Mikea 6 - BIBELE

Morena o qosa Baiseraele

¹ Mamelang seo Morena a se bolelang: “Emang le behe nyewe ya lona, le e behe kapele ho dithaba, maralla a ke a utlwe boipiletso ba lona.

² Lona dithaba, mamelang qoso ya Morena; lona metheo ya lefatshe, sekehang tsebe. Lona metheo e tiileng sekehang tsebe. Morena o qosa setjhaba sa hae, Morena o tsekisana le Baiseraele.

³ “Lona tjhaba sa ka ebe ke le entseng? Ke le imeditse kang? Nkarabeng hle!

⁴ Ke ile ka le ntsha naheng ya Egepeta, ka le lopolla naheng ya bokgoba. Ka romela Moshe ho le etella pele, ka mo romela a ena le Arone le Meriama.

⁵ Lona tjhaba sa ka, hopolang morero wa Balake, morero wa Balake, kgosi ya Moabe, le hopole le karabo ya Bileame, mora wa Beore. Hopolang le lona leeto la lona la ho tloha Shitime ho ya Gilegale, le tle le tsebe ketso tse pholosang tsa Morena.”

Seo Morena a se batlang

⁶ Ke tla tla ke nkile eng ha ke eya ho Morena? Ke tla obama jwang kapele ho Ya Hodimodimo? Na ke tla fihla ke nkile nyehelo ya setjheso, ke nkile nyehelo ya manamane a selemo?

⁷ Na Morena o tla kgahlwa ke kete tsa dipheleu, a kgahlwe ke nyehelo ya ole e ngatangata? Na ke tla nyehela ka ngwanaka wa matsibolo, ke nyehele ka yena ka baka la tshito tsa ka, ke nyehele ka ngwanaka wa matswathaka, ke nyehele ka yena ka baka la sebe sa ka?

⁸ Wena motho, o boleletswe se molemo; ebe Morena o lebeletse eng ho wena? Ke ho etsa tse lokileng, le ho ba le lerato, le ho ikokobeletsa Modimo wa hao.

Molato wa Baiseraele le kotlo ya bona

⁹ Ya bohlale o tshaba lebitso la Morena. Morena o ipiletsa ho motse, o re: “Lona tjhaba se phuthehileng, se phuthehetseng mona, mamelang!

¹⁰ Na nka iphapanyetsa matlotlo a bolotsana, le dikala tse qhekanyetsang, tse rohakehileng?

¹¹ “Na ke tla lokolla ya nang le sekala se qhekanyetsang? Ke lopolle ya nang le sekala sa bolotsana, eo boima ba mokotla wa hae bo sa nepahalang?

¹² “Barui ba lona ke banna ba sehloho; tjhaba sa lona ke batho ba leshano, maleme a bona ke maleme a thetsang.

¹³ Kahoo ke se ke qadile ho le otla, ke le timetsa ka baka la dibe tsa lona.

¹⁴ Le tla ja, empa le ke ke la kgora! Le tla sala le ntse le lapile jwalo. Le tla ba le mahlaba a pelehi, empa bana bona le ke ke la ba beleha; esita leha le ka beleha bana, bana bao ke tla ba bolaya ka sabole.

¹⁵ “Le tla jala, empa le ke se kotule letho; le tla tlhotla tholwana tsa mohlwaare, empa le ke se itlotse ka ole ya tsona; le tla tlhotla tholwana tsa morara, empa le ke se nwe veine ya tsona.

¹⁶ Ditaelo tsa Omeri le di phethile, le mesebetsi yohle ya ntlo ya Akabe, dikeletso tsa bona le ile la di latela; ka baka leo, ke tla le timetsa, tjhaba sa lona ke se fetole sesomo, sekgobo sa baditjhaba le se jare jwalo.”