Bakaanelabu 10 - Jola-Kasa

Fiyeel li ajow boot bata Kooluney

¹ Bajeene li ésukayi yaaneyimuu Sesaale anahaan ata kusollaali téemeel kata Lom, an kunaake koon Kooluney. Akila aakenumuu kayooŋaku kata kusollaaliyaku kata Lom kan koonemuu «Kayooŋ Itali».

² Kooluney lakankaan an áyinene ban li ákoli Ateemit, okila li butoŋool. Lanaanaak alamben ŋáa’ kusukateenabuku kata kusuwifaku, ban li anaak al̥aw nanoonan Ateemit.

³ Li líiŋ hunak hakee tinak bakel̥e, ewaatuwayi éhaajutayi balehene, Kooluney li ajuk li kahimmo amalaka ata Ateemit feet, ánokenulo boola min aanool: — Kooluney!

⁴ Kooluney li ajuke amalakaawu li ekole ló ban li aanool: — Waa ubaje, Amaaŋen? Amalakaawu li aanool: — Ateemit layayyab ul̥awawu wooli, ban súumoosuum li kalambenaku kan ulambenemuu kusukateenabuku. Amojenuti.

⁵ Muñeˈe kama uboñ kánayine boot li ésukayi yaaneyimuu Jofe, kujow koon ánayine akee an koone Simoŋ, aaneyimuu foof Fiyeel, abil.

⁶ Fiyeel bata ánayine akee an koone Simoŋ aloke ubaŋ, lawalene. Eluufayi yata ánayinaawu ummu bata katantaku kata halahu yoom.

⁷ Nan amalakaawu alakomuu elobayi li akila ajowumuu, Kooluney li áhooñul bukan kúl̥uba li kulokaabuku koola, li akee li kusollaaliyaku koola áyinene li Ateemit ban li afiyo li kuŋenool.

⁸ Kooluney li akitteniil wahawu feh wabajumuu, ban li aboñiil kujow boot Jofe.

⁹ Li líiŋ hunak hukaten, nan bukanabuku kan Kooluney aboñumuu kulakomuu ejowayi kujow kulehen ésukayi yata Jofe, Fiyeel okila li aŋito haatiya eluuf yaakut kasond ajow kal̥aw Ateemit, banakabu bakel̥e.

¹⁰ Muñeˈe li acaalet, li afañ min atiñ. Nan kulakowoolumuu elakayi, li atundo li ajuk kahimmo.

¹¹ Li ajuk emitayi li ébabulo, min wah ukee wanokoole li kahul káamak ban li útuki li uleebesawu ubakiilawu wata ko, úwalowumul ló boot teetaam.

¹² Li kahulaku, li babbaj ló kanokoo kanookan kata sínuukuleŋasu sata koot kubakii, li ululoonawu, li basuuwabu.

¹³ Muñeˈe hulim li hoonool: — Fiyeel, uyito umuk yakee li sínuukuleŋasu unsu utokoñ!

¹⁴ Bale Fiyeel li aan: — Aáj! Let ikaan mo Amaaŋen, mata itokoñulelut wah wátokoñeliiti li wah wajakut.

¹⁵ Hulimahu li hulaañen hoonool: — Jakum ujok wah wan Ateemit aane ujaajak, loon ujakut.

¹⁶ Li ajam hulimahu ñoono ñáhaaji, ban wahawu wanokoomuu loon kahul li uyaan úlaañetumi boot haatiya emitayi.

¹⁷ Muñeˈe Fiyeel li alako káwettoo mata waa Ateemit afañe alobool li kahimmowaku unku kan ajukumuu. Bale no unnu, bukanabuku kan Kooluney áboñulumuu buko bagel̥l̥ene min kuhaas tan eluufayi yata Simoŋ yommuu. Kama tan kuyitomuu, li kámbiilaku kata eluufayi.

¹⁸ Li kuhooñ min kugel̥l̥en mantee tan kulakomuu to Simoŋ an koonemuu Fiyeel awalenumuu.

¹⁹ Emmuu Fiyeel okila baloŋe li kayinoolaku min ahaas waa Ateemit afañe alobool li kahimmowaku unku, muñeˈe Buyinumabu Banabaabu li boonool: — Ujanten, baje kánayine kúhaaji kaŋese li awu.

²⁰ Uyito uwalo min ujow jinaboo, ban jakum úwettoo, mata ínje íboñuliil.

²¹ Mal̥egen Fiyeel li áwalowul ajow boot tan kánayinaabuku kulakomuu min aaniil: — Injé emmuu anawu an jiŋesemuu li akila. Wáa újiwuul li jibil?

²² Kánayinaabuku li koonool: — Li kajawaku kata anahaanawu ata kusollaaliyaku an koonemuu Kooluney, jibilume. Lakankaan an acole, ákoliye Ateemit ban Kusuwifaku feh kulobelob majake kuya li akila. Amalaka ata Ateemit aane Kooluney áboñul bukan kubil kooni ujow boot boola, min ajanten kulimaku kan ommuu li ulobool.

²³ Muñeˈe Fiyeel li akaan kánayinaabuku kunoken li eluufayi, min kuŋot ló. Nan tikatenumuu, Fiyeel li ayito anaboo li buko kuwuj. Kukee li kánayine káyinene kata Jofe li kunab li akila.

²⁴ Li kúliiŋ li ésukayi yan koonemuu Sesaale, li hunakahu hanabumuu li ho. Kooluney okila to li banaakiil. Li áhooñul bukanool, li kubukewool kata húkow.

