Josué 7 - Kaxinawá Bíblia (BR)

Acãnẽ txakabuwẽ taeshũ Deusũ hatu kupinikiaki, na hãtxarã

¹ Judá enabu betsa hawẽ epa Carmi inũ, hawẽ hutxi Zabdi inũ, hawẽ hutxĩ epa Zerárã, ha huni Acã hatũ hatu txakabuwakĩ mabu kuatibiakẽ hawẽ kemukĩ Josué yunutiki meseama mabu betsa hawẽrua hawena wanũ ishũ bishũ hune aruawẽ taeshũ dasibibũ akãshu keska shinaĩ Israelĩ enabuki Senhor Deus sinataya

² shaba betsatiã mae Betel anua bari huaikiri mae betsa Bete-Áven dapi Ai anu hau uĩbaũtanũbũ huni eskarabes Josué Jericó anushũ hatu yunukĩ: “Aikiri bushũ hune mapekebaĩ uĩbaũtãkãwẽ”, hatu wa nĩkatã mapekebaĩ Ai dapi hune uĩbaũtani

³ txĩtũbirã Josué anu beshũ betsã yuikĩ: “Nukunabu dasibi hau buyamashanũbũwẽ. 2.000 huni detenamenikabu kasmai 3.000 besti mĩ hatu yunutiruki, nukunabu itxapa hatu yunuamarã. Ai mae anu hiweshũ habũ mekeaburã, mawaira itxapabumaki. Hatu maematã ha mae nũ ibuwatirubuki”, akabu

⁴ hatũ hãtxa Josué nĩkakĩ ikũwãtã 3.000 detenamenikabus besti hatu yunua bui mapekebaĩ hatu maemapanãbũ Ai hunibũ hatũ matxatu txaipawẽ hatu detekĩ maemabu Israelĩ enabu hatuwẽ datei kushibiranaibu

⁵ hatũ mae hikiti shui dapishũ hatu detetiyashũ txibãbirãkĩ matxi buteaibu hatu detekubirãkĩ 36 Israelĩ enabu debuwatã Sebarim anu hatu henebainabũ hatu haska wabu Israelĩ enabu dasibi datekĩ ma hatũ kushipa benua punu nukabiranaibũ

⁶ Josué inũ hatũ shanẽ ibubube huĩti nishmahairashũ hatũ tima tari ushnitã isĩ tenei keskai mai mishpu mapu tukutã Senhor Deus hatube yubakani hãtxa aruni bau besuuri dashka ikaĩ beti ika beua bari txaitanai manibai hanua bari kaya

⁷ atimas Josué Senhor Deus yuikĩ: —Ẽ peirawa! Ẽ shanẽ ibu Senhor Deusuũ, ea nĩkayuwe. Amorreu nawabũ hau nuku yamawanũbũ haskakĩ Hene Jordão mĩ nuku pukemashĩshũ mĩ hatu nuku binumashumẽ? habiauri hene pukeama niti itã nũ hiwepananã.

⁸ Nũ pemaki, Shanẽ Ibuũ! Ma nukuki sinataibũ enabu Israelbu hatu tenãbu pashai kushibirãkãshuwẽ taeshũ ẽ hawa mia yuitimaki.

⁹ Enabu kushibirãkãshu nĩkatã Canaã nawabu inũ ha dapi nawa tibi dasibi nenu hiwebaunabu benimai shukui dasitã nuku dasibi detekĩ keyutã nukũ kena ana nuku shinãtimawashãkanikiki. Haska watã mĩ kena kushipawẽ mĩ nuku iwekubirãshinarã, haskara mikiri shinãshãkanimẽkaĩ?— aka

¹⁰ sinatakĩ Senhor Deusũ Josué kemakĩ: —Haskai e iskirã maĩ beti ika mĩ dakamẽ? Beniwe.

¹¹ Minabũ txakabuwakĩ ma kaneshinabuki, ẽ hatube yubakabiani ea txibãkĩ ashũkĩ pewama kanekinã. “Ha mae anua mane mabu ena bishũtã mabu betsa kua keyukãwẽ”, mĩ hatu wabia haska txakabu unãbiakĩ ouro inũ pei heshe inũ tari hawẽrua hune yumetsushũ hawena wakĩ bushũ hatũ mae anu hunebaĩ arushinabuki.

¹² Haskawẽ taeshũ minabũ hatuki sinataibu hatube detenamei kabia hatu maemama kushibirãshinaburã, ha haska txakabuwashinabuwẽ taeshũ matu kupikĩ ẽ matu yamawatiruki. Ha mabu yunukĩ metima ẽ washina ha yumetsushina anua mĩ hawaira bitã yamawamakẽ eãri ẽ matu ana merabewama ishanaii, mã ana detenameaitianã. Detenamei bua mã ana pasha bestikũkaĩshanaii.

¹³ Ẽ matu ana merabewatirumẽkaĩ, mĩ shinaĩ benikaĩ ẽ daenũ minabu dasibi itxawashũ hatu pewariwe, eska hatu yuikinã: “Meshukiri eanu bekatsi hau petã benũbũwẽ. Earã, ẽ Israelbũ mekenika Senhor Deuski. Eã hatu yuikĩ: ‘Israelĩ enabuũ, ea nĩkakãwẽ. Jericó anua mabu kua keyuti ẽ yunubiakẽ kua keyuama mã betsa arubaĩshina mã hayaki. Ha mabu tsuãra bishũ mã kuama ishiãwẽ taeshũ nawabu matuki sinataibu mã ana hatu maematirumaki’, akĩ na habias hãtxa ẽ mia yuishu ea hatu yuishũtãwẽ.

