Adlezenn 29 - Bibl Koad 21: Ar Bibl e Brezhoneg evit ar Vretoned

Pennad 29 An emglev adnevezet

¹ Setu komzoù an emglev en deus gourc'hemennet an AOTROU da Voizez ober gant mibien Israel e bro Voab, en tu-hont d'an emglev en doa graet ganto en Horeb.

² Moizez a zastumas holl Israel hag a lavaras: Gwelet hoc'h eus kement en deus graet an AOTROU dirak ho taoulagad e bro Ejipt, da Faraon, d'e holl servijerien ha d'e holl vro,

³ an amprouennoù bras en deus gwelet da zaoulagad, ar sinoù hag ar burzhudoù bras.

⁴ Met an AOTROU n'en deus ket roet deoc'h ur galon evit kompren, na daoulagad evit gwelout, na divskouarn evit klevout, betek hiziv.

⁵ Da renet em eus daou-ugent vloaz er gouelec'h, da zilhad ne voent ket uzet warnout ha da votoù ne voent ket uzet war da dreid,

⁶ n'hoc'h eus ket debret bara, n'hoc'h eus ket evet gwin nag evajoù kreñv, evel-se hoc'h eus anavezet penaos on me an AOTROU ho Toue.

⁷ Deuet oc'h el lec'h-mañ; Sihon roue Hesbon hag Og roue Basan a zeuas a-ziarbenn deomp evit stourm ouzhimp, hag hon eus pilet anezho.

⁸ Kemeret hon eus o bro hag he roet hon eus da hêrezh d'ar Rubeniz, d'ar C'hadiz ha da hanter-veuriad Manase.

⁹ Mirout a reot komzoù an emglev-mañ hag e reot diouto, evit ober berzh e kement a reot.

¹⁰ En em gavit holl hiziv dirak an AOTROU ho Toue, pennoù ho meuriadoù, hoc'h henaourien, hoc'h ofiserien, holl wazed Israel,

¹¹ ho pugale, ho kwragez, da ziavaeziad a zo e-barzh da gamp, adalek da faouter koad betek da denner dour,

¹² evit mont e-barzh emglev an AOTROU da Zoue, a ra gant le an AOTROU da Zoue ganit hiziv,

¹³ a-benn lakaat ac'hanout hiziv evel e bobl, hag eñ a vo da Zoue, evel m'en deus lavaret dit hag evel m'en deus touet da'z tadoù, da Abraham, da Izaak ha da Jakob.

¹⁴ N'eo ket ganeoc'h hepken e ran an emglev-mañ gant le,

¹⁵ met gant an hini en em ziskouez amañ ganeomp hiziv dirak an AOTROU hon Doue, ha gant an hini n'emañ ket amañ ganeomp hiziv.

¹⁶ C'hwi a oar penaos ez omp bet o chom e bro Ejipt ha penaos hon eus tremenet dre ar broadoù hoc'h eus treuzet.

¹⁷ Gwelet hoc'h eus o zraoù euzhus hag o doueoù, koad, maen, arc'hant, aour, a zo en o zouez.

¹⁸ Ra ne vo ket en ho touez na den, na gwreg, na tiegezh, na meuriad, a zistrofe e galon hiziv diouzh an AOTROU hon Doue evit mont da servijañ doueoù ar broadoù-se. Ra ne vo en ho touez gwrizienn ebet da reiñ ampoezon pe huelenn-c'hwerv.

¹⁹ An hini a glevfe komzoù ar vallozh-se hag en em vennigfe en e galon o lavarout: Peoc'h am bo pa gerzhin e c'hoantadoù va c'halon, o stagañ ar vezventi ouzh ar sec'hed,

²⁰ an AOTROU ne fello ket dezhañ pardoniñ d'an den-se, met kounnar an AOTROU hag e warizi en em dano en e enep, an holl vallozhioù skrivet el levr-mañ a bouezo warnañ, hag an AOTROU a lamo e anv a-zindan an neñvoù.

²¹ An AOTROU a zispartio anezhañ diouzh holl veuriadoù Israel evit e walleur, hervez an holl vallozhioù skrivet e levr al lezenn-mañ.

²² Ar rummoù da zont, ho mibien a savo war ho lerc'h hag an diavaeziad a zeuio eus ur vro bell, a welo goulioù ar vro-mañ, ar c'hleñvedoù en devo an AOTROU kaset enni,

²³ soufr, holen hag entanadur a vo en holl vro, penaos ne vo ket hadet, ne ziwano netra ha ne gresko tamm geot ebet, evel pa voe diskaret Sodom, Gomora, Adma, Zeboim, a zistrujas an AOTROU en e gounnar hag en e fulor,

²⁴ hag an holl bobloù a lavaro: Perak en deus an AOTROU graet evel-se d'ar vro-mañ? Perak taerded ar fulor bras-se?

²⁵ Hag e vo respontet: Dre m'o deus dilezet emglev an AOTROU, Doue o zadoù, en doa graet ganto p'en deus tennet anezho eus bro Ejipt,

²⁶ ha ma'z int aet da servijañ doueoù all ha da stouiñ dirazo, doueoù n'anavezent ket ha n'en doa ket roet dezho da lodennañ.

²⁷ Kounnar an AOTROU a zo en em danet a-enep ar vro-mañ, evit lakaat da zont warni an holl vallozhioù skrivet el levr-mañ.

²⁸ An AOTROU en deus tennet anezho eus o douar, gant kounnar, fulor ha brouez bras, hag en deus o zaolet en ur vro all, evel ma weler hiziv.

²⁹ An traoù kuzhet a zo d'an AOTROU hon Doue, met an traoù diskuliet a zo deomp ha d'hor mibien da viken, evit ma raimp diouzh holl gomzoù al lezenn-mañ.