Mateus 12 - Kaxinawá Bíblia (BR)

Huĩrukũtitiã hawẽ tsumabũ shekiwã bimi tsekashũ pikubainibukiaki, na hãtxarã

¹ Hatiãra ana huĩrukũti sábado betsatiã shekiwã bai namakis manã baiwẽ nũ hawẽ tsumabu Jesusbe bukĩ shekiwã bimi tsekashũ daxukiri ashũ bunikĩ nũ pikubainaibũ

² fariseubũ nuku txibãkĩ uĩkĩ Jesus ha akĩ: —Uĩwẽ. Huĩrukũti sábadotiã dayakĩ Deusũ Moisés nuku nemamani mĩ tsumabũ kanekanikiki— akabu

³ Jesusũ hatu kemakĩ: —Bunikĩ hawara nukũ shenipabu pepa Davĩ hawẽ haibuaibubetã anirã, mã uĩsmamẽ? Matu yuinũ nĩkakãwẽ.

⁴ Deus kẽwãti tari hiwe merã Davi hikishũ Deusũ Moisés yusĩniwẽ taeshũ Deusbe nukunabu hãtxashunikabũ besti pitibiakẽ hawẽ Deus kẽwãti misi Davĩ bishũ pitã hawẽ haibuaiburi pimarianiki.

⁵ Ha inũ, Deusbe nukunabu hãtxashunikabu huĩrukũti tibi Deus kẽwãti Templo anu dayakubaĩkĩ kaneabumakiri Deusũ Moisés kenemani mã xinãmamẽ?

^6-8 Hamẽ ẽ kuxipawẽ Templo ẽ binuaiwẽ taeshũ huĩrukũtitiã haska hau akubainũbũ hawẽ yunuti inũ hawẽ nemati ẽ hatu yunuriatiruki. Ẽ matũ Hutxi Kayabi Iuwa haska kuxipa ẽ hayaki. Deusũ hãtxa yuishunika Oséias Deusũ yuimakĩ: “Yura betsabuwẽ nuikãwẽ, ea kẽwãkĩ txashuwã kuakĩ menuai bestiwẽmarã”, aka hatu keneshuniki. Matũ huĩti merã na hãtxa xinãkĩ na hunibũ kaneabuma unãkĩ mã hawa yuiama ikeãshuki— hatu abainiki.

Huĩrukũtitiã huni meyuxki Jesusũ kayawanikiaki, na hãtxarã

⁹ Habias huĩrukũti sábadotiã habia baiwẽ kai mae betsa anu hikitã hatũ itxati hiwe merã hikishũ Jesusũ hatu yusĩayã

¹⁰ habianuri huni mekẽ meyuxki hatube itxa tsaukẽ hawẽ yusĩa danãkĩ fariseubũ Jesus yuãnũ, iwanã, yukakĩ: —Huĩrukũtitianã, Moisés nuku keneshuni txibãkinã, huni isĩ teneai shushawatimẽ?— akabu

¹¹ Jesusũ hatu kemakĩ: —Matunã, huĩrukũtitiãbiakẽ matũ txashuwã ũpash biti kini merã kawani pukua hawaira kaĩ neshekĩ mã dayariamiski.

¹² Huĩrukũtitiã matũ inawẽ nuikĩ mã merabewabiamiskẽ Deusũ matu binumakĩ yurabuwẽ nuihairakĩ habiatiãri hatu merabewamiski. Haskakẽ huĩrukũtitiã tsuãra shushawai dayabiakĩ kaneamaki— iwanã,

¹³ huni mekẽ meyuxki yuikĩ: —Mĩ mekẽ mexãwẽ— aka mexãyã hawẽ mekẽ betsa keskai ma mepekei peaya

¹⁴ haska washu fariseubũ uĩ haki sinatai kaĩbaini haska washũ Jesus tenãtimẽ ika yuinamei yubakai taenibukiaki.

Deusũ hãtxa yuishunikã hakiri keneni shabakabi Jesusũ hatu yusĩnikiaki, na hãtxarã

¹⁵ Hanushũ hatũ xinã unãtã Jesus kaĩkainaya yurã kaiãnẽ txibaĩbũ isĩ teneaibu itxapa Jesusũ hatu shushawakĩ

¹⁶ mae betsa betsapa anu hau tsuki txaniyamanũbũ hatu nemakubainiki.

¹⁷ Habiaskari bebũkiri Jesuskiri hawẽ hãtxa yuishunika Isaías Deusũ yuikĩ:

¹⁸ ‘Ẽ tsuma ẽ katunirã, ẽ abuai ea benimawamiski. Ẽ Yushĩ Pepa ẽ yunua merabewaya pepakiri ẽ tsumapã yurabu shukuabu tibi yuibaũshanikiki.

¹⁹ Hãtxa kuxipawẽ huni betsa ha akama mae tibi anushũ hawẽ hui kũyã ikai nĩkabuma ishãkanikiki.