¹⁴ Hatu haska watã meshukiri Israelĩ enabu shukua tibi nenu ea hatu uĩmakĩ iweshãwẽ. Shukua betsa bestitxai ẽ katua hatu anu hatũ ibuã kenawẽ pakeabu tibi ea hatu uĩmakĩ iwebirãbirãshãwẽ. Ha pakeabu betsa bestitxai ẽ katua hawenabuya tibi ea hatu uĩmakĩ iwebirãbirãshãwẽ. Hatube hiwea huni bestitxai tibi ẽ katua ea hatu uĩmakĩ iweshũshãwẽ.

¹⁵ Tsuãra atimapa wakĩ txakabuwakĩ mabu meribi bishiã katukĩ haratura ẽ mia unãmashanaii. Ẽ matube yubakabiashina ẽ hãtxa danãkĩ hawẽ dakewati washiãwẽ taeshũ ha huni tenãtã hawenabuya inũ hawẽ mabube kuashãkãwẽ— aka

Hawẽ txakabuwẽ taeshũ Acã tenanibukiaki, na hãtxarã

¹⁶ nĩkatã ushashini penamahaira Josué bestẽtã hatu yunua haratu huni txakabumẽkaĩ unãti wanũ ishũ Deuski nukuti tari hiwe pũtea besusi Israelĩ enabu shukua tibi hatu itxawakẽ Senhor Deusũ ha itxabu anua Judá enabu metumakĩ katuma

¹⁷ hanushũ Josué unãtã Judá enabu anu hatũ ibuã kena tibiwẽ pakeabu tibi Josué hatu kekũtã hatu uĩmakĩ Zerá enabu Senhor Deusũ katua Zerá enabu habu dapi hiweabu tibi Josué habu tibi hatu itãtana Zabdi enabu Senhor Deusũ katua

¹⁸ hanushũ Zabdi enabu anua hiwe ibu bestibu tibi Josué hatu itãtana Judá enabu Carmi bake Acã hawẽ hutxi Zabdi inũ, hawẽ epã hutxi Zerárã, Senhor Deusũ katukĩ Josué unãmanikiaki.

¹⁹ Ma unãmawẽ taeshũ Josué Acã yuikĩ: —Ẽ haibuũ, ea nĩkawe. Nukũ shenipabu Israelĩ mekenika Senhor Deus pepawẽ duawakĩ kẽwãkĩ mĩ haska washina huneama ea yuiwe— aka

²⁰ Acãnẽ Josué kemakĩ haskashina yuikĩ: —Txanima ẽ txaniaii. Israelĩ mekenika Senhor Deusũ hãtxa danaĩ ẽ txakabushinaki. Ẽ eska meshinaki. Mia yuinũ ea nĩkawe.

²¹ Jericó nawabu nũ hatube detenameaitiã hatũ mabu uĩbaũkĩ Babilônia anua tari peyabukuti hawẽruahaira inũ, 200 prata pei heshe inũ, ouro ture pishta meio quilo binua betxishũ hawẽ kemukĩ bibaĩ ẽ tari hiwe merã mai pukĩtã ha dukũ pei heshe mãtxĩtã hanua ouro ture hanatã hamamaki peyabukutiwẽ atximashũ ẽ maiwashinaki— akaya

²² haska Josué nĩkatã hau hawairabaĩ bitanũbũ hunibu Acãnẽ tari hiwe anu hatu yunua kushibaĩ hikishũ mai pukĩshũ ha merã hanu arushina ha peyabukuti hawẽrua inũ, ouro ture pishta inũ, ha dukũ uke merãhaira prata pei heshe arushina betxitã

²³ bitã hatũ shanẽ ibu Josué inũ hatunabu itxabu anu beshũ hanu Senhor Deuski nukuti tari hiwe bebũ mãtxiãbu

²⁴ Josué uĩtã Zerã bake Acã hawẽ bakebuya inũ, dasibi hawẽ inabuya inũ, hawẽ mabu dasibiya hau mawa napaku Acor anu iyunũbũ yunutã

²⁵ hari iyuabu Josué Acã yuikĩ: —Haskakĩ nukuki Deus sinatamakĩ atimapa wakĩ mĩ nuku txakabuwashinamẽ? Natiã miari Senhor Deusũ kupiaya mĩ nuku tenemashina keskari miãri mĩ meaii— akaya hanushũ Israelĩ enabu dasibibũ mishki turewẽ tsaka tsaka akĩ Acã hawẽ bakebuya tenãkĩ keyushũ txiwẽ hatũ yura kuakĩ keyutã

²⁶ atximakĩ mishki ture haki puta puta akĩ itxapa haki maspu wanibukiaki. Ha haska wanibu natiã uĩpaketirubuki. Israelĩ enabuki Senhor Deus sinatahairashina Acã kupikãshuwẽ taea Senhor Deus daenikiaki. Haskakẽ ha napaku kenakĩ: “Acorki”, amisbuki. Nukũ hãtxawẽ kenarã, “Txakabu Atimapaki” ikaki.