Mateus 7 - Kaxinawá Bíblia (BR)

Hatu unãti watã txitenametimakiri Jesusũ hatu yusĩnikiaki, na hãtxarã

¹ ana hatu yuikĩ: —Tsuara ha akĩ txitekĩ unãti wayamashãkãwẽ. Mã hatu haska wamakẽ Deusũri habiaskari wakĩ matu txitekĩ ha akamari ishanikiki.

² Hamẽ hatuwẽ nuiama txitekĩ mã hatu ha amiskẽ habiaskari wakĩ Deusũ ha mã hãtxai ha imiswẽ Deusũ matu ha akĩ txiteriashanikiki. Ha inũ, habias xinãwẽri mĩ hatu unãti wamiswẽ Deusũ maturi unãti washanikiki, kaneamarã.

³ Haskakĩ ikũwaĩ betsa pewakĩ merabewanũ, iwanã, hawẽ hamapai ture hawẽ beruki hikia mĩ bikatsis ikairã, mina anu ha dukũ ha hi ewapa mĩ haya mĩ xinãmamẽ?

⁴ Hi hirabiwẽ betimanabia hawa xinãma yuikĩ: “Hani mĩ hi pese beruki ikarã, mia bipa?” akĩ kanekĩ mã yuimiski.

⁵ Hakia bemakis beparamei hãtxamisbuũ, maturi txakabubia betsã txakabuai uĩkĩ mã ha amiski. Mã hi hirabi betimanabia tsekashũ puta keska watã matũ huĩti meranua matũ txakabu ewapa putatã ana kaneama merabenãkĩ hi pese mĩ haibũ beru anua bia keska wakĩ huni betsã txakabu beshmas hayari merabewakĩ mã yusĩtiruki.

⁶ —Haska inũ, hawara pepa Deusuna kamã pubẽ mã inãtirumaki, hawẽ unãti watã matu keyutiruwẽ taeshunã. Habiaskari wakĩ ina yawa pubẽ mã mabu pepa inãtirumariki, txakabuwakĩ hau matu pema pema akãyamanunã. Habiaskari wakĩ tsuabũra Deusũ hãtxa danãhairamistũ hau matu deteyamanũbũ hatu ana yusĩyamakubaĩshãkãwẽ— iwanã,

Deus yukai txikixtimakiri Jesusũ hatu yusĩnikiaki, na hãtxarã

^7-8 ana hatu yuikĩ: —Haska inũ, betsarã, tsuãra Deus yukakĩ ea akarã, hawẽ hawara inãmiski. Tsuãra hawara benakĩ Deus yukarã, haki nukumamiski. Tsuãra hawara bi hikinũ ishũ Deus kenarã, bepẽshũmiski. Haskakẽ xinãtxakama Deus ea akarã, betsaki. Hawara mĩ yuka mia ashũtiruki. Benakĩ hawara mĩ yuka mia betximashanikiki. Hawara bi habe hãtxanũ ishũ mĩ kena mia bepẽshũshanikiki.

⁹ —Ha inũ, matũ bakẽ misi matu ea aka haki dakekĩ mixki mã inaĩsmaki.

¹⁰ Ha inũ, baka matu ea aka haki dakekĩ dunu mã inaĩsmariki, hatuwẽ nuikinã.

¹¹ Haskakẽ matũ xinã pepamabia matũ bakebu mã duawamis mã unaiĩ. Hamẽ tsuãra Epa Deus nai anua ea akĩ mã yukarã, hawara pepa yauxiama matu inãtiruki.

¹² Haska inũ, betsarã, tsuara miwẽ nuikĩ hau mia merabewashanũbũ matũ dukũ haska xinãkĩ uĩmakĩ hatu merabewakubaĩshãkãwẽ, haska wai nuikipakĩ mã kaneamakirã. Habias xinãwẽ Deusũ hãtxa yuishunikabubetã Moisés hatu yusĩnirã, haki dasi watã na habias yununi hakimama xinaĩ mã hatube merabenãkũkaĩshanaii— iwanã,

Bai dabekiri Jesusũ hatu yusĩnikiaki, na hãtxarã

^13-14 ana hatu yuikĩ: —Txi nukaismakiri kairã, hanu hikiti shui inũ hawẽ kati bai hashpa keska hawẽ kai bikamawẽ taea yushĩ txakabũ bai abui yurã kaiã itxapa hawẽ bumisbuki. Hamẽ hiwekuĩakiri kairã, hanu hikiti shui inũ hawẽ kati bai haxu bika keskawẽ taea ha bai benakubaini atimas nukutã yura eskarabes hawẽ bumisbuki. Maturã, ha bai haxuki nukutã hawẽ bukĩ ea txibãkubaĩkãwẽ— itã

Hi tibi hawẽ bimiwẽ unãtiki, akĩ yusĩkĩ Jesusũ hatu unãmanikiaki, na hãtxarã

¹⁵ —Ha inũ, betsarã, ha parananãmisbu pepa keskakĩ Deuskiri yusĩbiakĩ hawẽ huĩti inu pubẽ keskã txani hãtxa matu yusĩaĩbu ana nĩkama hatu uĩrakubaĩkãwẽ.

