Filemoŋ 1 - Jola-Kasa

Kasaafoo

¹ Injé Fool akul̥imuu mata Yéesu Kilisita áji, ikiice eleetalayi inye íginnoo ló atuyolaal Tímote. Awu Filemoŋ likiiculo yo, ammuu ábukewoli li áfaaloli ata bulok.

² Likikkiic yo foof boot li áliinolaal Afiya, li boot li afaalolaal Alisif an oomaalumuu li bútajabu banolabu. Eleetalayi inye likikkiic yo foof boot li ejanguwayi yammuu li eluufayi yooli.

³ Ateemit Atuubawolaal li Amaaŋenawu Yéesu Kilisita kujow kusenuul káji li kásuumaay.

Fool li asal Ateemit mata Filemoŋ áji

⁴ Atuyom Filemoŋ, nanoonan nan ilakowe kal̥aw, fan íl̥imeni ban li isal Ateemit úmbaam.

⁵ Mata lijame bukanabuku li kulob mata húbooliyahu han úboolimuu bukanabuku feh kammuu kata Ateemit, li káyinenaku kan ubajumuu li Amaaŋenawu Yéesu.

⁶ Lil̥awe Ateemit mantee káyinenaku unku kanolaku kan ubajaalumuu awu li áloli, li kubaj jáliŋ. Mó mújimuu úhiis majakaamu feh man uyilimuu ukaanaal boot li Kilisita.

⁷ Atuyom, húbooliyahu hooli hújiwonji li ibaj ésuumansuum yáamak li kawankulen, mata lújiji uyinumawu wata bukanabuku kata Ateemit li ubah.

Fool li al̥aw Filemoŋ min ayab Onéesim li kásuumaay

⁸ Wahawu unwu újimuu, maayeet min ibajumuu kakaañen kabilumulo li Kilisita min ilobi waa lóotimuu ukaan,

⁹ bale haŋ majak il̥awi wah li kajawaku kata húbooliyahu, ínje humumom Fool ahallenumee, háŋum muñeˈe nan emmee foof li hukul̥ mata Yéesu Kilisita áji.

¹⁰ Lifañe min il̥awi wah boot li Onéesim, ammuu muñeˈe añoolom li káyinenaku láale li hukul̥ahe.

¹¹ Naanaŋ Onéesim ájaliŋuti maayeet, bale muñeˈe lájaliŋolajaliŋ, awu lí ínje.

¹² Muñeˈe boot min ílaañenuliwool, okila ammuu bugeb bata ínje humumom.

¹³ Lifañeene min ítukool eeken téetiwom, min akaanom wahawu wan awu ooteenumuu ukaanom, láale dán emmee li hukul̥ mata Hulimahu Hásuumaahu húji.

¹⁴ Bale ifañut min ikaan wah awu balobutom kayinooli. Ifañut min ituuŋi ukaanom majakaamu ummu, bale lifañe min awu humumi unong min ukaan mo.

¹⁵ Nakee Onéesim lafanfan áfu’ booli kunak, bájum li abil álaañul li uyabool booli boot nanoonan.

¹⁶ Ban jakum uyabool loon amiikeel laam, bale uyabool jak haŋ ŋáa’ amiikeel: loon atuyi an uboolaat. Injé humumom, Onéesim atuyom an iboolaat laam, háŋum awu jan emmuu ani laam ban li áami foof atuyi li Amaaŋenawu.

¹⁷ Nokoomuu loon lujokonjok loon ínje afaali, uyab Onéesim booli loon óotimuu uyabom booli.

¹⁸ Nokoomuu foof loon latittil li awu mantee foof laakisaak, li uŋa’ wahawu unwu feh ukaan li kajawaku kúmbaam.

¹⁹ Injé Fool humumom ítuke li kaŋenom min ikiiculi kulimaku unke. Injé Fool humumom, fan ilaañeni. (Bale ilet li ijowi kawayil̥en kaanaku awu humumi lookonsook buloŋabu buya humum bo.)

²⁰ Atuyom, liyaaki, ulambenom li wahawu unwe li kajaw kata Amaaŋenawu: Ukaanom súum li buyinum, ínje jammuu atuyi li Kilisita.

²¹ Likiiculikiic eleetalayi inye mata líyinenyinen kaanaku fan ukaan loon ilobimuu. Ban foof lihaase een fan ukaan haŋ to.

²² Ufalewom li manolamu foof káfit ukat to, mata libabbaj kákangum kaanaku Ateemit fan ásooniyen ul̥awawu wooluul min álaañenulom boot booluul, ban let fiyo.

Kasaafoo kúbanum

²³ Efafulaas ammee li hukul̥ahe lí ínje mata Yéesu Kilisita áji, lásaafuli.

²⁴ Maak li Alisitaak, li Demaas li Lík kammuu kufaalom kata bulok, kúsaafuli foof.

²⁵ Kájiyaku kata Amaaŋenawu kujow kulako li bukuluul.