Lucas 1 - Kaxinawá Bíblia (BR)

Hawẽ haibu Teófilo kene bumanikiaki, na hãtxarã

^1-4 Shanẽ ibu Teófiloõ, ẽ mia kene bumai uĩwẽ. Haska Jesusũ yusĩkĩ taewani anua hawẽ tsuma kayabibũ uĩakeakenibu inũ Jesusũ hawara hatũ berubi uĩkubainima Deusũ hatu katua habũ hawẽ kuxipayabu hau txanikubaĩshanũbũ habũ nuku yusĩabu huni betsabũ habiaskari bebũkiri unãkĩ pewatã nuku keneshunimabuki. Hakia hawẽ tsumabũ yusĩmiskiri miãri mĩ nĩkaima: “Txanimaki”, eãri habiaskari xinãkĩ ẽ mia keneshunai mĩ unãkubaĩshanũ haskani Jesuskiri dasibi yuka iki nati itã eãri nĩkakĩ pewatã ẽ mia kene bumaii.

Naximanika João kaĩshanaikiri bebũkiri hawẽ ibuki nai tsuma txaninikiaki, na hãtxarã

^5-7 Judéia mai pakea hatiuma anu Herodes hatũ shanẽ ibu ikũkainaya habiatiãri hawenabu Deusbe hãtxashunika Abiasĩ enabu shuku betsa anua hawẽ kena Zacarias hiwekũkainikiaki. Hanua hawẽ aĩnĩ kena Isabel Arãonẽ babari yushabuhairakĩ bake biama hawẽ beneri anibuhairatũ bakewanũ ishũ xinãkubaĩkĩ Deusũ hãtxa txibãkĩ hawẽ yunuti inũ hawẽ nemati kaneabumakẽ hatuwẽ Deus benimakũkainikiaki.

⁸ Hanua hanu Deus kẽwãti Templo anu Abiasĩ enabu betsabube Zacarias ushe bestitxai dayakĩ

⁹ Templo anu hikishũ hau inĩti hatu kuashũtanũ hatũ beya txibãkĩ hatũ kena tibi kenetã ha una ture bitã hawẽ kena betxitã Zacarias katuabu

¹⁰ hikishũ txi tsistuki hawẽ Deus kẽwãti inĩti dau Zacariasĩ hatu kuashunaya hemaĩtĩ anushũ yura itxapabu itxashũ Deus kẽwaĩ dãti ika maniabũ

¹¹ hanushũ inĩti kuati txi tapu fogão yusiuria Deusũ nai tsuma damia nia

¹² Zacariasĩ uĩ e itã ẽ haskai iki datehairaya

^13-16 hanushũ nai tsumã yuikĩ: —Zacariasiĩ, dateyamawe. Hawara mĩ yukai nĩkamisshũ Deusũ mia ashũshanikiki. Mĩ aĩ Isabel yushabubiatũ bake bima huni bake kaĩshanikiki. Kaĩyaĩtiã mĩ benimaya minaburi benimashãkanikiki. Kenakinã: “Joãoki”, ashãwẽ. Hanushũ minabu Israelbu txakabubiakubainaibũ João kaĩnishũ hatu yusĩkĩ nukũ merabenã yushĩ Deuskiri yura itxapabu txibãmaya benimahairashãkanikiki. Nanei taea Deusũ Yushĩ Pepatũ kuxipa wakubaĩkĩ heneama uva hene vinho inũ hene paepa tibi akama mĩ bakẽ Deus benimawakĩ minabu Yavé Deus anu ana hatu txĩtũwãshanikiki, hatu txibãmakinã.

¹⁷ Haska inũ, mĩ bake Joãonẽnã, Deusũ kuxipaya hawẽ Yushĩyã bebũ nishũ haska Eliasĩ Deusũ hãtxa yuishunikatũ ani keska wakĩ hatũ ibubu habũ bakebu ana danãnanaĩ sinatanameama inũ ha patapakĩ nĩkaisbuma hau habũri Deus txibanũbũ mĩ bake Joãonẽ yurabu hatũ Shanẽ Ibu huai manamakĩ hatu xinã betsa wamashanikiki— aka

¹⁸ hawẽ hãtxa nĩkabiatã xinãkĩ Zacariasĩ nai tsuma yukakĩ: —Ma ẽ anibuaki. Ẽ aĩ yushaburiki. Haska washũ mĩ hãtxa ikũ ẽ unãkĩ mestẽwãtirumẽ?— aka

¹⁹ nai tsumã yuikĩ: —Earã, ẽ Gabrielki, nai tsuma shanẽ iburã. Deus dayashuni ẽ hãtxashũmiski. Ẽ mibe hãtxanũ na kakape Deusũ ea yunushuki.

