1 Rouaned 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Ar roue Salomon a voe roue war holl Israel.

² Setu amañ ar re a oa e bennoù: Azaria mab an aberzhour Zadok;

³ Elihoref hag Akija mibien Shisha, a oa skribed; Jozafad mab Akilud a oa diellour;

⁴ Benaja mab Jehojada a oa penn an arme; Zadok hag Abiatar a oa aberzhourien;

⁵ Azaria mab Natan a oa penn ar verourien; Zabud mab Natan a oa ar c'hentañ ofiser ha mignon ar roue;

⁶ Akishar a oa penn ti ar roue; Adoniram mab Abda a oa karget eus an tailhoù.

⁷ Salomon en doa daouzek merour war holl Israel, a raent war-dro ar pourvezioù evit ar roue hag e di; pep hini a oa karget eus ar pourvezioù e-pad ur miz eus ar bloaz.

⁸ Setu amañ o anvioù: Mab Hur e menez Efraim;

⁹ mab Deker e Makaz, e Saalbim, e Bet-Shemesh, hag en Elon eus Bet-Hanan;

¹⁰ mab Hesed en Arubod, ha dezhañ e oa Soko hag holl vro Hefer;

¹¹ mab Abinadab en holl rannvro Dor, Tafad merc'h Salomon en doa da wreg;

¹² Baana mab Akilud en doa Taanak ha Megiddo, hag holl vro Bet-Shean a zo etrezek Zartan, dindan Jizreel, adalek Bet-Shean betek Abel-Mehola ha betek an tu all da Jokmeam;

¹³ mab Geber e Ramod-Galaad, ha dezhañ e oa bourc'hioù Jair mab Manase e Galaad, hag ivez rannvro Argob e Basan ha tri-ugent kêr gant mogerioù ha barrennoù arem;

¹⁴ Akinadab mab Iddo e Mahanaim;

¹⁵ Akimaaz e Neftali, Basmad merc'h Salomon en doa da wreg;

¹⁶ Baana mab Hushai en Aser hag en Alod;

¹⁷ Jozafad mab Paruak en Isakar;

¹⁸ Shimei mab Ela e Benjamin;

¹⁹ Geber mab Uri e bro Galaad, bro Sihon roue an Amoreaned, ha bro Og roue Basan, hag e oa ar penn hepken war ar vro-se.

²⁰ Juda hag Israel a oa niverus evel an traezh a zo war aod ar mor, ken niverus e oant. Debriñ, evañ ha laouenaat a raent.

²¹ Salomon a rene war an holl rouantelezhioù adalek ar stêr betek bro ar Filistined ha betek harzoù an Ejipt. Degas a raent profoù, hag e voent sujet dezhañ e-pad holl amzer e vuhez.

²² Pourvezioù Salomon a oa bemdez tregont kor flour bleud ha tri-ugent kor bleud,

²³ dek ejen lart, ugent ejen peurvan, kant dañvad, hep ar c'hirvi, ar yourc'hed, an demmed hag an evned lart.

²⁴ Ren a rae war an holl vroioù a oa en tu-mañ d'ar stêr adalek Tifsak betek Gaza, war an holl rouaned eus an tu-mañ d'ar stêr, hag e oa e peoc'h gant an holl re a oa tro-dro, a bep tu.

²⁵ Juda hag Israel a oa o chom e surentez, pep hini dindan e winienn ha dindan e fiezenn, adalek Dan betek Beer-Sheba, e-pad holl buhez Salomon.

²⁶ Salomon en doa ivez daou-ugent mil kel-kraou-kezeg evit e girri ha daouzek mil marc'heger.

²⁷ Ar verourien-se a bourveze ar roue Salomon hag an holl re a dostae ouzh taol ar roue Salomon, pep hini e-pad e viz, ha n'o lezent da vankout a netra.

²⁸ Degas a raent ivez heiz ha plouz evit ar c'hezeg-tenn hag ar c'hezeg-red, e-lec'h ma vezent, pep hini hervez e garg.

²⁹ Ha Doue a roas da Salomon furnez, ur poell bras-meurbet, hag ur galon ken frank hag an traezh a zo war aod ar mor.

³⁰ Furnez Salomon a oa dreist furnez holl vibien ar sav-heol, hag holl furnez an Ejipsianed.

³¹ Furoc'h e oa eget den ebet, eget Etan an Ezrakiad, hag eget Heman, Kalkol ha Darda, mibien Makol. E vrud en em skuilhas e-touez an holl vroadoù tro-war-dro.

³² Disklêriet en deus tri mil krennlavar, hag aozet mil pemp kanaouenn.

³³ Komzet en deus diwar-benn ar gwez, adalek ar sedrez a zo el Liban betek ar sikadez a gresk war ar voger. Komzet en deus ivez diwar-benn al loened, al laboused, ar stlejviled hag ar pesked.

³⁴ Hag eus an holl bobloù e teued da glevout furnez Salomon, a-berzh holl rouaned an douar o doa klevet komz eus e furnez.