Mateus 18 - Kaxinawá Bíblia (BR)

Tsua Jesusbe ha katxu nũ shanẽ ibushanai? ikĩ shinãnibukiaki, na hãtxarã

¹ Habias shabatiãri nũ hawẽ tsumabu Jesuski itxashũ yukakĩ: —Mibe shanẽ ibukĩ haratu betsã nũ hatu binushanimẽkaĩ, nuku yuiwe— nũ wa

² hanushũ nuku yusĩnũ, iwanã, bakeixta kena huai namakis nitxĩshũ

³ nuku yuikĩ: —Ikũ ẽ matu yuiaii. Bake mixtĩbũ hawa dateama ea ikũwaĩ txĩtũkatsi ikama ea txibãkubaĩtirubuki. Tsuabura haska keskariakĩ hawa keãma ea ikũwãkĩ txibãmarã, nai anu mã ebe hiwei shanẽ ibutirumahairaki.

⁴ Hakia tsuara huni ewabia na bakeixta keskai ibubis keãma hatu merabewa bestikubaĩmisbu ebe shanẽ ibukĩ betsabu mã binushanaii.

⁵ Ha inũ, ea duawanũ, iwanã, na bakeixta keska wakĩ tsuara ẽ kenaya huai ea ikĩ akawakĩ mã duawatiruki— iwanã,

Yura betsã hawara hatu txakabuwamai mesekiaki, na hãtxarã

⁶ ana nuku yuikĩ: —Tsuabũra hawara Deusũ nemamis inũ yunumis txibãma txakabu wamisbũ bake mixtĩbũ ea ikũwaĩ hatu parãkĩ txakabu hatu amakeakeriamisburã, haskawẽ taeshũ Deusũ hatu kupihairashanaiwẽ taea hawẽ shekiwã deneti mixki ewapa neshashũ teumatã iãnẽwã merã pukua hasarã, hawẽ kupiti beshmas mekeanaii.

⁷ Ha inũ, hamapai betsa betsapawẽ kemukĩ yurabũ txakabuwamisbuki. Hakia tsuabũra enabũ Deusũ yunumis inũ nemamis xinãbiaibũ huĩti babubu parãkĩ hatu txakabu amakeakemisbu haburi Deusũ hatu kupia nuitapahairashãkanikiki.

⁸ Haskakẽ matũ mekẽ kasmai matũ taewẽ hawara mã txakabuwakubainai matũ mekẽ kasmai matũ tae meshtea keska watã hawaira henekubaĩkãwẽ. Mã mekẽ dabeya inũ mã tae dabeyakẽ hanu txi nukaisma anu matu urẽa pemahairaki. Hakia mekẽ bestitxaiya inũ tae bestitxaiya Deusbe hiwei kai peki.

⁹ Ha inũ, matũ beru betsawẽ hawara uĩkĩ mã txakabuwakubainai beru betsa tseka keskatã hawara mã txakabuwai hawaira henekubaĩkãwẽ. Mã beru dabeyakẽ hanu txi nukaisma anu matu urẽa pemahairaki. Hakia beru bestitxaiya Deusbe hiwei kai peki— iwanã,

Txashuwã benua benamisbu keska miyuiwẽ Jesusũ hatu yusĩnikiaki, na hãtxarã

¹⁰ ana nuku yusĩkĩ: —Na bakeixtã ea ikũwaĩ keskabu hawa keĩsbumarã, Deusũ nai tsumabũ hatu mekei ẽ Epabe beisinaĩ habe hãtxakĩ hatu merabewamisbuwẽ taeshũ hawa hatu itxakawakĩ danãyamakubaĩkãwẽ— iwanã,

^11-14 —Miyuiwẽ matu yusĩnũ nĩkakãwẽ. Tsuara 100 txashuwã haya bestitxai benua 99 besti basi mati anu mapukẽ heneyubaĩ bestitxai benua mã benamisbuki. Haskamamẽ? Haskakẽ ha 99 benuabumawẽ benimabiakĩ atimas ha bestitxai benua betxitã mã hawẽ benimahairamiski. Habiaskari wakĩ matũ Epa nai anuatũ hawa bestitxai bakeixtã ea ikũwaĩ benukatsi ikamaki— iwanã,

Ikũwaĩ betsã mia txakabuwa hakimawatikiaki, na hãtxarã

¹⁵ ana nuku yusĩkĩ: —Ea ikũwaĩ betsã kanekĩ mia txakabuwa habes hãtxai pekĩ harakirira mia txakabuwashu hau unãnũ yuiwe. Mia nĩkaya mĩ habe haibunameshanaii.

¹⁶ Hakia mia nĩkamakẽ hanushũ ea ikũwaĩ bestitxai kasmai dabe hatu kenatã hariri mia txakabuwaxina habias hãtxari haturi banabimatã hatũ mia txakabuwaxina anu hatu iyuwe, hau habũri mia merabewanũbunã.

¹⁷ Hanushũ hatũ hãtxari nĩkamakẽ matũ itxati hiwe anu iyushũ haturi banabimariawe. Hanushũ habũ pewakĩ yusĩaburi binu keyukĩ nĩkamakẽ haskawẽ taeshũ ikũwãbuma inũ governo pei bishunika txakabuwẽ meseisma keska wakĩ hatu danãkubaĩshãkãwẽ.