²⁵ Muñeˈe nan Fiyeel alakomuu li anoken li eluufayi, Kooluney li abil ayallowool. Li ákuntuŋ hákilool min asaafool.

²⁶ Bale Fiyeel li ál̥aalulool min aanool: — Uyito, mata ínje foof an bale leem.

²⁷ Muñeˈe li aŋalool kunoken li eluufayi, mo lalobemaa li Kooluney. Nan áliiŋ dómuu, li atook bukan kameeŋe mawooge.

²⁸ Fiyeel li aaniil: — Jihaase joon bútinabu bata Kusuwifaku búhihhi min asuwif kujokoo hubuke li an alet asuwif, mantee foof li anoken boola. Bale ínje Ateemit láhiisonhiis kaanaku eetut ijok an loon ajakut, mantee foof loon asetut.

²⁹ Mó mújimuu, nan jíhooñulommuu, li ibil ínje báwettoolut. Muñeˈe lifañe min ihaas wahawu wájimuu li joonom ibil.

³⁰ Kooluney li aanool: — Baje muñeˈe kunak kúhaaji, tinak bakel̥e, li ewaatuwayi inye yanolayi, li ilako kal̥aw Ateemit búmbaam. Nan ilakomuu kal̥awaku, ánayine akaanowe wañ waleñe li ayaan abil ayito hákilom.

³¹ Li aanom: «Kooluney, Ateemit layayyab kal̥awaku kooli ban amojenut kalambenaku kan ulambenemuu kusukateenabuku.

³² Uboñ kama kánayine boot li ésukayi yaaneyimuu Jofe, kujow koon Simoŋ an koonemuu Fiyeel abil. Bata Simoŋ alokemuu ubaŋ lawalene. Bata katantaku kata halahu lakine.»

³³ Muñeˈe li iyaan iboñ bukan kujow kúhooñuli, ban mo foof lukaanumuu jak min ubil. Muñeˈe ololaal feh ummuwaal taate hákil Ateemit, boot bajanten wahawu feh wan Amaaŋenawu áboñulimuu boot ubil úloboli.

Kulimaku kan Fiyeel alobumuu bata Kooluney

³⁴ Muñeˈe Fiyeel li aŋa’ hulimahu, li aan: — Muñeˈe lihaase kaanaku Ateemit ajokut bukan kukee kuhaŋ kaabuku.

³⁵ An ata banooban átuule Ateemit ban li akaan an acole, fan ásuum Ateemit.

³⁶ Jihaase hulimahu han Ateemit ásenulumuu kata Isilayeel: li Yéesu Kilisita ammuu Amaaŋenawu ata bukanabuku feh, lásenulumuu Hulimahu Hásuumaahu hata kásuumaayaku.

³⁷ Jihaase wahawu wabajumuu li etaamayi feh yata Súde, wákitummuu li etaamayi yata Gálile, nan Saŋ abanumuu kawaale bukanabuku aaniil kujow kúbatiiseyiil.

³⁸ Jihaase buu Ateemit akaanumuu sembaasu sata Buyinumabu Banabaabu li Yéesu ata ésukayi yata Nasalet. Jihaase foof buu Yéesu ajowumuu tanootan li etaamayi inye, min anaak akaan majake, li afaken bukanabuku feh kan Sayitaane ájufomuu li buko, mata Ateemit li okila lalakowe.

³⁹ Lujukaale wahawu feh wan Yéesu akaanumuu li etaamayi yata Kusuwifaku. Okila Yéesu kubaaŋumuu li ekuluwa min aket.

⁴⁰ Bale nan aketumuu jow líiŋ li hunakahu húhaajutahu, Ateemit li ayitenumulool li eketayi, ban li akaanool áfu’ bukan.

⁴¹ Inti bukanabuku feh láfule, bale bukanabuku kan Ateemit afinumuu min al̥use min kumaat. Buko kommuu áloli jatiñumuu ban li jihob dín dáno li akila, nan Ateemit ayitenumuloolumuu aban li eketayi.

⁴² Yéesu láanolisaan jiwaale ésukayi Hulimahu Hásuumaahu, ban li jiyiiŋen kaanaku okila Ateemit al̥usumuu boot batiib bukanabuku kaloŋumuu li kaketumuu.

⁴³ Kufulofetaku feh kulollob moola koon anoowan ammuu li áyinen li akila, fan ábajum li kajawaku koola kabonket kata uhoofoolawu woola.

Buyinumabu Banabaabu li bubil bulako li bukan kalet Kusuwif

⁴⁴ Nan Fiyeel alakomuu elobayi, Buyinumabu Banabaabu li búwalowul bubil kulako li bukanabuku feh kalakomuu bajantenabu bata Hulimahu.

⁴⁵ Kusuwifaku káyinenumuu li Yéesu kánabulumuu li Fiyeel, li kusego ŋáa’ min Ateemit áwalenulomuu Buyinumabu Banabaabu bubil bulako foof li bukanabuku kákaanumutumuu li Ateemit balewool.

⁴⁶ Li mal̥egenamu kujanjam bukanabuku umbuku li kulob silob san kuhaasut. Li kujamiil foof li kusal maluukamu mata Ateemit. Muñeˈe Fiyeel li aaniil:

⁴⁷ — Mantee an layilo áhi’ min bukanabuku umbuku kúbatiiseyi li mal, muñeˈe nan kuyabumee Buyinumabu Banabaabu loon foof ololaal uyabaal bomuu?

⁴⁸ Mal̥egen Fiyeel li alob min kúbatiiseyiil li kajawaku kata Yéesu Kilisita. Muñeˈe buko feh li kuyaakoo Fiyeel mantee kay li alako li buko kunak.