²⁰ Hakia ẽ hãtxa mĩ ikũwãmawẽ taea mĩ bake kaĩriama huyu mĩ hiweyukũkaĩshanaii. Na ẽ mia yuiairã, Deusũ akatsis ikĩ ashanikiki— atã kaya

²¹ haskai nixma dakakẽ Templo hemaĩtĩ anushũ manakĩ hawenabu yuinamei yukai ikĩ: “Hawa dakiai ikikiki, tashniamabĩ!” iki maniabũ

²² atimas tashnitã haska washũ hatu hãtxa watimakẽ habũ unãbaũkĩ hakiri yuikĩ: —Haskakenã, Templo dĩtu meranushũ namai keskakĩ Deus anua uĩshumẽkaĩ?— ikaibũ hawẽ mekẽ bestiwẽ hatu unãmatã habiaska hãtxama hatube dayakũkaĩkĩ

²³ Templo anua hatũ daya ushe bestitxai nitxĩtã Zacarias inũ kashũ

²⁴ hawẽ aĩ bakewa tuyaima cinco ushe besti hawenabube hãtxakatsi ikama Isabel hawẽ hiwe anus hiwekũkaĩkĩ xinãkĩ:

²⁵ “Ẽ bake bitirumawẽ taeshũ hau ana enabũ ea dake wayamashanũbũ Deusũ ea abukĩ ea merabewaikiki”, ika benimakũkainikiaki.

Jesus naneshanaikiri Mariaki nai tsuma txaninikiaki, na hãtxarã

^26-27 Isabel tuya seis ushe kaya txipax hawẽ kena Maria txutanamei peseriama hawẽ epã beneyawakatsi hatũ shenipabu shanẽ ibuhaira Davĩ baba José yubakĩ ibu waimakẽ hanushũ Deusũ hawẽ nai tsuma Gabriel hau kakape Maria yuinũ Galiléia mai pakea namakis mae betsa Nazaré anu yunua

²⁸ damitã hawẽ dĩtu merã hikishũ Gabrielĩ Maria yuikĩ: —Ẽ miki txaniyuaii. Yavé Deus miwẽ benimahairakĩ mia abuikiki— atuxia

²⁹ hawẽ hãtxa nĩkai e itã Mariã xinãkĩ: “Haskakĩ ea haska yuimẽkaĩ?” ishũ xinãyã

^30-31 nai tsumã ana yuikĩ: —Mariaã, ewẽ dateyamawe. Miwẽ dabanã Deus benimahairaiwẽ taeshũ huni bake mia bimakĩ miki naneshanikiki. Txipu kaĩyã kenakĩ: “Jesuski”, ashãwẽ.

³² Hamẽ Shanẽ Ibu kuxipahairakũkainaya habũ yuikĩ: “Yushĩ kuxipa hatu binuatũ bakeki”, iwanã, kenakubaĩshãkanikiki. Ha inũ, haska matũ shenipabu shanẽ ibu Davi shanẽ ibu ini keskai

³³ Deusũ yunua mĩ bake Jesus Jacõ bababũ Shanẽ Ibu ipashanikiki, niti ikama ikibi ikirã— aka

³⁴ Mariã yukakĩ: —Ẽ txutanamei peseriamabia haskatã ẽ bake nanetirumẽ?— aka

³⁵ hawẽ nuikĩ nai tsumã ana yuikĩ: —Kuxipa hatu binuatũ hawẽ kuxipawẽ hawẽ Yushĩ Pepa yunua mikia dami naneima kaĩmashũ hatũ Deus txibãyã: “Harã, meribi Deusũ bakeki”, ishũ kenakubaĩshãkanikiki.

