2 Samuel 8 - Bibl Koad 21: Ar Bibl e Brezhoneg evit ar Vretoned

Pennad 8

¹ Goude-se, David a drec'has ar Filistined hag a izelaas anezho, hag e tapas stur o c'hêr-benn eus dorn ar Filistined.

² Trec'hiñ a reas ar Voabiz ivez, hag o muzulias gant ur gordenn, en ur lakaat anezho da c'hourvez war an douar. Muzuliañ a reas div gordennad evit o lakaat da vervel, hag ur gordennad leun evit lezel ganto o buhez. Hag ar Voabiz a voe sujet gant David, o paeañ un truaj.

³ David a drec'has ivez Hadadezer mab Reob, roue Zoba, pa'z eas da adlakaat e harzoù etrezek ar stêr Eufratez.

⁴ David a gemeras digantañ mil seizh kant marc'heger hag ugent mil troadeg. Troc'hañ a reas jaritelloù ar c'hezeg eus an holl girri, met mirout a reas kant karr.

⁵ Ar Siriz eus Damask a zeuas da skoazellañ Hadadezer roue Zoba, ha David a drec'has daou vil Siriad warn-ugent.

⁶ David a lakaas ur gwarnizon e Siria eus Damask, hag ar Siriz a voe sujet gant David, o paeañ un truaj. An AOTROU a ziwalle David e pep lec'h ma'z ae.

⁷ David a gemeras ar skoedoù aour a oa gant servijerien Hadadezer, hag a zegasas anezho da Jeruzalem.

⁸ Degas a reas ivez eus Betak hag eus Berotai, kêrioù Hadadezer, arem e-leizh.

⁹ Toi roue Hamad a ouezas en doa trec'het David holl arme Hadadezer,

¹⁰ hag e kasas Joram e vab etrezek ar roue David evit saludiñ anezhañ hag e veuliñ eus m'en doa graet brezel a-enep Hadadezer hag e drec'het. Rak Hadadezer a oa bet en ur brezel kendalc'hus gant Toi, hag e kasas listri arc'hant, listri aour ha listri arem.

¹¹ Ar roue David a gensakras anezho d'an AOTROU, gant an arc'hant hag an aour en doa dija kensakret, degaset eus an holl vroadoù en doa lakaet dindanañ,

¹² eus Siria, eus Moab, eus mibien Ammon, eus ar Filistined, eus Amalek, hag eus diwisk Hadadezer mab Reob, roue Zoba.

¹³ David en em reas c'hoazh brud pa zistroas eus e du-gounid war ar Siriz, en ur drec'hiñ triwec'h mil Edomad e traonienn an Holen,

¹⁴ hag e lakaas gwarnizonoù en Edom. Dre-holl en Edom e lakaas gwarnizonoù, hag an holl Edomiz a voe sujet da Zavid. An AOTROU a ziwalle David e pep lec'h ma'z ae.

¹⁵ David a renas war holl Israel, o tougen barn ha reizhder d'e holl bobl.

¹⁶ Joab mab Zeruja a oa penn an arme, Jozafad mab Akilud a oa teuliour,

¹⁷ Zadok mab Akitub hag Akimelek mab Abiatar a oa aberzhourien, Seraja a oa skrib,

¹⁸ Benaja mab Jehojada a oa penn ar Geretiz hag ar Beletiz, mibien David a oa e gentañ ofiserien.