¹⁸ Txanima ẽ matu yuiaii. Nenushũ ikũwaĩbu yusĩkĩ mã hawara nemaya Epa Deusũri nemashanikiki. Hawara nenushũ mã nemashunamakẽ Epa Deusũri nemama iriashũshanikiki.

^19-20 Ha inũ, ikũwaĩbu dabe kasmai dabe inũ besti itxabu ẽ kenawẽ hãtxakĩ yukaibu ẽ kuxipawẽ ẽ hatube naxui ika ikũkaĩshanaii. Habiaskari wakĩ matu dabetũri habias xinãkĩ hawara pepas Deus mã ea aka matu ashũshanikiki— nuku waya

²¹ hawẽ hãtxa nĩkatã Pedrõ Jesus yukakĩ: —Yusĩnaã, mia ikũwaĩ betsã ea txakabuwaya hatiki hawẽ txakabu hakimawashãpa? Metutikiraka?— aka

²² Jesusũ nemakĩ: —Haskamaki. Metutiki bestimaki. Hakia mĩ txakabu Deusũ mia tanaismaki. Haskawẽ taeshũ hawẽ txakabu tanama hakimakũkaĩshãwẽ— iwanã,

Shanẽ ibuhairatũ tsumapã habe dayaru betsa ha deveawẽ nuiama inikiri Jesusũ hatu yusĩnikiaki, na hãtxarã

^23-24 miyuiwẽ habiaskari nuku dasibi yusĩkĩ: —Deus shanẽ ibui haskamiskiri matu yusĩnũ nĩkakãwẽ. Shanẽ ibuhaira hawẽ tsumabũ deveabu pewanũ, ishũ hawẽ tsuma betsabu yunukĩ: “Ea deveabu ea ishũtãkãwẽ”, hatu wa huni betsã itxapahaira devea iweshunabu

²⁵ ha hawẽ tsumapã devehaira hawawẽ pakatirumakẽ ha shanẽ ibũ hawẽ tsuma betsabu yunukĩ: “Na ea devehaira hawawẽ ea pakatimaki. Haskakẽ hawara ea devea hau hawẽ ea pakakĩ keyunũ hawẽ hawara inũ, na huni inũ, hawẽ aĩ inũ, hawẽ bakebu hatuwẽ pei bikatsi hatu inãkãwẽ, hau huni betsa dayashunũbunã”, akaya

²⁶ ha devea haska wai nĩkatã hawẽ shanẽ ibu namã dãti ishũ nemakĩ: “Shanẽ ibuũ, ea haska wama ewẽ nuiyuwe, txipu unãshubira ẽ mia pakakĩ keyukubaĩshanairã”, aka

²⁷ haska wa nĩkatã hanua hawẽ shanẽ ibu hawẽ nuikĩ: “Dasibi mĩ ea devea ẽ hakimai ana ea pakayamashãwẽ. Ana hawẽ nuiama inũ kariwe”, aka

²⁸ hanua kaĩ kaini kakĩ hawẽ shanẽ ibũ tsuma betsa haki nukutã eskarabes devebia hawẽ pei binũ ishũ tetsũshũ yuikĩ: “Mĩ ea devearã, ikis ea pakariwe”, ashũ henea

²⁹ ha namã dãti ishũ nemakĩ: “Hawaira ikis hawawẽ ẽ mia pakatirumaki. Ewẽ nuikĩ manayuwe, txipu unãshubira ẽ mia pakashanairã”, abia

³⁰ hawa nĩkama bitxiti hiwe anu iyukĩ policiabu hatu bitximaniki, hanushũ ha devea pakamakẽ kaĩtirumawakinã.

³¹ Haska wai hawẽ shanẽ ibũ tsuma betsabũ uĩ hawẽ nuihairakaĩ hatũ shanẽ ibu anu bushũ ha hunĩ haska washu dasibi yuiabu

³² hanushũ hatũ shanẽ ibũ hawẽ tsumabu yunukĩ hatu yuikĩ: “Ẽ tsumapã ea devea ẽ hakimabiashu ha hatũ haska washurã, ea ishũtãkãwẽ”, hatu wa ishũtanabu yuikĩ: “Mĩ huni txakabuhairaki. Itxapahaira mĩ ea devebiashũ ea ea akĩ mĩ ea nema miwẽ nuikĩ dasibi mĩ ea devea ẽ mia hakimashũshuki.

³³ Haska xinãtã ẽ mia hakimashu keskai miari ẽ tsuma betsã mia hatira devea mĩ hakimatixarashuki”, atã

³⁴ hawẽ shanẽ ibu haki sinatahairakĩ bitxiti hiwe merã hari hau bitxitanũbũ yununiki, hau harishũ ha devehairatũ hau pakakĩ keyushanunã.

³⁵ Matu mã haska keskariai ikũwaĩ betsã mia txakabuwa hawẽ nuikĩ hau ewẽ nuinũ, iwanã, mia yuibiakẽ miari hawẽ nuiama mĩ hakimamakẽ ha shanẽ ibu keskai ẽ Epa Deus nai anua matuwẽri nuiama ishanikiki, matũ txakabu buamarã— nuku aniki.