²⁰ Txakabu maemakĩ binuriama yurabuwẽ nuikĩ tawa yuxtu sẽkeama keska wakĩ huĩti babubu danãma ishanikiki, bĩ pahi ibubis nukabiai nukama keskarã.

²¹ Hanushũ txakabu binuaya nawa shukua betsa betsapabũ ikũwãkĩ ẽ tsuma manashãkanikiki’, aka nĩkatã keneniki. Haska hakiri keneni menekĩ Jesusũ yusĩkĩ hatu shushawakubainiki.

Jesusrã, yushĩ txakabũ kuxipa hayaki, anibukiaki, na hãtxarã

²² Habianushũri yushĩ txakabũ huni beshush wakĩ huyu wani Jesus anu iweabu hawẽ yushĩ txakabu nitxĩkĩ Jesusũ shushawa hanushũ uĩ pewai hãtxaya

²³ yurã kaiãnẽ uĩ: —Habaa! Yuu! Davĩ baba mekenika Deusũ nukũ shenipabu yubani habiamẽkaĩ. Hamaraka— ikeakeaibũ

²⁴ hakia fariseubũ hatũ hãtxa nĩkakĩ yuikĩ: —Haskamaki. Na hunirã, yushĩ txakabu shanẽ ibu Belzebũ kuxipa hayaki. Haska bestiwẽ taeshũ yushĩ txakabu hatu kaĩmaikiki— hatu waibũ

²⁵ hatũ xinãnẽ kaneaibu unãkĩ Jesusũ hatu yuikĩ: —Mae betsa anu hatũmebi pashkatã detenamei hatũmebi debui keyumisbuki. Ha inũ, yurabu shuku betsa pashkatã hatũmebi debui yamai keyuriatirubuki.

²⁶ Habiaskari wakĩ Satanásã hawenabu hunibu anua kaĩma hatũ yura punu nukai babui keyukeanaii.

²⁷ Hamẽ, eãnã, Belzebũ kuxipawẽ ẽ yushĩ txakabu kaĩmaya tsuã kuxipawẽ matũ tsumabũ yushĩ txakabu kaĩmamisbumẽ?

²⁸ Hamẽ ikũ Deusũ kuxipawẽ eã ẽ yushĩ txakabu kaĩmamiswẽ taea Deus shanẽ ibui matu anu ma huaki.

²⁹ Haska mã kanehairai matu yuinũ nĩkakãwẽ. Tsuãra huni kuxipatũ hiwe anu hikitã yumetsunũ, iwanã, hawẽ tae inũ hawẽ mekẽ dukũ neatã hawẽ mabu yumetsutirubuki.

³⁰ Haskakẽ tsuabũra ea haibuwama ea nemamisbuki. Ha inũ, tsuabũra yura betsabu ea txibãmama hau ea ikũwãyamanũbũ hatu nemamisbuki, hamakiri xinãmakinã.

³¹ Haskakẽ matu yusĩnũ nĩkakãwẽ. Yurabũ txakabu betsa betsapawakĩ txakaburi yuimisbu Deusũ hatũ txakabu buashũkĩ hakimawatiruki. Hakia matu keskatũ tsuabũra hawẽ Yushĩ Pepa danãkĩ yuãkubainaiburã, hatu buashũtaskama ishanikiki.

³² Hamẽ tsuabũra ẽ matũ Hutxi Kayabi Iuwa ea yuãbiaibũ Deusũ hatũ txakabu buashũtiruki. Hakia tsuabũra Deusũ Yushĩ Pepa yuaĩbu hatũ txakabu Deusũ buama xinãnũbarikiki, natiã inũ bari hawẽ heneatianã— iwanã,

Hi tibi hawẽ bimiwẽ unãtikiri Jesusũ hatu yusĩnikiaki, na hãtxarã

³³ —Hi pepa bimiai hawẽ bimi txakabuismaki. Hamẽ hi txakabu bimiai hawẽ bimi pepaismariki. Haskawẽ taeshũ hawẽ bimi tibiwẽ hi mã unãmiski. Eãnã, ẽ pe yusĩkubaĩmiswẽ taeshũ Satanásã kuxipa ẽ hayamaki. Hakia Deusũ kuxipa ẽ haya ẽ pepaki.

³⁴ Hakia maturã, mã paranã dunubuaibuki. Matũ huĩti txakabukẽ haska xinãkĩ kaĩmai hãtxakĩ hawara pepa yuiama txakabu besti mã yuikubaĩmiski.

³⁵ Hamẽ tsuabura duapa huĩti pepaya hawa txakabu yuiama hãtxa pepawẽs hãtxamisbuki. Ha inũ, yurabu hawẽ huĩti merã xinã txakabu haya hãtxakĩ txakabus yuikĩ kaĩmamisbuki.

