Mateus 8 - Kaxinawá Bíblia (BR)

Huni yuraki txamini Jesusũ kayawanikiaki, na hãtxarã

¹ Hanua Jesusũ hatu hãtxa wakĩ menetã mati anua butukiranaya yurã kaiãnẽ txibãbiranaibũ

² huni yuraki txamini habias baiwẽ Jesus huaiki nukutã ha bebũ dãti ishũ yuikĩ: —Yusĩnaã, ea kayawakatsis ikĩ mĩ ea kayawatiruki— aka

³ hawẽ txamiwẽ mesekĩ danãkĩ tsuã mekatsi ismabiakẽ Jesus hawẽ dabanã ikĩ meshũkaĩ mekĩ yuikĩ: —Ẽ mia shushawakĩ kayawaii— akaya hawẽ txami sakara iki dashnukui keyuaya

⁴ Jesusũ nemakĩ yuikĩ: —Ẽ mia yuiai nĩkairawe. Hawara ẽ mia ashukiri tsua yuiyamayukubaĩtãwẽ. Ha dukunã, Deusbe nukunabu hãtxashunika anu mĩ yura mĩ ma kayashu hatu uĩmatãwẽ. Haska mĩ ma kayashu hau habũ mikiri unãnũbũ habiaskari inãkuĩ Moisés yununi hatu anu buritãwẽ. Mĩ haska buaya mĩ ma kayashu habũ mia unãshãkanikiki— abainikiaki.

Romano capitãonẽ dayaru Jesusũ shushawanikiaki, na hãtxarã

⁵ Hanua Jesus Cafarnaum mae anu hikiaya ea anũ, iwanã, Romano capitão Jesuski nukushũ

⁶ yuikĩ: —Yusĩnaã, ẽ dayaru isĩ tenetxakayamai ma babua ana benitiruma nuitapahairaikiki— aka

⁷ Jesusũ yuikĩ: —Haskakenã, ẽ mia shushawashuĩ katiruki— akaya

⁸ ana capitãonẽ xinãtã yuikĩ: —Yusĩnaã, mĩ ea binua ẽ hawamaki. Ẽ hiwe anu kama mĩ kuxipa besti yunuwe, hau ẽ dayaru ea shushashununã.

⁹ Ha inũ, hatũ ea yunumisrã, ẽ shanẽ ibu hayaki. Eãri soldadobu yunui ẽ shanẽ ibumiski. Betsa yunukĩ: “Kawe”, ẽ wa kamiski. Betsa yuikĩ: “Huwe”, ẽ wa humiski. Ẽ dayaruri yunukĩ: “Ea ashũwẽ”, ẽ wa amiski— aka

¹⁰ Jesusũ nĩkai e itã ha hatxũ beaibu hatu yuikĩ: —Na haska nawa capitãonẽ ea ikũhairawai nukunabu Israelbũ ikũwaĩbu haska keska ẽ hatuki nukuriamaki.

¹¹ Eãnã, ikũ ẽ matu yuiaii. Deus shanẽ ibukĩ mai hirabi anua bari huaikiria inũ bari hikiaikiria ikũwaĩbu dasibibu hatu itxawatã duawakĩ Abraão inũ Isaque inũ Jacóbetã hatu pimashanikiki.

¹² Hakia nukunabu Deusũ yubabiani hawẽ hãtxa txibãkĩ ikũwãbumakẽ hatu danãtã hanua kashai sheta yẽsh yẽsh imisbu mexuhaira merã hatu urẽshanikiki— itã

¹³ Jesus nasaukekawã capitão yuikĩ: —Haska mĩ ea ikũwaĩwẽ taeshũ ẽ mia ashũshuki. Mĩ hiwe anu kariwe— akaya habiatiãri hawẽ hiwe anua hawẽ dayaru shushanikiaki.

Pedrõ dais aĩbu inũ isĩ betsa betsapa teneaibu Jesusũ hatu shushawanikiaki, na hãtxarã

¹⁴ Hanua hawẽ hiwe anu Simão Pedrõ Jesus iyua kai hikitã habianuri hawẽ dais aĩbu yuna daka uĩtuxikĩ

¹⁵ Jesus hawẽ nuikĩ metsũshũ yuna shushawa benikirã duawakĩ bawashũ hatu pimaya

¹⁶ hanua ma bari kai mexuaya ha mae anu hiweakeakeabũ yushĩ txakabu hayabu inũ isĩ betsa betsapa teneaibu Jesus anu iweabu yushĩ txakabu kaĩmakĩ isĩ teneaibu dasibi shushawanikiaki.

¹⁷ Deusũ hãtxa yuishunika Isaíasĩ yuikĩ: “Deusũ Katuatũ nũ isĩ teneai maĩwãkĩ nuku shushawashanikiki”, akĩ hatu bebũkiri yuini Jesusũ habiaskari wakĩ hatu anikiaki.

