JOSHUA 1 - ASII LAKDAP Bible (BSI)

Shiikeawe Raq Joshua Ka Wela Ma Shongto

¹ Tatiwe jaqshise Mosheq tsaikai jai, Tatiwe raq Mosheq khrumti Nan se Joshua ma chongto,

² Apaiq raq nguto, “Ijaqshise Mosheq ka tsaikito she. Ümchaü min tiije laq. Laüta ümniirai Israilnok kunli ka, ara Jordan rai reko mung nü na tsangshiq ma kuq tiikang kiina jin wan ronglaq.

³ Ngi raq Mosheq ma jamkho chongkuq kang, krai mren, ümchaü min ngi raq ara mung ara, namshiq Israilnok kunli miitu, ümwokhong maq armung tiithumli ka kuq kang she. Ümniiraq shea laüta namshiq raq ümtinkhan wa hiq ka jiiwantlan, kra namshiq riishe miraq.

⁴ Namshiq hiqshrit ka shemai nü na kumtsaiphii mung kriimaq pha wan raüta, shekhu nü na Lebanon pum thun kiina saüli. Kiimaq shedong mung nü miika, Euphretis jürai jonghea kiimaq phaho raüta, Hitaiqnok mung binjü thun hamho tlii raüta, shenyap nü na Mediterenian sammok tra jükii kiina saüli miraq.

⁵ Joshua lei, ümrilung pattup ümniika chiq nai re riimin khatlot mak miraq. Ngi ka Mosheq rai jamkho adam siwan kang, kiikha ümniirai min adam maq pong dam lata misi kang. Ngi ka ümniirai riinap shat miili misi kang. Ngi raq ümniika ümtiikiimin tiishaü mang.

⁶ Ningkun shoqwiishoq maq srea nola ma jalaq. Ümwokhong maq tsangshiq shea laüta, ngi raq tsangtitiim ma kiq akhamkuqha, ara mung ara mijii wan han. Lanta misiq wan han.

⁷ Ningkun shoqwiishoq maq srea nola ma jalaq. Ijaqshise Mosheq raq ümniima Thungtri kuqtaq kra, samheawiq maq jaqkhon tiipha shat maq shamlaq. Thungtri aming ka poshi min naqjinkiq. Kra riihaüla, ümniika ümbano kitlaü phanrap na ongwan ruq mirhaü.

⁸ Ara Thungtri lakdap bomtsi arka ümnübok wa ümtiikiimin tiimobaiq maimak. Ümniiraq ara lakdap arka ranaiq rawa sidi phat ruq phat ratlo. Kra riihaü jiitiq, ümniiraq Thungtri na chongtlaq kra phan phan jaqkhon apha maq misham lot haü. Kra riihaü jiitiq ümniika phanrap na chiithe lüwa ma mija haü. Kiimaq phanrap na ongwan ruq mirhaü.

⁹ Ngi raq ümchaü ümniima aming kuq tiikang. Ümniika ningkun shoqwiishoq maq srea nola ma jalaq; ümtiikiimin naqhaikiq kiimaq ümtsaiji naqtrankiq. Tatiwe üm Shiikeawe ka ümnaq ümbano kitlaü, kiijaq ümnaq rairai.”

Joshua Raq Rechap Wan Aming Kuqto

¹⁰ Kiijiishe, Joshua raq mung welabi ma

¹¹ piitiip mong na kilanta akha chongronglaq nguta aming tatto, “Tarii raq maiqmiimii lamsea tiije rong laq; shinap ranaiq she namshiq raq Jordan rai ka mijin han. Lanta Tatiwe, namshiq Shiikeawe raq kuqtlaq hiq kra mijii wan han. Lanta misiq wan han.”

¹² Kra raütiishe, Joshua raq Reuben phan nai Gad phan kiimaq Manase phan wa nokthiq kiima, akha aming kuqto,

¹³ “Tatiwe jaqshise Mosheq raq namshiq ma, ‘Namshiq Tatiwe, Shiikeawe raq namshiq ma ara Jordan rai maq shedong nü mung ara namshiq shong nga wan miitu mikuq,’ nguta chongtaq ira tsan na tiitsang ronglaq.

¹⁴ Krai mren, ümchaü min, namjamti nyungtiim, namsetiim nyungwe nosere thun ka, kiimaq nam nyamse kong thun ka, arjaqli misi. Shatmaq namshiq phenlabi ka, rekhat wa, namphu namno Israilnok ma sinkhu na, Jordan rai kra jin wan lanta lamshea waraatlo.

¹⁵ Arka Tati Shiikeawe raq tsangshiq ma Jordan rai maq shenyap nü mung kuqtaq kra mijii wan lot shaq wiiwii, mikhrum kuq han. Ümtiikiiwa apaiq raq Israilnok maiqphan tlotli ma, hiqshong khamli she kuqjiiq, kra jai miishetiq, namshiq ka, Tati Shiikeawe raq ajaqshi se Mosheq lümaq, Jordan rai maq shedong mung chumkuqtaq kiina jang wan nong lantiishe misi wan han.”

¹⁶ Kiijiishe tsangshiq raq Joshua bom ka akha treto, “Ümniiraq naishiq ma jamlai aming wa kuqtlaü, kra naishiq raq misham hai. Kiimaq ümniiraq naishiq ka ümriiba niiwa tiiki tlaü, kiijaq miki hai.

¹⁷ Naishiq raq Mosheq aming wranaiqshe lang wan kai, kra phan phan ümnaq aming kiimin milang wan hai. Kiimaq üm Tatiwe Shiikeawe raq Mosheq ka jamkho apaiq rai napshat siwantaq, kiikhiisii ümniirai min misi laq.

¹⁸ Jurwa ümwokhong na simak, kiimaq ümnaq aming tlea tlaq, kriiti ka atsea baiq ratlo. Ningkun shoqwiishoq riilaq kiimaq srea nola ma jalaq!”