Adlezenn 17 - Bibl Koad 21: Ar Bibl e Brezhoneg evit ar Vretoned

Pennad 17

¹ N'aberzhi ket d'an AOTROU da Zoue ur c'hole pe un oan en defe ur si bennak pe a vefe distumm, rak un euzhusted e vefe d'an AOTROU da Zoue.

² Pa en em gavo ez kreiz, en unan eus ar c'hêrioù a roio an AOTROU da Zoue dit, un den pe ur wreg hag a raio ar pezh a zo drouk dirak daoulagad an AOTROU da Zoue, o terriñ e emglev,

³ o vont war-lerc'h doueoù all o servijañ anezho hag o stouiñ dirazo, dirak an heol pe dirak al loar pe dirak holl arme an neñv, ar pezh ne'm eus ket gourc'hemennet,

⁴ pa vo lavaret-se dit hag ez po klevet diwar-benn an dra-se, e reni un enklask gant evezh. Mard eo gwir ha sur ar pezh a vo bet lavaret, un euzhusted a vo bet graet en Israel,

⁵ e lakai da zont ouzh da zorojoù an den pe ar wreg a vo kablus da vezañ graet-se, hag e veinatai an den pe ar wreg d'ar marv.

⁶ War gomz daou dest pe dri dest e vo lakaet d'ar marv an hini a zle mervel. Ne vo ket lakaet d'ar marv war gomz un test hepken.

⁷ Dorn an testoù a vo warnañ da gentañ evit e lakaat d'ar marv, ha dorn an holl bobl goude. Evel-se e vo lamet an droug diouzh da greiz.

⁸ Pa vo un dra re ziaes da varn evidout, etre gwad ha gwad, etre rendael ha rendael, etre gouli ha gouli, enebiezh e-barzh da zorojoù, e savi hag e teui d'al lec'h dibabet gant an AOTROU da Zoue,

⁹ hag ez i da gavout an aberzhourien, al Levited, etrezek an hini a vo barner en deizioù-se, hag e c'houlenni kuzul, hag e tisklêrint dit setañs ar varn.

¹⁰ Hag e ri evel ma vo bet disklêriet dit el lec'h dibabet gant an AOTROU, hag e viri an holl draoù a vo bet kelennet dit hag e ri diouto.

¹¹ Ober a ri hervez setañs al lezenn o devo kelennet dit hag hervez ar varnedigezh o devo disklêriet dit; ne zistroi ket eus ar setañs o devo lavaret, nag a-zehou nag a-gleiz.

¹² An den a raio gant lorc'h ha na selaouo ket an aberzhour en em zalc'ho eno evit servijañ an AOTROU da Zoue, pe na selaouo ket ar barner, an den-se a varvo, hag evel-se e vo lamet an droug diouzh Israel,

¹³ evit ma klevo ha ma toujo an holl bobl, ha na savint ken dre ourgouilh.

¹⁴ Pa vi aet er vro a ro dit an AOTROU da Zoue da berc'hennañ hag e vi o chom enni, e lavari: Me a lakaio ur roue warnon evel an holl bobloù a zo en-dro din;

¹⁵ aketus e vi da lakaat warnout ur roue en devo dibabet an AOTROU da Zoue; lakaat a ri warnout ur roue a-douez da vreudeur, ne c'helli ket lakaat warnout un diavaeziad na vefe ket da vreur.

¹⁶ Ne vo ket dezhañ un niver bras a gezeg, ha ne zegaso ket ar bobl en-dro d'an Ejipt evit kreskiñ niver ar c’hezeg, rak an AOTROU en deus lavaret deoc'h: Ne zistroit ken dre an hent-se.

¹⁷ Ne vo ket dezhañ kennebeut un niver bras a wragez, gant aon na zeufe e galon d'en em zistreiñ, ha ne vo ket dezhañ kalz a arc'hant hag a aour.

¹⁸ Adalek ma vo azezet war dron e rouantelezh, e skrivo evitañ e-unan en ul levr un eilad eus al lezenn-mañ, en devo digant an aberzhourien, al Levited.

¹⁹ Hemañ a vo gantañ hag e lenno ennañ holl zeizioù e vuhez, evit ma tesko doujañs an AOTROU e Zoue, o virout holl gomzoù al lezenn-mañ hag e holl reolennoù hag oc'h ober diouto.

²⁰ E galon ne savo ket dreist e vreudeur, ha ne zistroio ket eus ar gourc'hemennoù nag a-zehou nag a-gleiz, evit ma vo hiraet e zeizioù en e rouantelezh, dezhañ ha d'e vibien, e-touez Israel.