Mateus 18:16 - Kaxinawá Bíblia (BR)

¹⁶ Hakia mia nĩkamakẽ hanushũ ea ikũwaĩ bestitxai kasmai dabe hatu kenatã hariri mia txakabuwaxina habias hãtxari haturi banabimatã hatũ mia txakabuwaxina anu hatu iyuwe, hau habũri mia merabewanũbunã.

Kashinawa : Diosun Jesúswen taexun yuba bena yiniki

¹⁶ Jakia mia ninkamaken januxun ea ikunwain bestichai kasmai dabe jatu kenatan jadidi mia chakabuwashina jabias janchadi jatudi banabimatan jatun mia chakabuwashina anu jatu iyuwe, jau jabundi mia medabewanunbunan.

Mateus 18:16 Referencias Cruzadas

1 Reis 21:13

hanushũ huni txakabu dabe ha parã hãtxawẽ Nabotekiri hatu yuiaibu hikia tsaushũ yurabu dasibi bebũshũ txanitxakakĩ hatu yuikĩ: —Nukũ mekenika Deus inũ nukũ shanẽ ibuhaira yuãkĩ hatukiri Nabotẽ txakabuhaira yuiai nũ nĩkashinaki— akabu hatũ hãtxa txanibiakẽ ikũwãkĩ Nabote atxibaĩkĩ tashnimabaĩ benãta iyushũ mashash tũkuwẽ tsaka tsaka akĩ tenãtã

João 8:17

Hanushũ Deusũ Moisés yuia matu keneshunirã, ha uĩkĩ hawara hakiri huni dabe habias hãtxa txaniaibu hawẽ hãtxa mã ikũwãtiruki, ikũkenã.

2 Coríntios 13:1

Yurabu mai hirabi anu mekẽnũ ika Jesus babuyunikẽ hunibũ atxishũ cruzki netãtã tenaĩbu Jesusũ hatu nemamakẽ hanua ma tenãbu Deusũ hawẽ kuxipawẽ ana bestẽwaniki. Haskakẽ nukũ Shanẽ Ibu keska babuyui hawẽ kuxipa Deusũ nukuwẽ matu unãmamiswẽ taea niti ikama Cristobe nũ hiwekuĩkũkaĩshanaii. Habiaskabiakẽ Cristõ kuxipawẽ ẽ matu yunumismẽkaĩ mã unãkatsis ikaibu matu anu ana kashũ Cristõ hãtxa txanima kuxipawẽ ẽ matu ha atiru ẽ matu uĩmai kashanaii. Ẽ matu yusĩtani ana matu yusĩ matube ana ka hiwea ẽ yubakayama keska txai hiwebia matu dapishũ ẽ yuiai keska ana ẽ matu banabimai nĩkairakãwẽ. Haratubũra ikũwaĩbũ txakabuwakĩ hatũ huĩti ana pewariabuma ẽ ana hatuwẽ nuiama iki kashanaii. Eska Deusũ yunua Moisés hatu yununiwẽ besti nũ hatu unãti watiruki: “Tsuãra txakabuwai hawẽ hãtxa unãkĩ yura dabe kasmai dabe inũ bestitũ hakiri txanii pikuaibũ habũ hãtxa ikũwãtirubuki”, ini ha yusĩa txibaĩ matũ itxati anu itxashũ habu txakabumẽkaĩ haska unãtinaĩ txitenamei penamebukũkãwẽ.

Deuteronômio 19:15

Shanẽ ibu bebũshũ yura betsaki sinatakĩ kũyã akĩ shanẽ ibu yuikĩ: “Natunã, ma txakabuwashuki”, akĩ bestitxaitũ haska hawara hakiri txakabu yuibiaya shanẽ ibubũ hau nĩkayamanũbũwẽ. Hakia dabetũ kasmai, dabe inũ bestitũ habias hãtxawẽ txitekĩ yuiaibu nĩkashũ unãti watã shanẽ ibubũ kupitirubuki.

1 Timóteo 5:19

Haska inũ, mekenikatũ txakabu wakĩ kaneaikiri huni bestitxai miki txanikĩ hakiri mia yuiai nĩkayamayuwe. Hakia mekenikakiri habias txakabukiri dabe kasmai dabe inũ bestitũ mia yuiaibu: “Txanimẽkaĩ? Txanimaraka?” ikĩ unãti watiki.

Hebreus 10:28

Nukũ shenipabũ Deusũ Moisés yusĩa hãtxa nĩkama txakabuwaibu dabe kasmai dabe inũ besti habias hakiri yui kaneabumakẽ hatu unãti watã hawa hatuwẽ nuiama kupikĩ tenãpaunibukiaki. Natiã ha yununi mese hayayuaki.

Apocalipse 11:3

Hanushũ ea Deusũ ẽ tsuma dabe ẽ kuxipa inãkĩ ẽ hatu yunua yurabuwẽ nuihairakĩ besha tari sawetã 1.260 shaba ẽ kakape yusĩ hãtxakubaĩshãkanikiki”, ea washu