Maak 1 - Jola-Kasa

Kawaaleyaku kata Saŋ Batiis

¹ Muñeˈe Hulimahu Hásuumaahu hata Yéesu Kilisita ammuu Añiilawu ata Ateemit, húkitummuu.

² Li éliibalayi yata Esay ammuu afulofet, Ateemit lansaan ló: «Fan íboñul an an íhebenulo ayabi hákil, ammuu li ateŋen bútinabu booli.

³ Laale hulimahu hata anawu abaŋulowemuu li kayiinaayaku aan: “Jíhosul bútinabu boot li Amaaŋenawu! Jikaanool útin wacole.”»

⁴ Muñeˈe Saŋ Batiis li áfulul alako li kayiinaayaku. Li anaak awaale bukanabuku aaniil: — Joote jibet búsol baloŋelabu booluul buhaanabu min jítiiwo jiŋa’ buloŋ buwunkul, min jíbatiiseyi mantee Ateemit li abonketuul uhoofoolawu wooluul.

⁵ Muñeˈe bukanabuku feh kata etaamayi yata Súde, li bukanabuku kakinumuu Yeelusalem li kujow boot bata Saŋ. Nan kuŋejumuu, li kuheb uhoofoolawu wooliil hákil ésukayi feh, ban Saŋ Batiis li ábatiiseyiil li katunkaku kan koonemuu Suuludeŋ.

⁶ Búkokowabu bata Saŋ, buhal eñonkom búkaanumi, ban li anaak akoko kanaal kata kabaŋ li hukenjool. Saŋ bakos li múkum lanaake atiñ.

⁷ Li anaak aan búsukabu: — Akee ummu li abil búsolom ahaŋom sembe. Itookut min ísiten min il̥el̥ uneewawu wata sidallaasu soola.

⁸ Injé li mal líbatiisewuul, bale akila fan ábatiisewuul li Buyinumabu Banabaabu.

Saŋ li ábatiise Yéesu

⁹ No unnu, Yéesu li abilumul li ésukayi yata Nasalet yammuu li etaamayi yata Gálile, min Saŋ ábatiisewool li katunkaku kaaneyimuu Suuludeŋ.

¹⁰ Nan Yéesu ayaane áfululumuu li malamu, li ajuk emitayi li ébabulo, min Buyinumabu Banabaabu búwalowul li kambu kata éleebaan bubil bulako li akila.

¹¹ Muñeˈe hulim li hujami li emitayi haane: — Awu ommuu Añoolom an íboolimuu ŋáa’. Buyinumom feh li awu li kaan bo.

Sayitaane li abuntoo Yéesu

¹² Muñeˈe Buyinumabu Banabaabu li buyaan bújowetum Yéesu boot li kayiinaayaku.

¹³ Yéesu li alako bata kayiinaayaku kunak koono kúyii kúl̥uba. Sayitaane li abuntoolool ló. Yéesu li alako ló li sínuukuleŋasu sata li bujal, min kumalakaaku kucookoolool ló.

Kúgoomaku kútinaalaku kata Yéesu

¹⁴ Muñeˈe nan Elod ajokumuu Saŋ akul̥ fú’ tó, Yéesu li ajow boot li etaamayi yata Gálile, min awaale bo Hulimahu Hásuumaahu hata Ateemit.

¹⁵ Yéesu li anaak aan: — Taŋayi éliiŋe, ban Jáyiiyaju jata Ateemit jíkoojulo. Jibet búsol baloŋelabu booluul buhaanabu min jítiiwo jiŋa’ buloŋ buwunkul, min jíyinen li Hulimahu Hásuumaahu.

¹⁶ Yéesu li alako éjowum bata katantaku kata húwajahu hata Gálile, li ajuk ánayine akee an koone Simoŋ li atuyool Andele, buko li jambaal li húwajahu, mata buko kumbaala.

¹⁷ Muñeˈe Yéesu li aaniil: — Jínabul lí ínje, min ikaanuul jilako kúŋalula bukan boot lí ínje.

¹⁸ Mal̥egen li kuyaan kukat to simbaalasu sooliil min kunab li akila.

¹⁹ Nan Yéesu ayinno bomuu maa, li ajuk Saak ata Sebede li atuyool Saŋ. Li busaana kulakowe kacookoo simbaalasu sooliil.

²⁰ Muñeˈe Yéesu li ayaan áhooñuliil, li kukat atuubayiil Sebede li kulokaabuku ló híndo busaanaabu, min kujow kunab li Yéesu.

Yéesu li akesoo buyinum bajakut búfu’ li ánayine akee

²¹ Muñeˈe Yéesu li kúgoomaku, min alako ló kaliiken bukanabuku Hulimahu hata Ateemit.

²² Baliikenelabu bata Yéesu li bukaan bukanabuku kalakomuu bajantenabu boola kusego ŋáa’, mata lanaanaak aliikeniil kulimaku unku li sembe ló, búti li kaliikenemuu ésukayi eluwaayi ésukayi eluwaayi yata Móyiis.