^36-37 Hamẽ betsarã, minabu Isabel ma yushabubia ma huni bake bimaki. “Haskatũ bake bismaki”, iwanã, yuãbiakubaĩmisbu hamapai xarabu Deusũ atiruwẽ taea ikis ushe mekẽ bushka ka pustuki— akaya

³⁸ Mariã yuikĩ: —Peki. Haska mĩ ea yuiairã, hau xinãshũ ea anũwẽ. Deusũ tsumarã, ẽ eaki— aka nĩkatã kaĩkainikiaki.

Isabel anu Maria bai kanikiaki, na hãtxarã

³⁹ Gabrielĩ Maria hãtxa wawãxĩkẽ Judéia mai pakea mawa mati matipa anu mae hatiumanua Maria hawaira maĩ ka haki bai ka

⁴⁰ Zacariasĩ hiwe anu hikitã Mariã Isabel yuikĩ: —Ewaã, miki bakĩ ẽ mia uĩyuaii— atuxiaya

⁴¹ Isabelĩ Maria nĩkaya hawẽ pustu meranua hawẽ bake tukuaya Deusũ Yushĩ Pepatũ kuxipa waya

⁴² benimakĩ Isabelĩ unãshubima bis iki eai itã yuikĩ: —Deusũ mia abukĩ aĩbu betsabu binumakĩ mia inũ mĩ bake nanexĩshũ mia habe duahaira waikiki.

^43-44 Mĩ ea kena mĩ hãtxa ẽ nĩkaya ẽ bakeri benimahairai ẽ pustu meranua tukushuki. Ẽ hawayairakẽ Deusũ ea duawaya ẽ Shanẽ Ibũ ewa mĩ eki bayuaii. Haskakẽ ẽ benimahairaii.

⁴⁵ Haska inũ, hawara Deusũ mia ashũshanai mia yuixina mĩ ikũwaĩwẽ taea mĩ benimahairaii— aka

^46-48 hanushũ Mariãri yuikĩ: “Ẽ hawẽ tsuma beshmas hairabiakẽ Deusũ ea xinãkĩ ea katuxinaki. Haska inũ, dasibibũ xinãkĩ: ‘Deusũ Maria xinã txãkãwãmiski’, iwanã, ekiri yuikubaĩshanaibuwẽ taea ẽ mekenã Deus kuxipawẽ taea huĩti benimakĩ ẽ Shanẽ Ibu Deus ẽ kẽwaiĩ.

^49-50 Ha inũ, duawai hawẽ kuxipaki mesemisbuwẽ nuikũkaini xinã pepa kuxipa hatu binukĩ keyuatũ ea duahaira waxinaki, hawẽ kena meribi pepatunã.

^51-53 Haska inũ, ibubis yubakatã keĩsbuma hatu shanẽ ibu wakĩ betsabu nuitapai buniaibu piti pepa hatu yani wamakĩ mabu itxapayabu nuitapawakĩ mekẽ bestia mais hatu nitxĩmiski. Haska inũ, ibubis keaĩbu itxakawakĩ hatu huĩti nixma wakĩ ibubis shanẽ ibui kuxipamisbu hatu mitanuma wakĩ Deusũ hawẽ kuxipa uĩmakĩ hatu unãmashanikiki.

^54-55 Hanũkaĩ haska nukũ shenipabu Abraão inũ hawẽ bababukiri yubashuni xinaĩ nukuwẽ nuikĩ nũ hawẽ tsumabu Deusũ ana nuku merabewakĩ taewani heneama nuku ashũkubainikiki”, ixiã

⁵⁶ hanu Maria bayui niti ikima habe hiweshũ ushe dabe inũ besti nitxĩtã hanua Maria inũ kanikiaki, hawẽ hiwe anu txĩtũkainirã.

João kaĩnikiaki, na hãtxarã

⁵⁷ Hanua Isabelĩ bake bima ewai pustuhairatã huni bake kaĩkẽ

^58-59 ha dapi hiweabu inũ hawenabũ Deus Isabelwẽ nuikĩ merabewaya ma bake kaĩyã habũ nĩkatã benimaxiãbũ hanua kaĩxina oito shabatiã ibu dabetã hawenabu kena uĩnũ ika beshũ haska hatũ shenipabũ yununi txibãkĩ hawẽ hina kubitxi meshteshũtã hawẽ epa Zacarias dabipanãbũ

