Jeremiaz 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Kit da bourmen dre straedoù Jeruzalem, sellit, eveshait, klaskit war al leurennoù, mar kavit un den, unan hepken, oc'h ober ar reizhder hag o klask ar wirionez, e pardonin dezhi.

² Zoken pa lavaront: Bev eo an AOTROU! e gaou eo e touont.

³ AOTROU! Ha n'eo ket ouzh ar wirionez e sell da zaoulagad? Skoet ec'h eus warno, ha n'o deus poan ebet. Kuzumiñ a rez anezho, ha ne fell ket dezho degemer ar gentel. Kaledet o deus o dremm muioc'h eget ur roc'h, ha nac'het o deus distreiñ.

⁴ Lavaret em eus: N'eo nemet ar re-vihan en em ziskouez diskiant, rak n'anavezont ket hent an AOTROU.

⁵ Mont a rin etrezek ar re vras da gomz outo, rak int a anavez hent an AOTROU ha barnedigezh o Doue. Met int ivez o deus torret ar yev ha dispennet an ereoù!

⁶ Setu perak leon ar c'hoad a lazh anezho ha bleiz ar gouelec'h o distruj; al loupard a zo war-c'hed a-enep o c'hêrioù, an neb a zeuio er-maez diouto a vo lonket, rak kresket o deus o disentidigezh ha kennerzhet o dianzavadur.

⁷ Perak e pardonin dit? Da vibien o deus va dilezet, hag e touont dre ar pezh n'eo ket doue. Me am eus roet dezho o gwalc'h, hag o deus graet avoultriezh, aet int a-vernioù da di ar c'hast.

⁸ Bez' ez int evel kezeg war o gwalc'h o redek amañ hag ahont, pep hini o c'hwirinat war-lerc'h gwreg e nesañ.

⁹ Ha ne gastizin ket evit an traoù-se, eme an AOTROU, ha n'en em veñjo ket va ene eus un hevelep broad?

¹⁰ Pignit war he mogerioù ha diskarit anezho, met na gasit ket an distruj da benn, lamit ar brankoù-se rak n'int ket d'an AOTROU.

¹¹ Rak ti Israel ha ti Juda a zo en em renet evel trubarded em c'heñver, eme an AOTROU.

¹² Dinac'het o deus an AOTROU, hag o deus lavaret: N'eo ket eñ! An droug ne zeuio ket warnomp, ne welimp nag ar c'hleze nag ar gernez.

¹³ Ar brofeded n'int nemet avel, ha n'eus komz ebet enno. Ra vo graet dezho evel-se.

¹⁴ Setu perak evel-henn e komz an AOTROU, Doue an armeoù: Peogwir hoc'h eus disklêriet ar gomz-mañ, e lakain va c'homzoù da vezañ un tan ez kenoù, hag ar bobl-mañ da vezañ koad a vo pulluc'het gantañ.

¹⁵ Setu, e tegasin a-enep deoc'h ur vroad eus a-bell, ti Israel, eme an AOTROU. Ur vroad c'halloudus eo, ur vroad kozh, ur vroad n'anavezi ket he yezh ha na glevi ket ar pezh a lavaro.

¹⁶ He c'hlaouier-biroù a vo evel ur bez digor, holl ez int tud kalonek.

¹⁷ Lonkañ a raio da eost ha da vara, lonkañ a raio da vibien ha da verc'hed, lonkañ a raio da zeñved ha da ejened, lonkañ a raio da winienn ha da wezenn-fiez, distrujañ a raio gant ar c'hleze da gêrioù kreñv ma fizies enno.

¹⁸ Koulskoude en deizioù-se, eme an AOTROU, ne gasin ket an distruj da benn.

¹⁹ Hag e lavarint: Perak en deus an AOTROU hon Doue graet an holl draoù-se deomp? Hag e lavari dezho: Evel ma hoc'h eus va dilezet ha ma hoc'h eus servijet doueoù estren en ho pro, evel-se e servijot diavaezidi en ur vro na vo ket deoc'h.

²⁰ Roit da anavezout kement-mañ da di Jakob, henn embannit e Juda, en ur lavarout:

²¹ Selaou eta kement-mañ, pobl sot ha diboell: Daoulagad hoc'h eus ha ne welit ket, divskouarn hoc'h eus ha ne glevit ket.

²² Ha ne zoujot ket ac'hanon, eme an AOTROU, ha ne grenot ket dirazon? Me am eus lakaet an traezh evel harz d'ar mor, dre ur reolenn beurbadus na dremeno ket. E goummoù a fiñv met dic'halloud int, krozal a reont met ne dremenint ket dreist.

²³ Met ar bobl-mañ he deus ur galon amjestr ha disent, aet int war adreñv, aet int kuit.

²⁴ Ne lavaront ket en o c'halon: Doujomp eta an AOTROU hon Doue, eñ hag a ro glav ar c'hentañ hag an diwezhañ amzer, hag a vir evidomp ar sizhunioù merket evit an eost.

²⁵ Ho tireizhder en deus pellaet ar roidigezhioù-se, ho pec'hedoù o deus forc'het ac'hanoc'h eus ar madoù-se.

²⁶ Rak en em savet eo em fobl tud drouk a spi evel al labousetaer hag a stegn antelloù, bantañ a reont pejoù hag e tapont tud.

²⁷ Evel m'eo ur gaoued leun a laboused, ez eo o ziez leun a douell. Evel-se eo ez int deuet da vezañ bras ha pinvidik.

²⁸ Lartaet int hag e lugernont. Aet int dreist oberoù ar re zrouk, ne zifennont ket ar gwir, gwir an emzivad, hag e reont berzh. Ne lakaont ket da dalvezout gwirioù ar beorien.

²⁹ Ha ne gastizin ket evit an traoù-se, eme an AOTROU, ha n'en em veñjo ket va ene eus un hevelep broad?

³⁰ Un dra c'hlac'harus hag euzhus a c'hoarvez er vro:

³¹ Ar brofeded a brofed gevier, an aberzhourien a ren drezo, ha va fobl he deus kavet plijadur e kement-se. Petra a reot pa zeuio an diwezh?