ Krai mren, Joshua nai asengi tlotli raq tsangshiq ka tiihanghiiq miili Merom Jüserai tan kiiwa khatto.

⁸ Tatiwe raq Israilnok ma rekhat ka tiitangkuqto. Israilnok raq tsangshiq khatto, raüta tsangshiq ka jowan raüta shekhu nü wang na Misrephoth Main chela nai Sidon chela na saüli khat wanto. Kiimaq shedong nü wang na, Mijpa tan binjü na saüli jowan raüta khatto. Israilnok raq re ka weshi min atra tiichong mak khatto.

⁹ Tatiwe raq Joshua ma aming kuqtaq, kra phanphan, Joshua riimin tsangshiq ka khatto: Apaiq raq tsangshiq kumrang kong hok ka wiita tiikü sebaiqto, kiimaq tsangshiq kumrang leng thun ka wa maq chaqbaiqto.

¹⁰ Raütiishe Joshua ka jai na jangto. Raüta Hajor chela ka khatto. Raüta hokhamwe ka tsatbaiqto. (Kiitinchoji Hajor hokhamwe ka kra tro wa mung thun sitlaq kra thaq na ajong pinthum riito.)

¹¹ Israilnok raq kiiwa maiqse angu ka thumthum tiimiqchup, weshi min atra tiichong mak jiipbaiqto. Raüta chela ka wa maq chaqbaiqto.

¹² Tatiwe jaqshise Mosheq raq aming kuq thütaq kra phanphan, Joshua raq ara chela thun ka khat raüta jiiwanto. Kiimaq kiiwa hokhambi nai tsang sengi ka tiimiqchup jiipbaiqto.

¹³ Kiitiina, Israilnok riika hiqlamsetiim na atei chela thun ka chaqbaiq mak dea riito. Shatmaq Hajor chela kli Joshua raq wa maq chaqbaiqto.

¹⁴ Israilnok raq arthun chela khattaq kiiwa araa ariq phan hupsam thun nai nyamse thun ka, tsangshiq miitu lamho raüta thühoto. Shatmaq tsangshiq raq maiqse ngusaq kla weshi min atra tiichong mak, tiimiqchup jiipbaiqto.

¹⁵ Tatiwe raq ajaqshi se Mosheq ma aming thun ka kuqthüto; Mosheq raq kriithun ka Joshua ma kuqto; krai mren Joshua raq aming thun ka lang wanto. Tatiwe raq Mosheq ma aming ümchuwa kuqtaq kra, Joshua raq kunkun klo wanto.

Joshua Raq Mung Alap Wan Hiqrai

¹⁶ Joshua raq mung ka khat raüta kunli jiiwanto. Kriika arthun ara riito: Ku akin mung kra, kiimaq kinji wang thun kra, shekhu nü wang nai shemai nü wang thun ka romshaq na, Goshen wan binjü lotli, kiimaq kriimaq shemai nü mung thun kra, kiimaq Jordan rai tan thun kra.

^17-18 Kra hiqrai thun ka Halak Pum maq riita, shemai nü mung na Edom mung hiqrai tho na saüli riito; kiimaq riita shekhu nü mung na, Baalgad chela na saüli riito. Kiimaq riita Harmon Pum maq shemai nü na Lebanon tan na saüli riito. Joshua ka armung thun hokhambi rai rawii luhea riikhatto. Shatmaq apaiq raq tsangshiq tarü tangto, raüta mung thun ka jiito. Kiimaq tsangshiq ka thumthum jiipbaiqto.

¹⁹ Israilnok rai wehea riija wanti ka Gibeon chelati lamlamli. Kra chela na sitinok ka Hiwaiqnok. Kriiwa chan tlaq chela ahinti thun ka Israilnok raq khat raüta siisaq jiiwanto.

²⁰ Tatiwe raq kra mungti thun ka chongthum tiijabaiq miitu, tsangshiq tsantsii ka longkaü ikha tiitsin baiqto. Kriikha maq, tsangshiq ka Israilnok rai riikhat wanto. Kiimaq Israilnok raq tsangshiq ka tiihang mak maq, tiimiqchup jiipbaiqto. Arka Tatiwe raq Mosheq ma aming kuq thütaq kra phanphan kloto.

²¹ Kra akhing na, Joshua ka kiraüta, maiq akhum jonghea hea phan Anakimnok, ku akin wang binjü na-- Hebron chela, Debir chela, Anab chela, kiimaq Juda mung nai Israil mung na ku akin wang binjü na shongtinok thun kra Joshua raq tsangshiq ka tiimiqchup jiipbaiqto. Kiimaq tsangshiq chela thun kiimin botkhulai rai shotlii shiithen baiqto.

²² Israil mung na Anakimnok phan ka ashi ra min atra tiichong mak, thumthum jiipbaiqto. Shatmaq, Gaja chela wa, Gath chela wa, kiimaq Ashdod chela wiita, tsatlap mak dea, abung atsapseli tiichong kito.

²³ Tatiwe raq Mosheq ma aming kuqtaq kra phan phan, Joshua raq mung ka kunli jiiwan raüta lapto. Raüta Joshua raq Israilnok ma tsangshiq tachong hiqshong miitu kuqto. Raüta maiqphan aweatek ma, maiqmii riirii hiqshong tiikho chumkuq raüta phea kuqto. Kiimaq, Israilnok ka mungtsing mungngang miishe shongnga wanto.