DUNGWVNC 6 - ASII LAKDAP Bible (BSI)

¹ Kiijiishe Tatiwe raq Mosheq ma nguto, “Ümchaü Ngi raq hokhamwe khuthaq na jamlai jaq wa mishamha kriishe ümniiraq michhi haü. Ngi raq apaiq ka shiitep lata isenginok ka mitiiwa baiqha. Atiiwa baiq siika jawa michong. Ngi raq apaiq ka tiichop lata isenginok ka amungtan wa atiijo mirbaiqha.”

Shiikeawe Raq Mosheq Heato

² Shiikeawe raq Mosheq rai riibomto. Raüta akha nguto, “Ngi ka Tatiwe.

³ Ngi ka Abraham phana, Isak phana, kiimaq Jakob phana Ningkun Ajong Shiikeawe heshap maq riihumki kang. Shatmaq Ngi raq tsangshiq ma imang asii Tatiwe kra chonglatiika tiisap kuq mang dea.

⁴ Kiimaq Ngi raq tsangshiq rai itong min shong kang. Kra tongshong raükha kiqkham ka Ngi raq tsangshiq ma Kanan mung, tsangshiq wanshawe ma ja raüta shong wantaq kra tsangshiq ma mikuqha nguta kiqkham kuq kang.

⁵ Ümchaü Ngi raq Israilnok aho asii chamchao han-nyi trang tlaq kra tai kang she. Tsangshiq ka Ejipnok raq dikong ma rümtlo. Kiimaq Ngi raq tsangshiq rai tongshong raükha paq kang kra itsan na dongtlo.

⁶ Kra ningkhan Israilnok ma Ngi raq tsangshiq ma akha chongtiikang nguta chongkuqlaq, ‘Ngi ka Tatiwe; Ngi raq namshiq ka midok dawanha. Lata namshiq ka Ejipnok dikong sitlan kiiwa wasetiim miishe mitiija wanha. Ngi raq ijaq phum aheng honghea pinthum ara tsangshiq khuthaq niishe midoha. Lata phiiptsi chang chamchao mo ka tsangshiq ma mitiihoha. Lata Ngi raq namshiq ka mitiichhii kuqha.

⁷ Ngi raq namshiq ka isenginok shaq miishe mitiija wanha. Lata Ngi ka namshiq Shiikeawe miishe mija wanha. Kiimaq namshiq raq Ngi ka Tatiwe namshiq Shiikeawe nguta misap han. Arka ümtiikiiwa Ngi raq namshiq ka Ejip mung na dikong ma jatlan kriiwa dokda wan tiikang akhing niishe misap wan han.

⁸ Ngi raq namshiq ka Ngi raq sinkham ramkham tiibok lata, Abraham ma, Isak ma, kiimaq Jakob ma armung ara mikuq kang nguta kiqkham kuq kang, kra mung kiiniishe namshiq ka mishea wan kang. Kiimaq Ngi raq kra mung ka namshiq ma tachong hupsam miitu she mikuq kang. Ngi ka Tatiwe.’”

⁹ Mosheq raq arthun ara Israilnok ma chongkuqto. Shatmaq tsangshiq raq apaiq bom ka tai mak riito. Jamkhano ngukla tsangshiq tsaiji ka riitsi tsai tsiiq dikong rilung tiichamchaotlaq kra ningkhan ajomkaikun she riito.

¹⁰ Kiijiishe Tatiwe raq Mosheq ma thaüto,

¹¹ “Kilaq. Laüta Ejip mung hokhamwe ma apaiq raq Israilnok ka Ejip mungwa tiiwa baiq raa dongdii nguta chong kikiq.”

¹² Shatmaq Mosheq raq treto, “Israilnok riisintla ibom ka tairo mak, ikhiijiika hokhamwe raq ibom ka jaramshe wa mitai siq? Ngi ka ibom isa min tsin mang we, wepuq pinthum.”

