Números 24 - Kaxinawá Bíblia (BR)

¹ Israelĩ enabu Senhor Deusũ pepawa bestikatsis ikai unãtã ana habe hãtxakĩ hawẽ hãtxa nĩkai Balaão ana Deusbe hãtxai kama hakia hanu tsua hiweabuma anu ana uĩbaũkĩ

² Israelĩ huni bakebũ enabu shukuabu tibi meribi hiwebaunabu uiãyã Deusũ Yushĩ Pepatũ hawẽ hãtxati kushipa Balaão inãkĩ unãmaiwẽ taea

³ hau haska ikubaĩshanũbũ Balaãonẽ Balaque hãtxa wakĩ: “Beorĩ bake Balaão eska ẽ hãtxaii. Haska hunibũ uĩsbuma ma ẽ uiãki.

⁴ Nishi pae atã uiã keska shabakabi ẽ uĩshuki. Deus kushipahaira dasibi binuatũ ea hãtxa inã nama keskawẽ ẽ ma uiãki.

⁵ Eska ẽ hatukiri hãtxai ea nĩkawe. Jacó enabuũ, matũ tari hiwerã, hawẽruahairaki. Israelĩ enabuũ, matũ maerã, hawẽrua pepahairaki.

⁶ Maturã, hene kaya kesha shẽpã tatxa txaipaya bana mã mapubaina keskabuki. Maturã, Senhor Deusũ mã dau bana keskabuki. Maturã, pashku kesha mã kusha bana keskabuki.

⁷ Ũpash ati inũ hawẽ mibã tatxa ati hene itxapa netsunakama Israelĩ enabu hayashãkanikiki. Amaleque nawa shanẽ ibuhaira Agague kushipahairabiakẽ Israelĩ enabu shanẽ ibuhairakĩ hatu maemashanikiki. Israelĩ enabu shanẽ ibuhaira kushipakũkaĩshanikiki, mai ewapa atxi keyuirã.

⁸ Egito anua Senhor Deusũ hatu iwenirã, hawẽ kushipawẽ hatu nimarã, cavalo bene unicórnio mashũ txaipaya kushipa mesehaira keskabuki. Israelbuki yura betsa betsapa hatuki sinataibu hatu yamawakĩ keyushãkanikiki, pia kuĩwẽ hatu tsakakinã, hatu shau tekekĩ keyukinã.

⁹ Israelĩ enabu huĩrukuĩ maniabũ inu betsa leão huĩrukuĩ daka keskakẽ datekĩ tsuã bestẽwãkatsi ikamaki. Tsuabũra matu pepawaibu Senhor Deusũ haturi pepawashanikiki. Tsuabũra matu yupuaibu Senhor Deusũ hatu kupikĩ yupuriashanikiki” ikaya

Haska kubaĩshanaibukiri Balaãonẽ yuinikiaki, na hãtxarã

¹⁰ haska nĩkatã Balaque Balaãoki sinatahairai mekẽ nata txakã txakã akĩ yuikĩ: —Mĩ ea hatu yupushuniyunũ ẽ mia kenashĩshũ iweaki. Hakia ẽ hatuki sinatabiaya ẽ hãtxa danãkĩ mĩ hatu duawakĩ pepawashuki, dabe inũ bestikirã.

¹¹ Haskakenã, mĩ mae anu txĩtũrikaĩtãwẽ. Mia kẽwãkĩ duahairawanũ, iwanã, ẽ mibe yubakashina Senhor Deusũ mia ea hawa amashunama ishuki— aka

¹² Balaãonẽ kemakĩ yuikĩ: —Eska unãkĩ minabu mĩ hatu yunua ka bebũkiri ẽ hatu yuimaki, eskakirirã:

¹³ “Haska mã hakiri ea yuibiaibunã, hawẽ hiwe ewapa hawẽrua anua hawẽ ouro inũ prata mane arua ha dasibi mĩ shanẽ ibu Balaquẽ ea inãkuĩbia haska Senhor Deusũ ea yunua hakiri shinãma ibubis ẽ shinanẽ hawara pepa inũ hawara txakabu ẽ atirumaki. Hawara Senhor Deusũ yunukĩ ea yuia ha besti ẽ ashũtiruki”, akĩ ẽ hatu yuimaki.

¹⁴ Haskakenã, ẽ maekiri ẽ ma kaii. Hakia ẽ kariama ha yurabu minabube haskakubaĩshanaibu mia yuinũ ea nĩkawe— iwanã,

¹⁵ haskashanaibu Balaãonẽ hatu yuikĩ: “Earã, ẽ Beorĩ bake Balaãoki. Haska hunibũ uĩsbuma ma ẽ uiãki.

¹⁶ Nishi pae atã uiã keska shabakabi ẽ uĩshuki. Deus kushipahaira dasibi binuatũ ea hãtxa inã nama keskawẽ ẽ ma uiãki.

¹⁷ Hawara haska tashnishanai ma ẽ uĩshuki. Unu iriamahaira haskakũkaĩshanai bebũkiri ẽ unaiĩ. Jacó enabu anua huni kushipahaira tashnishanikiki, bishi bena txasha txasha ikai keskarã. Israelĩ enabu anu shanẽ ibuhaira benikaũshanikiki. Hatũ bushka butxusha keska wakĩ Moabe nawabu yamawashanikiki. Sete enabu pabiakubainaibu haburi butxushkĩ yamawariashanikiki.

¹⁸ Edom enabu Seir anuabu hatuki sinataibu hatũ mae mebĩshãkanikiki. Seir mebĩtã Israelĩ enabu pubẽ kushipakĩ yura betsa betsapa hatuki sinataibu binushãkanikiki.

¹⁹ Jacó enabu betsa tashnitã kushipakũkaĩkĩ mae itxapa mebinanãkĩ ha nawabu teshe tibi hatu keyukĩ yamawashãkanikiki.”

²⁰ Amaleque nawabũ maekiri uĩkĩ haska ishanaibu hatukiri Balaão huiwẽ nawakĩ: “Amaleque enabũ shukubauna kushipahaira hatu binukĩ keyubiabũ Israelĩ enabũ hawaira hatu dasibi yamawakĩ keyushãkanikiki, betsa teshe heneamarã

^21-22 Ha dikabi Queneu nawabũ maekiri uĩkĩ haska ishanaibu Balaãonẽ hatukiri yuiriakĩ: Caimnẽ enabuũ, matũ mae anu pashati hiwe kushipa teketirumabiakẽ mishki keyatapa anu matũ iruti na betsa betsapa anu mã irubiakẽ Assur nawabũ matu atxitã iyukĩ txi herewẽ matũ iruti na tibi yamawakĩ keyushãkanikiki”, atã

²³ hanushũ haska ishanaibu Balaãonẽ ana hatukiriri yuiriakĩ: “Peirawa! Deusũ hatu haska wamayarã, tsua ana hanu hiweshanimẽkaĩ.

²⁴ Natukã ewapa Quitim kesha anua shashu ewapa itxapawẽ pubẽ detenamenika kushipabu bekĩ Assur nawabũ mae tibi inũ Héber nawabũ mae tibi hatu detekĩ keyubirãshãkanikiki, yamawakinã”, ikĩ

²⁵ yui menetã Balaão hawẽ maekiri txĩtũkainaya Balaqueri hawenabube hawẽ mae anu txĩtũriabainibukiaki.