João 6 - Kaxinawá Bíblia (BR)

5.000 hunibu Jesusũ pimanikiaki, na hãtxarã

^1-4 Hanua haskakaĩkĩ Páscoatiã judeubu besikĩ pishanaibu ma kemaya Galiléia Iãnẽwã, hawẽ kena betsa Tiberíades Iãnẽwã anu Jesus nũ hawẽ tsumabube pukeshũ hatu shushawakĩ Jesusũ hawẽ unãmati dami atimaska betsa betsapa wai uĩxĩshũ ana uĩkatsis iki maĩ bukĩ mirimabũ nuku txibaĩbũ mati mapebaĩ tsauwa nukube hãtxabaikĩ

^5-6 yurabu itxapabũ txibãbiranabu uĩkĩ hawara akatsi unãbiakĩ Filipe unãti wakĩ Jesusũ yukakĩ: —Nabũ hau pinũbũ, hania nũ hatu misi bishũtirumẽ?— aka

⁷ xinãma Filipẽ yuikĩ: —Bestibu tibitũ hau misi eskarabe pinũbũ 200 dia nukũ daya peirã, damaki— aka

⁸ haskai nĩkatã hawẽ tsuma betsa Andrẽ, Simão Pedrõ betsã, yuikĩ:

⁹ —Cinco misi inũ dois bakaixta huni bakẽ nuku inãtirukiaki. Hakia hatibũ na misi eskarabes pikĩ hawa yani watirubumaki— aka

¹⁰ Jesusũ hatu yuikĩ: —Ha basiki hau tsuabaunũbũ hatu yunukãwẽ— nuku wa nũ hatu yunua basi mamaki tsaui 5.000 hunibu tsauwabũ

¹¹ ha huni bake anua Jesusũ misi bitã Deus kẽwãtã misi tũkepakekĩ nuku inã ha tsauwabu nũ hatu inãbaunaya habiaskari wakĩ ha baka bitã tekepakekĩ nuku inãriaya nũ hatu inã hati pikatsis ikĩ bitã

¹² pikĩ hanushũ yani wai pepeaibũ Jesusũ hawẽ tsumabu nuku yunukĩ: —Ha piti teshe waibu hau txakawayamanũbũ itxawabaũkãwẽ— nuku wa

¹³ itxawakĩ ha cinco misi pikĩ teshewabu 12 kuki nũ mata wakẽ

¹⁴ hawẽ unãmati dami Jesusũ hatu ashũshuwẽ taea uĩ yuinamei: —Txanima Deusũ hãtxa yuishunika kayabiki, haska Moisés yuinirã, ha hunirã, habiaki— ikubaũkĩ

¹⁵ barikis shanẽ ibu warinũ, iwanã, atxishũ iyupanãbu unãtã hatu pashkabaini ana hawẽri mati keyatapa mapebaini ha mesti hari pashashũ xinãyui kaya

Jesus iãnẽwã bemaki bepaikainikiaki, na hãtxarã

¹⁶ ma bari hikiaya nũ hawẽ tsumabu iãnẽwã kesha anu butukĩ Jesus nũ shunũbirana huriamakẽ

¹⁷ shashũ inatã Cafarnaum anu nũ kai besusi pukẽnũ ika nũ kai taeaya mexuhairakẽ Jesus txĩtũriama

¹⁸ niwẽwã bekĩ iã buspu tsaubirãbirãkĩ hatu teawa

¹⁹ haimãwẽ tuẽxini ma txaiskabui cinco kasmai seis quilômetro nunushũ Jesus iã bepaikiranai uĩ nũ datehairaya

²⁰ nuku yuikĩ: —Ẽ eaki. Ewẽ dateyamakãwẽ— nuku wa

²¹ nĩkatã benimakĩ yuikĩ: —Nukube shashũ inayuwe— nũ wa shashũ Jesus inaya niwẽwãnẽ shashu tsuma maiãyã hawaira kaĩ nũ keti iniki.

Yurabũ Jesus benanibukiaki, na hãtxarã

²² Ushaxini penaya ha yurabu iã kesha betsauriabũ xinaĩ: —Habia besti shashuwẽ hawẽ tsumabũ Jesus iyuama buxiãbuki, shashu betsa hayamabiakenã— ikaibũ

^23-24 ha haskaibũ mae ewapa betsa Tiberíades anua shashu betsawẽ bei hanushũ Jesusũ Deus kẽwãtã hatu pimaxina anu keti itã Jesus inũ hawẽ tsumabu hatu benakubirani hawa hatu betxiama ana hawẽri butubirani hatũ shashuki inatã: “Cafarnaum anu kaxiãmẽkaĩ. Hari benanũ bukãwẽ”, itã hauri bui

Jesusrã, hiwekuĩmati misi keskakiaki, na hãtxarã

²⁵ iãnẽwã pukebaini kesha betsauria hanu itxati hiwe anu hatube itxanua Jesus betxituxitã habũ yukakĩ: —Yusĩnaã, hatiã mĩ nekeri pukexinamẽ? Ukeria nũ mia benabiranairã— akabu

²⁶ Jesusũ hatu yuikĩ: —Mã unãti wakĩ kayatapĩnũ dami haskabiama wakĩ ẽ matu ashuaĩ uĩxina ha tapĩkĩ mã xinãmawẽ taea hakia misi pikĩ yani waxĩshũ haskas pinũ ishũ mã ea benai bei ikanaii.

