Joshua 12 - Sesotho 1909/1961 (SO)

Marena a hlotsweng.

¹ Ke ana marena a lefatshe la Kanana, ao bana ba Iseraele ba a hlotseng, ba ruileng naha tsa wona mose wane wa Jordane, ka nqa botjhabatsatsi, ho tloha nokeng ya Arnone, ho isa thabeng ya Hermone, hammoho le lehwatata lohle nqa botjhabatsatsi.

² Ke Sihone, morena wa Baamore, ya neng a ahile Heshbone; o ne a busa naha ho tloha Aroere, o lebopong la noka ya Arnone, mahareng a sekgutlo, le sekoto se seng sa Gileade, ho isa molapong wa Jabboke, e leng moedi wa bana ba Ammone.

³ O ne a buse le lehwatata ho isa letsheng la Kinnerethe, ka nqa botjhabatsatsi, le ho isa Lewatleng la Lehwatata, e leng Lewatle la Letswai, nqa botjhabela, tseleng e yang Bethe-Jeshimothe, le nqa borwa, ho isa tlasa matswapo a Pisga.

⁴ Ba rua le naha ya Oge morena wa Bashane, ya neng a setse wa Baefraime ba ahileng Ashtarothe le Edrei;

⁵ o ne a busa thaba ya Hermone, le Salka, le Bashane kaofela, ho isa naheng ya Bageshure, le Bamaakathe, le sekoto se seng sa Gileade, moedi wa Sihone, morena wa Heshbone.

⁶ Ke bona bao Moshe, mohlanka wa Jehova, le bana ba Iseraele ba neng ba ba hlotse; Moshe, mohlanka wa Jehova, a nea fatshe leo ho Barubene, le ho Bagade, le ho ba mothapo o mong wa leloko la Manasse, hore ba le rue.

⁷ Ke ana marena a hlotsweng ke Joshua le bana ba Iseraele mose o kwano wa Jordane, nqa bophirimela, ho tloha Baale-Gade, sekgutlong sa Lebanone, ho isa thabeng e phollatsi e nyolosetsang Seire; fatshe leo Joshua a le nea meloko ya Baiseraele hore e be lefa la bona ka methapo ya bona;

⁸ dithaba, le dikgutlo, le mahwatata, le maralla, le lefeela, le naha e ka nqa borwa; e leng lefatshe la Bahethe, le la Baamore, le la Bakanana, le la Baferese, le la Baheve, le la Bajebuse.

⁹ Morena wa Jeriko ke e mong; e mong, ke morena wa Ai, o haufi le Bethele;

¹⁰ morena wa Jerusalema ke e mong; e mong hape, ke morena wa Hebrone;

¹¹ e mong, ke morena wa Jarmuthe; e mong, ke morena wa Lakishe;

¹² e mong, ke morena wa Eglone; e mong, ke morena wa Gesere;

¹³ morena wa Debire ke e mong; e mong, ke morena wa Gedere;

¹⁴ e mong, ke morena wa Horma; e mong hape, ke morena wa Arade;

¹⁵ e mong ke morena wa Libna; e mong, ke morena wa Adullame;

¹⁶ e mong, ke morena wa Makkeda; e mong, ke morena wa Bethele;

¹⁷ morena wa Tappua ke e mong; e mong, ke morena wa Hefere;

¹⁸ morena wa Afeke ke e mong; e mong, ke morena wa Lasharone;

¹⁹ e mong, ke morena wa Madone; e mong, ke morena wa Hatsore;

²⁰ e mong, ke morena wa Shimrone-Merone; e mong, ke morena wa Aksafe;

²¹ e mong, ke morena wa Taanake; e mong, ke morena wa Megiddo;

²² e mong hape, ke morena wa Kedeshe, e mong hape, ke morena wa Jokneame, wa Karmele;

²³ e mong, ke morena wa Dore, naheng ya Dore; e mong hape, ke morena wa Gojime, pela Gilgale;

²⁴ e mong, ke morena wa Thirtsa; marena ao wohle a mashome a mararo a motso o mong.