Nahum 2 - Bibl Koad 21: Ar Bibl e Brezhoneg evit ar VretonedPennad 2 1 An distrujer a zeu a-enep dit, diwall ar c'hreñvlec'h, evesha an hent, nerzheka da zivgroazell, dastum da holl nerzhoù. 2 Rak an AOTROU a adsav gloar Jakob, evel gloar Israel, dre m'o deus he skrapet ar skraperien, ha m'o deus distrujet o skodoù-gwini. 3 Skoed e dud nerzhus a zo ruz, an dud kadarn a zo gwisket e ruz-mouk, houarn ar c'hirri a lugern d'an deiz ma'z int kempennet, hag ar goafioù a zo keflusket. 4 Ar c'hirri a red gant fulor er straedoù, en em deurel a reont war al leurennoù, ouzh o gwelout ez int evel flammerennoù, redek a reont evel luc'hed. 5 Soñj en devo eus e dud kadarn, met brañsellat a raint e-pad o c'herzh. Hastañ a raint etrezek ar voger, kempennet e vo an difenn… 6 Dorojoù ar sterioù a zo digoret, hag ar palez a gouezh. 7 Graet eo! Lakaet eo en noazh, kaset eo kuit. Hag he mitizhien a huanad evel mouezhioù koulmed, en ur skeiñ war o bruched. 8 Abaoe ma oa bet savet Ninive, e oa evel ur stank leun a zour… Tec'hout a reont… Arsavit! Arsavit!... Met den na zistro. 9 Skrapit an arc'hant! Skrapit an aour! Rak n'eus diwezh ebet d'ar pinvidigezhioù, ur fonnusted a bep seurt traoù prizius 10 Skrapadeg, reuz, distruj! Ar galon a deuz, an daoulin a gren, an divgroazell a zo er glac'har, hag an holl dremmoù a zroukliv. 11 Pelec'h emañ toull al leoned, pelec'h emañ peurvan al leoned yaouank, al lec'h ma en em denne ennañ al leon, al leonez, ha re vihan al leon, hep ma teue den d'o spontañ? 12 Al leon a ziframme evit e re vihan, tagañ a rae evit e leonezed, leuniañ a rae a breizhoù e doulloù, hag a gorfoù drailhet e gavarnioù. 13 Setu em eus droug ouzhit, eme AOTROU an armeoù, lakaat a rin an tan ez kirri, hag ez aint e moged, ar c'hleze a lonko da leoned yaouank, tennañ a rin eus ar vro da breizh, ha ne vo ken klevet mouezh da gannaded. |