³⁶ Matu yuinũ nĩkakãwẽ. Hanu unãti washanaitiã: “Hãtxa hari yuitimawẽ mĩ yuipaunirã, haskakenã ea yui pewawe”, akĩ yurabu bestibu tibi Deusũ hatu yukashanikiki— iwanã,

³⁷ fariseubu ana yuikĩ: —Hamẽ matũ hãtxa tibi xinãkĩ Deusũ matu unãti washanikiki, “Mĩ pemẽkaĩ, mĩ txakabumẽkaĩ”, akĩ Deusũ unãtã matu kupishanikiki— hatu waya

Dami betsa atimaska nuku tashnimashũwẽ, akĩ yukanibukiaki, na hãtxarã

³⁸ hatu haska wai nĩkatã hanushũ fariseubu inũ Deusũ hãtxa kenenibu yusĩnanãmisbũ Jesus yuikĩ: —Yusĩnaã, nũ uĩnũ naiuria haska tsuã dami atimaska kaĩmaisma nuku ashũwẽ— akabu

³⁹ Jesusũ hatu kemakĩ: —Nukunabu na habiatiã hiweaburã, mã txakabuki. Hamapai Deus anua unãti tsuã atiruma uĩkatsi mã ea yukabiamisrã, Deusũ Jonas bakawã sheamaxina ana kaĩma hiwenirã, haska keska besti Deusũ matu uĩmakĩ matu ashũriashanikiki. Xinãkãwẽ.

⁴⁰ Nínive anu kashũ hau hatu yusĩtanũ Jonas yunua nĩkama hari kama mae betsa anu pashai kai iãnẽwã merã pukuabu hasapanã bakawã ewapatũ sheaxina shaba dabe inũ besti mexu habiatiri kaya maxĩ mapeketã bakawã hanã Jonas besteniki. Earã, matũ Hutxi Kayabi Iuwa habiaskariai mawa mai anu daka shaba dabe inũ besti mexu habiatiri ka ẽ ana bestẽriashanaii.

⁴¹ Haska inũ, Nínive mae ewapa anu hiweabu Jonasĩ Deuskiri hatu yusĩa nĩkakĩ hatũ xinã betsa wanibuki. Haskawẽ taeshũ hanu kupiaitiã Nínive anu hiwenibũ matu ha ashãkanikiki. Ha inũ, ẽ Jonas binuhairabiakẽ tsuã mã ea nĩkakĩ matũ xinã betsa wakatsi ikamaki.

⁴² Haska inũ, betsarã, nawa aĩbu shanẽ ibu sulkiri txaihaira Sabá mai pakea anu hiwea nukũ shenipabu Salomãonẽ hãtxa unãnepa nĩkatanũ ika huniki. Salomão ẽ binuhairabiakẽ mã ea nĩkakatsi ikabumawẽ taeshũ hanu matu kupiaitiã ha nawa aĩbu shanẽ ibũ matu ha atxakayamashanikiki— iwanã,

Yushĩ txakabu kaĩkaina txĩtũmiskiri Jesusũ hatu yusĩnikiaki, na hãtxarã

⁴³ hatukiri Jesusũ miyui betsawẽ ana hatu yuikĩ: —Huni betsa anua yushĩ txakabu kaĩma kai huĩrukũkatsi iki hanu ũpash hayama anu kakũkaũkĩ hani huĩrukũti pepa betxiama xinãkĩ:

⁴⁴ “Ẽ hanu hiwea ẽ kaĩkirãxina anu ẽ ana txĩtũkainaii”, ikaini kashũ ha yura merã hiwe shaka matsua keska hawa hayama betxitã

⁴⁵ kashũ ana sete yushĩ betsa txakabuhaira hatube dasikirã, ha dukũtũ ha yura itxakawakĩ mirĩwaima ana binumakĩ pikuhairamisbuki. Haska keskariai natiã na yurabu hatũ xinã pewabumawẽ taea hiwe txakakubainaibu txipu Deusũ hatu kupihairashanikiki— akĩ

Hawẽ ewa inũ hawẽ betsabukiri Jesusũ hatu yusĩnikiaki, na hãtxarã

⁴⁶ Jesusũ hatu yusĩ meneriama hãtxaya hanua hawẽ ewa inũ hawẽ betsabu bea Jesuski haska kematima hemaĩtĩ mapushũ huni betsã hau yuishũtanũ hawẽ ewã yunua

⁴⁷ kashũ Jesus yuikĩ: —Mĩ ewa inũ mĩ betsabũ unu hemaĩtĩshũ mibe hãtxanũ ishũ mia kenakanikiaki— aka

⁴⁸ Jesusũ kemakĩ hatũ yui ka yuikĩ: —Tsuamẽ, ẽ ewa inũ ẽ betsaburã?— iwanã,

⁴⁹ nũ hawẽ tsumabu nuku metukĩ yuikĩ: —Na habiabuki, ẽ ewa inũ ẽ betsaburã.

⁵⁰ Ha inũ, Deusũ hãtxa tsuabũra nĩkatã ikũwãkĩ ashũmisburã, habiabu ẽ betsabu inũ ẽ puibu inũ ẽ ewaburiki— hatu waniki.