⁶⁰ hawẽ ewã hatu nemakĩ yuikĩ: —Haskamaki. Hawẽ kenarã, “João” wakãwẽ— hatu wa

⁶¹ habũ Isabel yuikĩ: —Haskakĩ hari mĩ kenai? Mĩ benẽ enabũ kenarã, hari hayabumaki— ikeaketã

⁶² hanushũ harakirira hau kenanũ hawẽ epa huyuwẽ taeshũ mekenẽ besti yukabu

⁶³ mekenẽri haki keneti hau beshunũbũ hatu yunua beshuãbu Zacariasĩ kenekĩ: “Hawẽ kenarã, Joãoki”, hatu wa uĩ e itã “Haririkiaki”, ikaibũ

⁶⁴ haskatanaibũs Zacarias hawaira ana hãtxakĩ Deus kẽwanikiaki.

⁶⁵ Hanushũ ha dapi hiweabu dasibi e iki: “Habaa!” ixĩshũ hanu mai pakea Judéia mati matipanu hiweabu anu haskaxina hatuki txanibaunaibũ

⁶⁶ haskaibu dasibibũ nĩkakĩ unaĩ haskakenã: “Deusũ ha bake yumewairã, haskarara ishanikika”, iki ha bakekiri hãtxanibukiaki.

Zacariásĩ Deus kẽwãnikiaki, na hãtxarã

⁶⁷ Joãonẽ epa Zacarias Yushĩ Pepatũ kuxipa wa hãtxakĩ Deus kẽwaĩ Deus hãtxashũkĩ yuikĩ:

⁶⁸ “Ẽ Shanẽ Ibu pepa Israelbũ Deusuũ, mĩ ma minabu merabewakĩ hatu pekakĩ akawai huxiãwẽ taeshũ ẽ mia kẽwaiĩ.

⁶⁹ Mĩ tsuma Davĩ baba betsa kuxipahaira mekenã kayabi nuku anu mĩ ma nuku nitxĩshũxinaki.

⁷⁰ Nukũ shenipabu hatu yubai hakiri habias mĩ hãtxa yuĩshunika meribi tibi mĩ hatu hãtxamapaunirã,

⁷¹ hawẽ taeshũ nukuki sinatamisbu inũ, dasibi nuku danãmisbu mĩ hatu hawẽ maemakĩ nuku pashawatiruki.

⁷² Haska bebũkiri nukũ shenipabu hawawẽ hatu haska wati nuii hatuwẽ yubakai hatukiri hãtxa meribi wai mĩ hãtxapaunirã, hakimama mĩ xinaiĩ.

⁷³ Haska hawẽ kanetima wai nukũ shenipabu Abraão mĩ habe yubakani natiã mĩ ma ana nuku xinãkĩ abuaii.

⁷⁴ Ana tsua dateyabi nũ hiwetirubuma inũ nukuki sinatamisbu mĩ hatu nuku daewashunaki. Hawama nũ mia dayashuni

⁷⁵ haska pepa kayabiwẽ bestiwẽ meribi pepatã nukũ hiwea hirabiwẽ mia bebũ nũ pe nikatsis ikaii, itã

⁷⁶ hanua epaã, miarã, ‘Deus dasibi binu keyuatũ yuishunikaki’, iwanã, mia kenashãkanikiki. Hanu nukũ Shanẽ Ibu Messias hushanai bebũkiri hawẽ bai mĩ hatu pewamashũshanaii,

⁷⁷ hau hawenabũ hatũ txakabuwẽ taea Deuski mesekĩ hatũ xinã txakabu henetã Deus buamatã hau meketi hiwea hatu inãshanunã.

⁷⁸ Nukũ Deus nuikipa txakamatũ nuku abukĩ nai anua hawẽ bake shaba bari bena keska nuku buteshũshanikiki.

⁷⁹ Yurabu hatũ txakabuwẽ taea atimapanu mawai benui bupanãbũ mexu tẽ ikai anua bĩ txasha watã nuku inã keska wakĩ nũ habu hiweyuabu nũ hawẽ unãnuma hiwei kai nuku yusĩshanikiki”, inikẽ

⁸⁰ Zacariasĩ bake João ewai Deusbe haibunamehairai unãnepai hawenabu Israelbu yusĩriama hari tsua hiweabumanu hiwekũkainikiaki.