Adlezenn 20 - Bibl Koad 21: Ar Bibl e Brezhoneg evit ar Vretoned

Pennad 20 Ar brezel

¹ Pa'z i d'ar brezel a-enep da enebourien, hag e weli kezeg, kirri hag ur bobl niverusoc'h egedout, na'z po ket aon razo, an AOTROU da Zoue a vo ganit, eñ hag en deus graet dit pignat eus bro Ejipt.

² Pa dostaiot evit ar brezel, an aberzhour a zeuio a-raok hag a gomzo ouzh ar bobl.

³ Lavarout a raio: Selaou, Israel! Mont a reot hiziv d'ar brezel a-enep hoc'h enebourien. Na lezit ket ho kalon da vezañ trubuilhet, n'ho pet ket aon, na grenit ket, na vezit ket spontet dirazo,

⁴ rak an AOTROU ho Toue a gerzh ganeoc'h da vrezeliñ evidoc'h a-enep hoc'h enebourien, evit salviñ ac'hanoc'h.

⁵ An ofiserien a gomzo ouzh ar bobl o lavarout: Piv en deus savet un ti nevez ha n'en deus ket digoret anezhañ? Ra yelo kuit ha ma tistroio d'e di, gant aon na varvfe er brezel ha na zigorfe unan all anezhañ.

⁶ Piv en deus plantet ur winienn ha n'en deus ket dastumet frouezh kentañ anezhi? Ra yelo kuit ha ma tistroio d'e di, gant aon na varvfe er brezel ha na zeufe unan all da zastum ar frouezh kentañ.

⁷ Piv a zo prometet e dimeziñ da ur wreg ha n'en deus ket he dimezet? Ra yelo kuit ha ma tistroio d'e di, gant aon na varvfe er brezel ha na zimezfe unan all ganti.

⁸ An ofiserien a gendalc'ho da gomz ouzh ar bobl o lavarout: Piv en deus aon hag a zo digalon? Ra yelo kuit ha ma tistroio d'e di, gant aon na zeufe kalonoù e vreudeur da deuziñ evel e hini.

⁹ P'o devo echuet an ofiserien da gomz ouzh ar bobl, e lakaint kabitened al lu e penn ar bobl.

¹⁰ Pa dostai ouzh ur gêr evit he c'hemer, e kinnigi dezhi ar peoc'h.

¹¹ Ma ra dit ur respont a beoc'h ha ma tigor dit, an holl bobl a vo kavet enni a vo truajidi dit, hag e servijint ac'hanout.

¹² Ma ne ra ket peoc'h ganit met ma ra ar brezel ouzhit, neuze e sezizi anezhi.

¹³ An AOTROU da Zoue a lakaio anezhi etre da zaouarn, hag e lazhi an holl wazed gant troc'h ar c'hleze.

¹⁴ Kemer a ri hepken evidout ar gwragez, ar vugaligoù, al loened ha kement a vo e kêr, hec'h holl ziwisk, hag e tebri diwisk da enebourien en devo roet an AOTROU da Zoue dit.

¹⁵ Evel-se e ri d'an holl gêrioù a zo pell diouzhit ha n'int ket kêrioù ar broadoù-mañ.

¹⁶ Met e kêrioù ar pobloù-mañ a ro dit an AOTROU da Zoue evel hêrezh, ne lezi da vevañ netra eus ar pezh en deus c'hwezh ennañ.

¹⁷ Lakaat a ri anezho da verz: an Hitited, an Amoreaned, ar Gananeiz, ar Ferezianed, an Hevianed, ar Jebuziz, evel m'en deus gourc'hemennet an AOTROU da Zoue,

¹⁸ evit na zeskint ket deoc'h ober an holl euzhusted a reont e-keñver o doueoù, ha na bec'hot ket a-enep an AOTROU ho Toue.

¹⁹ Pa sezizi ur gêr e-pad pell amzer, oc'h ober brezel outi evit he c'hemer, ne zistruji ket he gwez gant toalioù bouc'hal, met diouto e tebri ha n'o zroc'hi ket, rak gwezenn ar parkeier, hag un den eo evit bezañ sezizet ganit?

²⁰ Koulskoude e tistruji hag e troc'hi ar gwez ma c'houzout n'int ket gwez o reiñ boued; hag e savi ganto ramparzhioù a-enep ar gêr a rez outi brezel, betek ma kouezho.