1 Samuel 7 - Bibl Koad 21: Ar Bibl e Brezhoneg evit ar Vretoned

Pennad 7

¹ Tud Kirjad-Jearim a zeuas hag a lakaas arc'h an AOTROU da bignat, hag e kasjont anezhi da di Abinadab war ar c'hrec'h. Hag e santelajont Eleazar e vab evit mirout arc'h an AOTROU .

² Pell bras e oa abaoe an deiz ma voe lakaet arc'h an AOTROU e Kirjad-Jearim, ugent vloaz e oa. Hag holl di Israel en em lakaas da huanadiñ war-lerc'h an AOTROU .

³ Samuel a gomzas ouzh holl di Israel o lavarout: Mar distroit a holl galon d'an AOTROU , lamit eus ho touez an doueoù estren hag Astarte, ha distroit ho kalon etrezek an AOTROU , servijit-eñ hepken, hag ho tieubiñ a raio eus dorn ar Filistined.

⁴ Neuze mibien Israel a lamas kuit ar Baaloù hag Astarte, evit servijañ an AOTROU hepken.

⁵ Samuel a lavaras: Dastumit holl Israel e Mizpa, hag e pedin an AOTROU evidoc'h.

⁶ En em zastum a rejont eta e Mizpa, hag eno e tennjont dour d'e skuilhañ dirak an AOTROU , hag e yunjont en deiz-se, hag e lavarjont: Pec'het hon eus a-enep an AOTROU! Ha Samuel a varnas mibien Israel e Mizpa.

⁷ Pa glevas ar Filistined e oa dastumet mibien Israel e Mizpa, priñsed ar Filistined a bignas a-enep Israel. Ha pa glevas mibien Israel kement-mañ, o doe aon dirak ar Filistined.

⁸ Mibien Israel a lavaras da Samuel: Na baouez ket da grial evidomp etrezek an AOTROU hon Doue, evit ma tieubo ac'hanomp eus dorn ar Filistined.

⁹ Neuze e kemeras Samuel un oan-laezh, a ginnigas en e bezh d'an AOTROU evel loskaberzh. Ha Samuel a grias etrezek an AOTROU evit Israel, hag an AOTROU a selaouas outañ.

¹⁰ Hag evel ma kinnige Samuel al loskaberzh, ar Filistined a dostaas evit ober brezel da Israel. Met an AOTROU a lakaas ar c'hurunoù d'ober un trouz bras war ar Filistined en deiz-se, hag e voent disparfoeltret ha pilet gant Israel.

¹¹ Tud Israel a yeas er-maez eus Mizpa hag a redas war-lerc'h ar Filistined, hag e skojont warno betek dindan Bet-Kar.

¹² Ha Samuel a gemeras ur maen, a lakaas etre Mizpa ha Shen, hag en anvas Eben-Ezer, hag e lavaras: An AOTROU en deus hor sikouret betek amañ.

¹³ Ar Filistined a oa izelaet, ha ne zeujont ken war zouaroù Israel. Hag e voe dorn an AOTROU a-enep ar Filistined e-pad holl amzer Samuel.

¹⁴ Ar c'hêrioù bet tapet gant ar Filistined digant Israel a zistroas da Israel, adalek Ekron betek Gad, gant o ziriadoù. Israel o dieubas eus dorn ar Filistined, hag e voe peoc'h etre Israel hag an Amoreaned.

¹⁵ Samuel a varnas Israel holl zeizioù e vuhez.

¹⁶ Mont a rae bep bloaz d'ober tro Betel, Gilgal ha Mizpa, hag e varne Israel en holl lec'hioù-se.

¹⁷ Hag e tistroe da Rama, rak eno e oa e di, hag eno e varne Israel, hag e savas eno un aoter d'an AOTROU .