¹⁶ Nixi mushaya anua uva bimi mã tsekaismaki. Ha inũ, isne musha anua figueira bimi batapa mã tsekaismariki. Habiaskari wakĩ haskai hiwemisbu pepaibu inũ txakabuaibu uĩkĩ ha parananãmisbu mã unãshanaii, haskai hiwemisbu uĩkinã.

^17-18 Ha inũ, hi pepa bimiai txakabu ikama pepa bestimiski. Hamẽ hi txakabu bimiai pepamari txakabu besti iriamiski.

¹⁹ Hanua hi bimiuma tibi deratã kuamisbuki.

²⁰ Haskakẽ haratura bimi txakabu haya keskatũ tsuabura yusĩ pewakĩ hatu merabewabuma unãtã danãkĩ hatu nĩkayamakubaĩshãkãwẽ— itã

Deusũ yunuawẽ besti amisbu hawenabukiri Jesusũ hatu yusĩnikiaki, na hãtxarã

²¹ —Ha inũ, tsuabũra hatũ kesha bestiwẽ ea kenakĩ: “Shanẽ Ibuũ, Shanẽ Ibuũ”, ea wabiakĩ haska xinaĩsbumarã, habũ ẽ Epã hãtxa txibãma nai anu nukube hiweama ishãkanikiki. Hakia ẽ Epa nai anuatũ hawara yununi inũ abuai txibãkĩ akubaĩmisbu besti nukube hiweshãkanikiki.

²² Na haska ẽ matu yuiai keska enabu kayabi hatu itxawanũ ika ẽ ana huaya itxapabũ ea yuikĩ: “Shanẽ Ibuũ, Shanẽ Ibuũ, mikiri yusĩkubaĩkĩ mĩ kena kuxipawẽ yuikĩ yushĩ txakabu nitxĩkĩ dami atimaska betsa betsapa nũ mia ashũkubaĩmiski. Nukuri katuriwe”, ea akaibu

²³ hatu yuikĩ: “Parananaĩ txanitxakakĩ mã txakabuwamiski. Mã enabumaki. Turi burikãwẽ”, ẽ hatu washanaii— itã

Unanepabukiri inũ unaĩsmapabukiri Jesusũ hatu yusĩnikiaki, na hãtxarã

²⁴ Hakia habũ ẽ hãtxa nĩkakĩ akubaĩshanaibukiri miyuiwẽ matu yusĩnũ nĩkakãwẽ. Tsuãra hiwe wakatsi ikĩ mai basãbaĩkĩ uke merã mixkiki pesashũ haki mixki tsamabirãkĩ hiwe waimakẽ

²⁵ hanua ui ika bai matahairabirãkĩ hawẽ hiwe atxia ha hiwe mixkiki tsamiãwẽ taea niwẽwãnẽ tsibusketiruma keska hawẽ daya benuama ha huni unãnepaki. Ẽ hãtxa nĩkamisbu haska keskaki.

²⁶ Hamẽ hawara ẽ yuiai danãkĩ txibaĩsbumakiri matu yuinũ nĩkakãwẽ. Tsuãra hiwe wanũ, iwanã, maxi anu basãkĩ kini txai wama beshãtu besti watã mixki tsamabirãkĩ habebis watã hiwe waimakẽ

²⁷ hanua ui ika bai matahairakĩ hawẽ hiwe atxia mixkiki tsamĩamawẽ taea hawaira niwẽwã bekĩ tsibuskea di ika keskakĩ hawẽ daya benuhairamisbuki. Haska dayamisbu keska patapabuki, ẽ hãtxa danaĩburã— akĩ hatu yusĩkĩ hãtxa meneai

^28-29 nĩkai: “Betsabũ Deusũ hãtxa nuku yusĩmisbu keskamaki. Hakia shanẽ ibu kuxipa keskakĩ nuku yusĩbikaĩ!”, iki Jesusũ hatu yuiai nĩkai e iake iakenibukiaki.