Provérbios 8 - Kaxinawá Bíblia (BR)

Unanepã hatu tapĩmakatsi hatu kenamiskiaki, na hãtxarã

¹ Ha unanepa hãtxa huni keskatũ hawẽ hãtxa tashnimakĩ hatu tapĩmakatsi ikĩ hatu kenamiski. Ha tapĩmanika hãtxa huni keskatũ hawẽ hui kaĩmakĩ hatu nĩkamamiski.

² Unanepa hãtxa inũ tapĩmanika hãtxã hatu nĩkamamisbuki, mananãshũ inũ bai kapukea anu niti ishũ yuikinã.

³ Mae ewapa mishki kenebaunibu hikiti shui hawẽ beputi anushũ hatũ hui nĩkamakĩ hatu yuikĩ:

⁴ “Hunibuũ, matu inũ matũ bakebu anu ẽ matu hãtxa waii.

⁵ Mã berunã hawa tapĩriabuma inũ unaĩsmapabuũ, haskai mã unanepatiru inũ mã nĩkanikatiru ea tapĩkãwẽ.

⁶ Hãtxa pepa putatima hatũ ẽ matu merabewatirã, ẽ eaki. Nĩkakãwẽ.

⁷ Haska ẽ matu yuiai txanimaki. Txani hãtxa yuiaibu ẽ betxipaismaki.

⁸ Dasibi ẽ hãtxarã, yui kayabiki, haska ẽ matu yuiai ẽ kanetirumarã.

⁹ Habũ itxapa shabakabi tapĩtirubu inũ shabakabi nĩkatirubunã, ẽ hãtxari shabakabi pepa nĩkakĩ hawa ẽ kaneama nĩkamisbuki.

¹⁰ Ha dukũ benakinã, yusĩti kayabi inũ tapĩti kayabi benakĩ tapĩkubaĩkãwẽ. Haska mĩ tapiainã, mane prata inũ mane ouro betxipaibiamisbu binuhairaki.

¹¹ Unanepati hãtxarã, hawẽ hiwei pehairakũkaĩkĩ hamapai mabu nẽkati hawẽrua kushipahairabiakẽ binuaki. Hamapai mabu sharabu haya mã hawẽ kemubiamis ha unanepati hãtxã dasibi binuaki.”

¹² Ea huni keskai unanepa hãtxakĩ yuikĩ: “Ea unaneparã, ẽ haibu tapĩhairanikabe ẽ habe ketashameaki. Habe merabenaĩ ẽ hawa ariama nuku dabe yubakakĩ pe shinãtã pehaira nũ yusĩmiski.

¹³ Senhor Deuski datekĩ duawakubaĩkinã, txakabu danaĩ mĩ haki sinatatiruki. Eanã, nati txakabu ẽ danãmiski: ibubis keaĩbu inũ, ha: ‘Ẽ eã besti hamapai unã keyuaii’, imisbu inũ, hiwe txakakubaĩmisbu inũ, txanitxakakubaĩmisbu eã ẽ hatu danãhairamiski.

¹⁴ Txakabu unãti wanika inũ pepa unãti wanika kushiparã, ẽ ea bestiki. Ẽ unã keyuaiwẽ taeshũ bebũkiri hawara ẽ akatsis ikai yubakatã ẽ akubaĩmiski.

¹⁵ Ewẽ taea shanẽ ibui kushipakĩ hatunabu shanẽ ibushũkĩ pe hatu yunukubaĩtirubuki.

¹⁶ Ewẽ taea mai pakea anua shanẽ ibubu inũ, hatũ bakebu inũ, shanẽ ibu beshmasbũ hawara pe inũ hawara txakabu hatunabũ akaibu pewẽ besti hatu yunukĩ unãti watirubuki.

¹⁷ Tsuabũra ea betxipaiaiburã, eãri ẽ hatu betxipaimiski. Tsuabũra ea benai eki nukumisbuki.

¹⁸ Ea benakĩ ea shinaĩbu pewẽ hatu manakukĩ hatũ hiweti mabu pepa inũ benimai hiweti ẽ hatu inãkĩ duawamiski.

¹⁹ Ea nĩkakĩ tapiaĩburã, pehairawẽ ẽ hatu manakukĩ inãkatsis ikairã, ha ouro mane has inũ prata mane has binuhairaki.

²⁰ Ẽ ea unanepa kairã, bai pepa yushtumawẽ kakĩ hawa hatu kanemama yunuti kushipa ẽ hatu unãti wamakubaĩmiski.

²¹ Tsuabũra ea betxipaiaiburã, hawena ẽ inaiĩ, hamapai pepa bitã hawẽ hiwe anu arukĩ hau itxawashanũbunã.

²² Senhor Deusũ mai inũ nai dasibi dami wakĩ taewariama ea dukũ ea tashnimaniki, ẽ unaneparã.

²³ Mai dami wariama ea dukũhaira ea dami wakĩ taewaniki, hawa mai anu betsa tashniriamahairatianã.

²⁴ Ianẽwã tibi hayariama inũ, hene tibi inũ hanua txatxa beai ũpash tibi habariama ea dukũ tashnimatã Senhor Deus ea hayaniki.

²⁵ Mati keyatapa inũ mawa tibi dami wariama ea dukũ tashnimatã Senhor Deus ea hayaniki.

²⁶ Ha mai hirabi anu bai wati tibi inũ, ha mai mishpu bitã mai hirabi ha dami wani ariamabia ea dukũ ea tashnimaniki.

²⁷ Natukã nai namã ianẽwã dami wariamakẽ ha bebũ ea dukũ ẽ hayai taeniki.

²⁸ Nai anu nai kuĩ dami wariama inũ, ianẽwã hanua hene tashniai dami wariama inũ,

²⁹ ianẽwã kebẽkĩ hawẽ kesua kesha tibi pewariama inũ, mai haki dakati pewariama

³⁰ earã, habe ketashamekũkaini hawa pashkama Senhor Deusbe ea unanepa hanu ẽ habe iniki. Ewẽ benimakũkainaya Senhor Deus bebunua bari tibi hawa pashkama habe benimai ẽ beyuskũkainiki.

³¹ Deusũ hunibu bawaiwẽ taea habu shinaĩ hatuwẽ ẽ benima txakayamakũkainiki, mai hirabi hiwemashinawẽ taea haki beyuskũkainirã.

³² Ea unanepa ẽ matũ epa keskaki. Natiã ea nĩkairakãwẽ. Ẽ akubaĩmis ea txibaĩ mã benimakũkaĩshanaii.

³³ Ea unanepakiri ẽ matu yusiaĩ nĩkakĩ tapĩkĩ ea danãyamashãkãwẽ.

³⁴ Earã, ẽ bepẽmanaki. Tsuabura ea anu hushũ dasibi ẽ yusiã bari tibi ea nĩkakubaini txĩtuãma ẽ hatu mekea haya habũ ea nĩkai benimakubaĩshãkanikiki.

³⁵ Tsuãra ea benai eki nukutanã, hatũ hiwea kayabi bishãkanikiki, haska Senhor Deusũ betxipaimis txibãmiswẽ taeshunã.

³⁶ Hakia tsuãra txakabuwakĩ kanetã ea henebainirã, hawẽ hiwearã, ibubis txakabuwashãkanikiki. Hatũ ea danainã, hawẽ mawa betxipaikiki”, anikiaki.