²³ Muñeˈe li baj híndo eluufayi yata kal̥awaku ánayine an buyinum bajakut bújufowe, anaake akaaw butiya aan:

²⁴ — Yéesu ata Nasalet, waa lookoolaale? Waa lubiibil boot kájimenoli? Lihaase awu ommuu ayi. Awu ommuu Anawu anabaawu an Ateemit áboñulumuu.

²⁵ Yéesu li anuuloo buyinumabu bajakutumuu li sembe aan: — Ulu, ban li úfu’ li ánayinaawu ummu!

²⁶ Buyinumabu bajakutumuu li bubet ánayinaawu teetaam, min bukaanool ababbaloo ban li bukaaw butiya min búfu’ li akila.

²⁷ Bukanabuku feh li kúkoli ŋáa’, gay li kunaak kugel̥l̥enoo koon: — Kama laalu waa? Baliikene buwunkul banaboole li sembe? Anáyinaawu ummu anuuloomuu uyinumawu wajakutumuu li ukaan loon alob womuu.

²⁸ Muñeˈe Yéesu li ayaan ajamo aban tanootan li etaamayi feh yata Gálile.

Yéesu li afaken bukan kameeŋe kásomute

²⁹ Muñeˈe nan Yéesu li kúgoomaku kúfululumuu li eluufayi yata kal̥awaku buko li Andele.

³⁰ Al̥ol Simoŋ aale akila ló mahintowe, mata bújuusa mabetelool. Nan Yéesu aliiŋumuu, li kuyaan kulobool mata kásomutaku kata anaalaawu.

³¹ Yéesu li ajow akooj anaalaawu, ban li átukool li kaŋen min ayiten. Anaalaawu li afak li kásomutaku koola, min akaaniil kutiñ.

³² Muñeˈe li bil liiŋ kátiimaku, banakabu balowe, bukanabuku li kútebul kásomutumuu feh li kan uyinumawu wajakutumuu újufomuu, boot bata Yéesu.

³³ Bukanabuku feh kata ésukayi li kubil kuwoog tin kámbiilaku kata eluufayi.

³⁴ Muñeˈe Yéesu li afaken bukan kameeŋe li úsomut wábutoole. Li akesoo foof uyinum wajakut wameeŋe úfu’ li bukanabuku kan újufomuu, ban li áhi’ wó úlobum mata uhaase ayi ammuu Yéesu.

Yéesu li añaahoo li etaamayi yata Gálile feh

³⁵ Li líiŋ hunak hukaten li bújom bíb, to baloŋe li timooc, Yéesu li ayito min áfu’ li eluufayi ajow boot tan wayitowe boot kal̥aw Ateemit.

³⁶ Muñeˈe Simoŋ li bukanabuku kan kunaboomuu, li kujow huŋes Yéesu.

³⁷ Nan kujukoolumuu li koonool: — Esúkayi feh inyu li huŋesi.

³⁸ Bale Yéesu li aaniil: — Ujowaal boot bakee, li sísukasu sakoojumuu, bájum li iwaale bo foof Hulimahu Hásuumaahu. Li mal̥egenamu, wahawu unwu újimuu li ibil.

³⁹ Mal̥egen Yéesu li ajow tanootan li etaamayi feh yata Gálile, min anaak awaale bo Hulimahu Hásuumaahu li siluufasu feh sata kal̥awaku sata halaabahu unhu, ban li akesoo uyinumawu wajakutumuu úfu’ li bukanabuku kan újufomuu.

Yéesu li afaken an ata háhaayee

⁴⁰ Muñeˈe ánayine an háhaayee ejoke, li abil akooj Yéesu min ákuntuŋ hákilool min ayaakoolool aanool: — Ufañumuu, luyilo ufakenom li kásomutaku kúmbaam.

⁴¹ Muñeˈe Yéesu li áyiyen ánayinaawu ŋáa’. Li atooken kaŋenool agolool ban li aanool: — Lifañe. Ufak li kásomutaku kooli!

⁴² Mal̥egen háhaayeeyayi li eyaan éfu’ li ánayinaawu, min afak.

⁴³ Muñeˈe Yéesu li anuuloo ánayinaawu ban li ayaan akesoolool ábalo, min aanool:

⁴⁴ — Ukáanum. Jakum ulob mo an, bale ujow boot bata álambaawu min ánandi. Banumuu, li usen busuuhenabu bata kágiilenaku ban Móyiis alobumuu kasen, min híis ésukayi feh kaanaku awu lufake.

⁴⁵ Bale nan ánayinaawu ajowumuu, li alako kakitten ésukayi tanootan feh wahawu wabajoolumuu. Mó lí múji Yéesu ayilaat anoken li ésuk min bukanabuku kujukool. Li anaak alako tíyaŋ ban wayitomuu, bale bukanabuku li kunaak kubilum banooban kutookool bo.