Adlezenn 16 - Bibl Koad 21: Ar Bibl e Brezhoneg evit ar Vretoned

Pennad 16 Ar Pask. Gouel ar sizhunioù. Gouel al logelloù. Ar varnerien hag an ofiserien

¹ Mirout a ri miz Abib hag e ri ar Pask d'an AOTROU da Zoue, rak e miz Abib eo en deus tennet ac'hanout an AOTROU da Zoue eus bro Ejipt, da noz.

² Aberzhiñ a ri ar Pask d'an AOTROU da Zoue, da loened bras ha bihan, el lec'h en devo dibabet an AOTROU evit lakaat e anv da chom ennañ.

³ Ne zebri ket bara goet; e-pad seizh devezh e tebri bara hep goell, bara ar glac'har, rak aet out kuit buan eus bro Ejipt; evel-se e vo evit ma ez po soñj eus an deiz ma'z out aet kuit eus bro Ejipt, holl zeizioù da vuhez.

⁴ Ne vo ket gwelet goell ez ti e-barzh da holl zouar e-pad seizh devezh, ha ne dremeno ket an noz betek ar mintin ar c'hig aberzhet d'abardaez er c'hentañ deiz.

⁵ Ne c'helli ket aberzhiñ ar Pask en ur gêr bennak eus al lec'hioù a roio dit an AOTROU da Zoue,

⁶ met el lec'h en devo dibabet an AOTROU da Zoue evit lakaat e anv da chom ennañ ec'h aberzhi ar Pask, d'abardaez, adalek ma vo kuzhet an heol, d'an ampoent ma'z aes kuit eus an Ejipt.

⁷ E boazhañ hag e zebriñ a ri el lec'h dibabet gant an AOTROU da Zoue. Diouzh ar beure e tistroi hag ez i da'z teltennoù.

⁸ E-pad c'hwec'h devezh e tebri bara hep goell. D'ar seizhvet deiz, ho po ur vodadeg veur d'an AOTROU, ne ri labour ebet.

⁹ Kontañ a ri seizh sizhun; adalek ma vo kroget gant ar falz en edeier, en em lakai da gontañ ar seizh sizhun-se,

¹⁰ hag e ri gouel ar sizhunioù d'an AOTROU da Zoue, o kinnig eus da zorn ur prof a-youl-vat, hervez m'en devo benniget ac'hanout an AOTROU da Zoue.

¹¹ Hag e laouenai dirak an AOTROU da Zoue, te, da vab, da verc'h, da servijer, da vatezh hag al Leviad a vo e-barzh da zorojoù, an diavaeziad, an emzivad hag an intañvez a vo ez touez, el lec'h en devo dibabet an AOTROU da Zoue evit lakaat e anv da chom ennañ.

¹² Dalc'h soñj ez out bet sklav e bro Ejipt, mirout a ri ar reolennoù-mañ hag e ri diouto.

¹³ Ober a ri gouel al logelloù e-pad seizh devezh, pa ez po dastumet frouezh da leur ha da waskell.

¹⁴ Hag e laouenai oc'h ober ar gouel, te, da vab, da verc'h, da servijer, da vatezh, al Leviad, an diavaeziad, an emzivad hag an intañvez a vo e-barzh da zorojoù.

¹⁵ E-pad seizh devezh e ri ar gouel d'an AOTROU da Zoue el lec'h dibabet gant an AOTROU, rak an AOTROU da Zoue a vennigo ac'hanout ez holl eostoù hag e kement a ri gant da zaouarn, hag e vi leun a levenez.

¹⁶ Teir gwech er bloaz, pep gwaz ac'hanoc'h en em gavo dirak an AOTROU ho Toue, el lec'h dibabet gantañ, da ouel ar bara hep goell, da ouel ar sizhunioù ha da ouel al logelloù, ha n'en em ziskouezo ket er c'houllo dirak an AOTROU.

¹⁷ Pep hini a roio hervez ar pezh en devo, hervez ar vennozh en devo roet dezhañ an AOTROU da Zoue.

¹⁸ Lakaat a ri barnerien hag ofiserien en holl c'hêrioù a roio an AOTROU da Zoue dit, hervez da veuriadoù. Hag e tougint barnedigezhioù reizh d'ar bobl.

¹⁹ Ne wei ket ar barnedigezhioù, ne ri van eus diavaez an dud, ne zegemeri ket donezonoù, rak an donezonoù a zall daoulagad ar re fur hag a vrein komzoù ar re reizh.

²⁰ Heuliañ a ri gant evezh ar reizhder, evit ma vevi ha ma perc'henni ar vro a ro dit an AOTROU da Zoue.

Arabat mont war-lerc'h doueoù all. Al lez-varn. Ar roue

²¹ Ne blanti ket a ashera e koad e-kichen an aoter a savi d'an AOTROU da Zoue.

²² Ne savi skeudenn ebet, ar pezh a gasa an AOTROU da Zoue.