Jesus txibanũ, iwanã, yukanibukiaki, na hãtxarã

¹⁸ Shaba betsatiã hanushũ dasibi hatu shushawaxina tsaubaũshũ daketapawaibu uĩkĩ hawẽ tsumabu Jesusũ yuikĩ: —Iã kesha betsauri huĩrukuĩ nũ bunũbũ matũ shashu pewakãwẽ— hatu wa pewaibũ

¹⁹ Deusũ hãtxa kenenibu yusĩnanãmis betsa hushũ Jesus yuikĩ: —Yusĩnaã, hanira mĩ kai anu ẽ mia txibãkatsis ikaii. Mibe kapa?— aka

²⁰ hawẽ xinã unãnũ, iwanã, Jesusũ yuikĩ: —Kamã inu hawẽ kini hayaki. Peiyabu hawẽ na hayabuki. Hakia matũ Hutxi Kayabi Iuwa eã ẽ hatu yusĩkubaunai hanu ushati hiwe ẽ hayamaki. Ẽ ikai keskai mĩ iriatirumẽ?— akaya

²¹ haki txiti ika betsãri Jesus yuikĩ: —Shanẽ Ibuũ, ea heneyuwe, ha dukũ ẽ epa mawa maiwatã ẽ mia txipu txibãshanairã— aka

²² nemakĩ Jesusũ yuikĩ: —Haskamaki. Habũ ea txibãbuma mawa keskabũ mĩ epa mawa mia maiwashũtirubuki. Hakia mianã, na habiatiã tapĩ ebe kawe— abaini

Niwe inũ iãnẽwã Jesusũ nemanikiaki, na hãtxarã

²³ hanua hawẽ tsumabube shashũ inatã tu abaini kaya

²⁴ iãnẽwã besusi pukeaibũ Jesus ma bika shashu txishukiri daka ushakẽ hanua niwe kuxipahaira bekĩ hene buspu tsaubirãkĩ shashu hene matawa ma hiki kemaya

²⁵ datei Jesus anus itxashũ datekĩ bestẽwãkĩ yuikĩ: —Yusĩnaã, yusĩnaã, menã nuku merabewariwe, hiki nũ hasatirukirã— akabu

²⁶ bestẽtã hatu yuikĩ: —Haskai mã dateai? Mã ea ikũ kayabiwariamamẽ?— itã benikawã niwẽwã inũ iãnẽwã buspu tsaubiranai nemakĩ: —Nesewe. Peswe— aka niwe maĩ neseaya iãnẽwãri betxuruni maiãyã

²⁷ e itã hawẽ tsumabu yuinamekĩ: —Na hunirã, hawa hunimẽ? mĩ atirumakirã. Niwe inũ iãnẽwanẽri nĩkaikikirã— ibaini bui

Huni dabe yushĩ txakabu haya Jesusũ kaĩmanikiaki, na hãtxarã

²⁸ hanua kai iãnẽwã kesha betsauri mai pakea Gadara anu keti itã Jesus bututã mapekekainaya hanua huni dabe yushĩ txakabu hayabu hanu mawabu maiwamisbu anu besti hiwea pubẽhairakẽ hatuwẽ datei tsuã dũkebaĩsma maiwati anua kaĩbirani Jesuski nukuaibũ

²⁹ yushĩ txakabũ hatu bis imakĩ yuimakĩ: —Jesusuũ, mĩ Deusũ bake nũ unaiĩ. Nukurã, mĩ nuku haska wai? Hanu kupiaitiã iriamabiakẽ unãti wakĩ mĩ nuku kupi huai?— iwanã,

³⁰ ha mati anushũ ina yawa itxapabũ pikĩ mai misheshaibu

³¹ yushĩ txakabũ uĩtã Jesus yukakĩ: —Mĩ nuku kaĩmakĩ nitxĩainã, ua ina yawa anu nuku nitxĩwẽ, ha merã nũ hikinunã— akabu

³² Jesusũ hatu yuikĩ: —Peki. Hari butãkãwẽ— hatu wa ha huni dabe anua yushĩ txakabubu kaĩbaini ina yawa merã hikibainaibũ ha ina yawa datei mawa keyatapa butei niri ibaini iãki pukui keyutã hasai keyuaibũ

³³ haskai uĩtã ha ina yawa mekenikabu datei kuxibaini mae anu bushũ huni dabe yushĩ txakabu hayabu haskashu hatuki txaniakeakeaibũ

³⁴ hanua ha mae anua yura itxapa kaĩbirã haskashu uĩnũ ika Jesus anu beshũ ina yawa hasai keyukãshu uĩtã datekĩ Jesus nitxĩkĩ yuikĩ: —Nukũ mae anua kariwe— anibukiaki.