Provérbios 10 - Kaxinawá Bíblia (BR)

Salomãonẽ yusĩti hãtxa kene pewakubainibukiaki, na hãtxarã

¹ Salomãonẽ unanepa hãtxa nĩkakãwẽ. Hawẽ bake unanepatũ hawẽ epa benimawamisbuki. Hakia hawẽ bake nĩkaismatũ hawẽ ewa kashamakĩ punu nuka wamisbuki.

² Mabu besti itxawakĩ hatu parãtã itxawairã, hawẽ pe hiwetirubumaki. Hakia haska Deusũ betxipaiai pepa besti txibãkubaĩmisburã, mawa kayabi anu kama piskutirubuki.

³ Huni pepabu buniaibu Senhor Deusũ merabewakĩ hatu piti inãkĩ bunimamamiski. Hakia huni txakabubu hawara piti pepawẽ kemuaibu Senhor Deusũ hatu yaniwamaismaki, kupikinã.

⁴ Tsuara eskarabes dayamis hawa hayama nuitapakubaĩmisbuki. Hamẽ tsuara daya txakayamamisburã, dasibi hayakubaĩmisbuki.

⁵ Unanepabũ mibãshũ bari tibi hushiaĩ tsekashũ hatũ hiwe anu arumisbuki. Hakia mibã biaimashũ tsuara haki petxitã biama benushinarã, txipu nuitapai ea iki dakemisbuki.

⁶ Huni pepabu hatũ pepawẽ Deusũ hatu duawamiski, hawẽ pepawẽ manakukinã. Hakia huni txakabũ bemakis hatu pewabiakĩ uke merã txakabu shinaĩ hatube detenamemisbuki.

⁷ Huni pepa uĩkĩ Deusũ duawamis betsabũ hawẽ pepa shinãkĩ hakimaisbumaki. Hakia huni txakabukiri hawaira hakimamisbuki.

⁸ Unanepabunã, yunuti hãtxa pepa hawaira nĩkamisbuki. Hakia habu patapakĩ hãtxa txakabu yuimisburã, hawaira txakabui benushãkanikiki.

⁹ Tsuabura pe hiwekĩ hawa txakabu meisbuma hawaki dateama unanuma hiwekubaĩmisbuki. Hakia tsuabũra txakabu mekĩ hunebiamisbu hatũ txakabu shabakabi betxitã hatu dake washãkanikiki.

¹⁰ Tsuãra huni betsa parãmakĩ beruwẽ hatu unãmakĩ hatukiri shetxiku amisrã, unãtã hatu itxakawakĩ hatu nuitapawamisbuki. Unaĩsmapatũ pe shinãma hawaira hatu hãtxa yuibauni txanikaũmisrã, hawẽ txakabuwẽ taeshũ hakiri pe shinãma hatu itxakawashãkanikiki.

¹¹ Huni pepabũ yusĩti hãtxa pepawẽ merabewakĩ Deusũ hiwea kayabikiri hatu tapĩmakubaĩmisbuki. Hakia huni txakabũ bemakis hatu pewabiakĩ uke merã hune shinã txakakĩ hatu txakabuwamamisbuki.

¹² Dananãkũkaini sinatanamei detenamemisbuki. Hakia huni nuikipanã, hawara txakabuwashinabu hatu daewatã hatũ txakabu hakimawatirubuki.

¹³ Unanepa hãtxakinã, hãtxa unanepa yuimisbuki. Hakia tapĩ pewaisbuma unaĩsmapatũ hawẽ hãtxa pe mekeama txakabu yuiaibuwẽ taeshũ danaĩ haki sinatakĩ hatu kakush kakush amisbuki.

¹⁴ Unanepabũ hawẽ unanepati hãtxa mekekĩ hawaira yuisbumaki. Hakia unaĩsmapabũ hatũ hãtxa hawaira yuikĩ mese wakĩ hatu sinatamamisbuki.