¹³ Kiijiishe Tatiwe raq Mosheq nai Aron ma akha aming tatto: “Israilnok nai Ejip mung hokhamwe ma chonglaq, Ngi raq ümniima Israilnok ka Ejip mung arwa tsuq wan miitu aming kuq kang she nguta chongkuq laq.”

Mosheq Nai Aron Takhan Manphan Raüpot

¹⁴ Reuben ka Jakob se chhikhuwe. Asetiim ka weblai: Hanokh, Pallu, Hejron, kiimaq Karmi riito. Tsangshiq thun ka tsangta kaüwa weraü mangpon hoti tsangtitiim.

¹⁵ Kiimaq Simeon setiim ka maiqwesere wetrok: Jemuel, Jamin, Ohad, Jachin, Johar, kiimaq Shaul, tsangshiq ka Kanan phan shea alam kriisetiim. Tsangshiq thun ka tsangta kaüwa weraü mangpon hoti tsangtitiim.

¹⁶ Kiimaq Lewi setiim ka maiqwesere wetsam: Gershon, Kohath, kiimaq Merari. Tsangshiq thun ka tsangta kaüwa weraü mangpon hoti tsangtitiim. Lewi ka rawii 137 sito.

¹⁷ Gershon setiim ka wenai: Libni nai Shemei. Kiimaq tsangnai saüsetiim ka pahea.

¹⁸ Kiimaq Kohath setiim ka maiqwesere weblai: Amram, Ijhar, Hebron, kiimaq Ujjiel. Kohath ka rawii 133 sito.

¹⁹ Kiimaq Merari setiim ka maiqwese nai wenai: Mahli nai Mushi. Arthun arka Lewi saüse phan kaüwa weraü tsangta mang pon thun riito.

²⁰ Kiimaq Amram riika awe ma ano ashea nyung Jochebed lamto. Jochebed raq apaiq ma asenai Aron nai Mosheq humkuqto. Amram ka rawii 137 sito.

²¹ Kiimaq Ijhar setiim ka maiqwe sere wetsam: Kora, Nepheg, kiimaq Jichri.

²² Kiimaq Ujjiel setiim ka maiqwe sere wetsam: Mishael, Eljaphan, kiimaq Sithri.

²³ Aron raq Elisheba lamto. Apaiq ka Amminadab se kiimaq Nashon ma ano ashea nyung. Kriinyung raq apaiq ma asetiim ka Nadab, Abihu, Eleajar, kiimaq Ithamar humkuqto.

²⁴ Kora setiim ka wetsam: Assir, Elkana, kiimaq Abiasaph. Tsangshiq ka Kora phan wa kaüwa weraü tiikho wantaq kra mangpon hoti tsangtitiim.

²⁵ Aron se Eleajar raq Putiel setiim jechaksere phong wa nyungshi lamto. Kriinyung raq apaiq ma ase Phinehas humkuqto. Arthun kaüwa weraü mangpon thun arka Lewi phan wa.

²⁶ Aron nai Mosheq ma Tatiwe raq akha chongto, “Israilnok maiq phan thun ka Ejip mung wa shea wan ronglaq.”

²⁷ Tsangnai raq Ejip mung hokhamwe ma Israilnok ka kharü mong wa tiidonglaq nguta chongkuqto.

Tatiwe Raq Mosheq Nai Aron Ma Aming Kuqto

²⁸ Ümtiikiiwa Tatiwe raq Mosheq ma Ejip mung maq bom chongtaq,

²⁹ apaiq raq akha nguto, “Ngi ka Tatiwe. Ngi raq ümniima bom chongkuq kang kra wiita Ejip mung hokhamwe ma chonglaq.”

³⁰ Shatmaq Mosheq raq treto, “Ümniiraq asap haü, ngi ka ibom isa min tsin mang we, wepuq pinthum, hokhamwe raq ibom ka jaram wa mitai?”