Provérbios 1 - Kaxinawá Bíblia (BR)

Unanepã hãtxa kushipakiri yusinikiaki, na hãtxarã

¹ Davĩ huni bake Israelĩ enabu shanẽ ibuhaira Salomãonẽ yusĩti hãtxa

² hawenabũ tapĩtirubuwẽ taeshũ yusĩkubainikiaki, eska hatu yuikinã. Yusĩti inũ, unanepati inũ, merabewakĩ tapĩmati hãtxa nĩkai hau pekubainũbũ inũ,

³ yusĩti inũ, pe shinãmati inũ, txanima parãtima inũ, hawa txakabuwatima inũ, unanuma hiweti inũ, bebũkiri hĩ hĩ ikama yui pewati hau pehaira tapĩkubainũbũ inũ,

⁴ hawara bebũkiri unãriabuma tapĩ hau unanepashanũbũ, berunãbu shinãmati inũ nĩkaisbuma nemati hatu tapĩmakĩ hawẽ yusĩti hãtxa Salomãonẽ hawenabu haskawẽ hiwetirubu hawẽ kenenika hatu kenemashunikiaki.

⁵ Yurabu unanepa inũ tapĩhairanikatũ yusiã nĩkakĩ ana unanepahairakĩ dasibi haska tapĩkubaĩmis shinãkĩ ana shabakabi tapĩtirubuki,

⁶ unanepabũ yusĩti hãtxa inũ, habũ haska miyuiwẽ yusĩmisbu inũ, habũ hunea hãtxa nĩkakĩ pewakatsis ikinã.

⁷ Senhor Deus duawakĩ haki datekĩ hawẽ hãtxa nĩka pewakĩ unanepakĩ tapĩ taewabaĩtirubuki. Hakia tsuara unaĩsmapabũ unanepati inũ yusĩti hãtxa pepa danãmisbuki.

Salomãonẽ hawẽ bake yusinikiaki, na hãtxarã

⁸ Epaã, mĩ ẽ huni bakewẽ taeshũ ẽ yusiã mia yusinũ nĩkakĩ pewawe. Mĩ ewã yusiãri danãkĩ nĩkasyamashãwẽ.

⁹ Mĩ epã yusĩti inũ mĩ ewã yusĩti mĩ heneama hawẽ mĩ hawẽruai mia uĩtirubuki, teuti inũ maiti hawẽruahaira mĩ sawea keskarã.

¹⁰ Huni txakabubũ mia parãkatsis ikaibu hawa hatu nĩkakĩ txibãyamashãwẽ.

¹¹ Tsuãra mia yuikĩ: “Nukube kawe. Hawa shinãma hatu parãtã tsuara tenanũ bukãwẽ. Hawa nuku txakabuwamabia huai daĩbaĩkĩ detenũ bukãwẽ.

¹² Huni mawa maiwabu maĩ sheamis keska hatu wakĩ hunibu hiweabu hatu tenãkĩ nũ hatu yamawashanaii.

¹³ Hatu haska watã hatũ mabu yumetsushũ mabu betsa betsapa pepa bitã nukũ hiwe tibi nũ mata watiruki.

¹⁴ Haska wai mĩ nukube ka hawara bitã mibetã habiaskas nũ pashka pewakubaĩshanaii”, akĩ mia yuiaibu hatũ hãtxa nĩkama danãshãwẽ.

^15-16 Mĩ ẽ bakewẽ taeshũ epaã, txakabu txibãyamashãwẽ. Tsuara hawaira tenãkatsis ikaibube hatũ bai txibaĩ hatube kayamashãwẽ.

¹⁷ Isa peiyabũ uiaĩ berubi birũ wãkinã, hamẽ amisbuki.

¹⁸ Hakia ha huni txakabubũ hatu tenãkatsi ikĩ birũwã keska wakinã, ibubis hatũ hiwea mese wakĩ amisbuki.

¹⁹ Habunã, kemukĩ mabu besti hatu parãtã bikubainaibu ibubis haska kemui parananãmisbuwẽ taea hawẽ henei mawa bestishãkanikiki.

Unanepatũ hatu tapĩmakatsi hatu kenamisbukiaki, na hãtxarã

²⁰ Mae namakis bai tibi hashpa inũ hashpama anushũ unanepabũ hatũ hui hatu nĩkamakĩ

²¹ mae hanu hikikaĩti shui inũ hanu itxamisbu anushũri hatũ yusiã hatu yuikubaĩkĩ:

²² “Berunã hawa tapĩriabumaã, hawa unãma besti hiwenũ ika haska betxipai mã hatuki kasheai inũ unanepati hãtxa mã danãmisrã, hatiã mã heneshanai?

²³ Ẽ matu yusiaĩ ea nĩka pewai bekãwẽ. Ẽ matu nemaya mã ea nĩka pewaya ẽ shinã ẽ matu atximashanaii.

²⁴ Mã ea nĩkai benũbũ ẽ matu kenabia hushũ mã ea hawa nĩkakatsis ikamaki.

²⁵ Hakia hukatsi ikama ẽ yusiã hãtxa danãkĩ ẽ matu pewakatsi ikai ea anua mã hawa tapĩkatsi ikamaki.

²⁶ Hakia ma matu anu txakabuhaira huaya eãri ẽ matu usãshanaii. Datei mã mawakatsis ikaya ẽ matuki kasheshanaii.

²⁷ Mai anua niwe bei shubi shubi ibirãkĩ dasibi matu datebirãkĩ txakabuwabirãkĩ yamawabiranaya datei mã nuitapaya ẽ matuwẽ ana hawa nuiama ishanaii.

²⁸ Ha shaba haskaitiã tsuãra ea kenabiaya ẽ hawa hatu kemama ishanaii. Habũ ea benabiai hawa eki nukuama ishãkanikiki”, iwanã, hatu ana yuikĩ:

²⁹ “Unanepati hãtxa danãkĩ habũ Senhor Deus hawa duawakatsi ikabumaki.

³⁰ Hatũ shinã ẽ hatu pewamakatsi ibia ẽ hãtxa danãkĩ ẽ hatu yusiã nĩkakatsi isbumaki.

³¹ Hatũ hiweawẽ shinã txakakĩ txakabu tibi amisbuwẽ taea nuitapai bika tenekubaĩshãkanikiki, hatũ txakabu itxapa yaniwa keskairã.

³² Hawara pepa betsa betsapa tapĩkatsi isbumawẽ taea habũ hawa unãma mawashãkanikiki. Hawa yusiã pepawẽ nuisbumawẽ taea unaĩsmapa mawai yamashãkanikiki.

³³ Hakia habũ ẽ yusiã nĩka pewakubainaibu unanuma hiwekubaĩshãkanikiki, hawara txakabu mese huaya dateamarã”, anikiaki.