¹⁵ Huni mabuyabunã, tsuãra hatu txakabuwaibu hawẽ peiwẽ pakakĩ hatu nematirubuki. Hakia nuitapaibu tsuãra hatu txakabuwabu hawaumawẽ taea hawa hatu nematiruma hawawẽ pashatirumaki.

¹⁶ Huni pepabu dayakubainaibu manakuti pepa bitã hiwea kayabi hayashãkanikiki. Hakia huni txakabubu daya peama kanemisburã, hatũ manakuti birã, txakabui pikumisbuki.

¹⁷ Tsuãra kaneaibu pe hatu yusiãbu nĩkamisburã, pe hiweshãkanikiki, hawa benuamarã. Hakia pepa hatu yusiãbu danãkĩ nĩkaisbuma hatũ hiwea benushãkanikiki.

¹⁸ Txanitxakamisbu hune mia danaĩ sinatabiai mia hawa yuiamaki. Hakia unaĩsmapabu tari hãtxabiaibũ hawenamabia dasibi ikaibukiri hatu yuibaũmisbuki.

¹⁹ Tsuãra hawara tibikiri yui hãtxa txakayamakinã, kanekubaĩmisbuki. Hakia unanepaburã, mawaira hãtxaisbumaki.

²⁰ Huni pepabũ hãtxarã, mane prata karu pepa keskaki. Hakia huni txakabubũ shinanã, hawa pemahairaki.

²¹ Huni pepabũ hawẽ hãtxawẽ hatu yusĩkĩ itxapa hatu tapĩmamisbuki. Hakia huni unaĩsmapabũ pepa shinãkĩ katutiruma mawamisbuki.

²² Senhor Deusũ tsuara hatu duawakinã, mabu pepa itxapa keska hatu inãkĩ benimawamiski, hawa hatu bika tenemakĩ isĩ tenemamarã.

²³ Huni unaĩsmapatũ txakabu tibi wakubaini hawẽ besti benimakũkaĩmiski. Hakia huni unanepa hawẽ unanepawẽ benimamiski.

²⁴ Huni txakabubu hawara huriamabiakẽ haki datehairamisbu hatuki nukuai meshãkanikiki. Hakia hawara huni pepabũ haska betxipaimis uĩshãkanikiki.

²⁵ Niwe kushipahaira shubi shubi ibirãkĩ huni txakabubu yamawakĩ keyushanikiki. Hakia huni pepabunã, hawa meama hawama hiwekubaĩshãkanikiki.

²⁶ Huni txikishbu hawẽ tsumapã hatu yunubia ashuaĩsmarã, bimi bũkash piabu hatũ sheta mashesh wakĩ txakabuwamis keska inũ, txi kuĩmã hawẽ beru hatu betxeshkĩ txeshãwãmis keskabuki, tsuã hatu betxipaiamarã.

²⁷ Senhor Deuski datekĩ duawakubainaibu hatũ hiwea txaipa hayayushãkanikiki. Hakia huni txakabubu hatishuĩra hiweama ishãkanikiki.

²⁸ Huni pepabũ hatũ manakuti pepa huaya bi benimashãkanikiki. Hakia huni txakabubũ hatũ manakuti pema huaya benu bestishãkanikiki.

²⁹ Senhor Deusũ hatu mekekinã, habũ pepa wakubainaibu hatu mekemiski. Hakia habũ txakabuwakubainaiburã, Senhor Deusũ hatu kupikĩ yamawamiski.

³⁰ Huni pepabu hatũ hiwea betsa taska kane hayama ishãkanikiki. Hakia huni txakabubu na mai anu hiwei ikibi ikama ishãkanikiki.

³¹ Huni pepã kesha anua hãtxa unanepa tashnimiski. Hakia habũ txakabu yuikubaĩmisbu kupikĩ hatũ hana meshtea keska wakĩ hatu nesewashanikanikiki.

³² Huni pepabũ hawara pepa yuikĩ habũ nĩkaibu hatu benimawakubaĩmisbuki. Hakia huni txakabubũ yuikĩ atimapa hãtxa besti yuikubaĩmisbuki.