AJONJÜ 4 - ASII LAKDAP Bible (BSI)

Re Raq Jiiwan Jai Jerusalemti Chamchaoto

¹ Nashiq chaq achhai anyii thun ka, mutmaqmaq she, Shomjam longpenkaü thun ka, chiiheawea lam na riiphongtlo.

² Jajon chelati jerobi ka, nashiq ma chaq ikha rahea riito. Shatmaq ümchaü san tsangshiq ka, hütihiqli hamlii takposetiim ikhli, shiinüm shatlo.

³ Ngamthaiq phan shekaü riimin, asetiim ka aheawiq pü raüta tiichhanchhitlo. Shatmaq, inok ita nyungre riika, wuthon kaü ngitlaq ikha, asetiim ka pinthum kiqlahiiphii maq, atsea ason li she riitlo.

⁴ Ase noshiisetiim ka anyungre raq, aramtsi miilishe tiihaü wan tlo. Noserekong ka tsang ramtsi ma, aphaqsea chang jaü poraki ikha aho anyi khumtlo. Shatmaq tü adung keti tsangshiq ma, jumin ahü.

⁵ Man na chiithejong phaq asea chamtraq siti, ümchaü tsangramtsi raq pitlang pitthea ahaü. Chiiheawea lam na riiphongtlo, Man na chiithe lüwabi kriimin, keathung na maiq raq, nyiipthop abaiq kra ritsea hükhea hiqkhea, tsangramtsi ma khumtlo.

⁶ Shiikeawe raq iphan imaq ka, Sodom chelati tiihanghiiq maq, tiithenbaiqtaq kriithaq na, tri atsin lin maq tsasha wanto. Raüta tiichamchaoto.

⁷ Na hokhamwesetiim kechu maiqsetiim, tingting kiimaq tsakhiiq ikha siirairai sekong riito. Kiimaq kuilang kuilakong riito. Kiimaq ahong ala siisaq riito.

⁸ Shatmaq ümchaü sanha, maiq raq jurmin sapmak she. Chiiheawea lam na majikaütiim ikha, tsangkhum tsanghan dea min, pe shin ikha ashin kaiwishe, ariirong li she.

⁹ Redong akhing na tsaiwanti thun ka, jai na atinkhan chamchao raüta tsaiti, thaq na kiim ahea lin. Jamkhano ngukla, jai na tsaiti ka ram raq ajam riiwan raüta, tsai wanto.

¹⁰ Iphan imaq ma thenjen wantaq kriika, pinthum riitsitsaitsiiq, phiiptsi chang abi pinthum riito. Noshii nyungre raq dongdii min, tsangse noshiisetiim ka tsanglang pit tsi ma, tak na lumphaqto.

¹¹ Tatiwe raq apaiq tsankhiq walü ka, pinthum hengbi tiikhiim chaqto. Apaiq raq Jajon chela ka, wakchaq wa khan maq chaqbaiqto.

¹² Mungkanghiq hokhambi thun raq, Jerusalem chela ka re raq mikhat baiq nguta, akam min kammak riito. Shatmaq rewe kumlao raq, Jerusalem chela kilü, limham limhok raüta nyap wanto.

¹³ Kriika shammibi ngarai nai ramwebi shut kha maq thento. Tsangshiq raq sephii nojii maiqheati, tiijai raübaiqto. Kriikha na thento.

¹⁴ Mungtubi ka makhü jaqhü ikha, bangram biimra chela lam na tiijaidali, tsangshiq han na jurmin thanki kham mak. Chiihea wea lam thun na mangmii raitlo.

¹⁵ “Tiijin rong! ashe ashi kra, tiijin rong! tiijin rong! namshiq ashe, idü na naq tiithan kiq,” nguta maiq raq tsangshiq jobaiqto. Krai mren tsangshiq ka, maiqmung mungshi na saühoho, ashong angachang hummak, momii wanto.

¹⁶ Tatiwe raq tsangshiq miitu, broriimak she, apaiq raq tsangshiq ka, pongmung na tiipin jobaiqto. Apaiq raq nashiq ramwebi nai mungtubi ma, shreng manto thiimak she.

¹⁷ Nashiq raq maktsi jaqtsi liikai, khrumtiwe walü, shatmaq atuli, Mung ashi raq mikhrum kuq nguta nashiq raq kheratkai ka atuli. Tsangshiq raq khrumkuqlot kak.

¹⁸ Re raq nashiq ka liishat khehoto, Nashiq kinphai na dongkai chang lam ahü riito. Nashiq rilung thumto she. Nashiq ningthoi saüwato.

¹⁹ Nashiq ka liihawe raq ra wang win maq ajolulu, wuphiim tlaq ikha jotlo. Tsangshiq raq kin thun kiimaq phanho raüta, rumnyangkhi na tiihanghiiq maq kaqhoto.

²⁰ Tsangshiq raq nashiq tsitsü raüchong laphoto, Tatiwe raq ashong na hokhamwe laphoto, nashiq khup wongketi, nashiq kamsea chang laphoto.

²¹ Edom mungti lei, kiimaq Uj mungti lei, namshiq ka naisiq rong laq, Chochisiq ronglaq tangtlan khan khan. Namshiq chamchao rahiq akhing minla, misaü wan she. Namshiq minla cheropwe ikha, naiqhü maq maiqthoda holanta michamchao han.

²² Jajon chela raq apaiq ngarai tham ka, athii tsinhea maq dokda wanto, Tatiwe raq nashiq ka pongmung na, shumwi ma rahiq luhea tiisimak she. Shatmaq Edom mungti lei, Tatiwe raq namshiq ka mitiichamchao. Apaiq raq ümngarai bu ka, wiita mitiichhikuq wan. Raüta mitiichamchao wan.