²⁷ Haskai piti txapumiswẽ besti kemui mã mapua ikanai? Hakia ẽ Epa Deusũ ea kuxipa waniwẽ taeshũ hawẽ kuxipa ẽ matu inãshanai ha bestiwẽ kemui mapukãwẽ, hawẽ hiwekuĩ ikibi itirã. Haskawẽ taeshũ habia hawẽ unãmati wakĩ Epa Deusũ ea matũ Hutxi Kayabi Iuwa ea waniki, yunukinã— hatu wa

²⁸ habũ nĩka pewama Jesus yukakĩ: —Deusũ yunua ashũkĩ txibãkinã, nũ haska wakĩ benimawakĩ taewatirumẽ?— akabu

²⁹ Jesusũ ana hatu yuikĩ: —Deus benimawakinã, hatũ ea yununi besti ikũwãkãwẽ, ẽ eakirã— hatu wa

^30-31 betsabũ nĩkama ana yukakĩ: —Mĩ Deus anuarã, nuku ikũwãmakatsirã, hawa hawẽ unãmati mĩ nuku ashũkĩ kayati wamatirumẽ, nũ mia hawẽ taeshũ ikũwanũbunã? Nukũ yusĩnã Moiséskiri mia yuinũ nĩkawe. Hanu tsua hiweabumanu nukũ shenipabu hatu iyuyama hari hiweabũ Deus anua maná duru butea pikubaunibuki. Haska wanibu kenekĩ: “Pimakĩ nai anua Moisés misi hatu pimakubaũpauniki”, inikẽ damiwakĩ Moisés mĩ binua ikai?— akabu

³² —Txanima nai anua misi butunirã, ha Moiséskiri mã yuiairã, hatũ hatu pimama iniki. Hakia ẽ Epa Deusũ hatu pimakubaũpauniki. Hakia ikis nai anua habiaskari wakĩ misi kayabi ẽ Epa Deusũ matu inãkatsis iriaikiki.

³³ Ha misi Deusũ yurabu dasibi inãkatsi ikairã, ha nai anua butunitũ hatu dasibi hiwekuĩmatiruki— hatu wa

³⁴ hawẽ hãtxa nĩkabuma ana yukakĩ: —Shanẽ ibuũ, haskakenã na misirã, hawẽtxaĩs nuku pimapakeshãwẽ— akabu

³⁵ Jesusũ ana hatu yuikĩ: —Hiwekuĩmati misirã, habia ẽ eaki. Tsuabũra ea nĩkakĩ xinã betsa watã eki txiti ikaibu ẽ hatũ yushĩ kuxipa wa ana buniama keska ishãkanikiki. Ha inũ, tsuabũra ea ikũwãkĩ ẽ hãtxa nĩkakubainaibu ẽ hatu xinã txãkãwã ana ũpash manui tetsusinama keska ishãkanikiki.

³⁶ Haska ẽ matu yuiai keska ẽ akai uĩbiaxĩshũ mã ea ikũwãbumaki.

^37-38 Hakia ea yununitũ xinãnẽ aki ẽ huniki, emebi ẽ xinãnẽ aki huamarã. Haskakẽ tsuabura katushũ Epa Deusũ ea anu hatu peshukĩ ekiri yunua ikũwãkĩ ea haibuwakubaĩshãkanikiki. Ha inũ, ea ikũwaĩbu ẽ hatu danãtaskama ishanaii.

³⁹ Ea yununitũ xinãwẽ akinã, tsuabura ea anu yununi hawẽ heneai shabatiã hatu benuama hatu bestẽwãkĩ ẽ hatu tashnimashanaii.

⁴⁰ Dasibibũ Deusũ bake xinãkubaĩkĩ ikũwaĩ hiwekuĩa ma hayabuwẽ taeshũ hawẽ heneai shabatiã ẽ hatu bestẽwãshanaii, haska ẽ Epã xinaĩ yubakani keska meneshũkinã— hatu wakĩ

⁴¹ “Deus anua misi butunirã, ẽ eaki”, iki daketapai itsakĩ hatu yuiaiwẽ taea judeu shanẽ ibubu hune Jesuski ha ikĩ yuaĩ

⁴² yuinamei: —Na hunirã, Josẽ bakeki, Jesusrã. Hawẽ ibu daberã, nukũ uĩbuki. Haskai: “Deus anua ẽ butuniki”, iki daketapaimẽkaĩ? —iake iakeaibũ

⁴³ hatũ xinã unãtã Jesusũ hatu yuikĩ: —Matunã, hari hãtxakĩ ana ea yuãyamakãwẽ.

^44-45 Epa Deusũ ea yununitũ hatu kenamarã, ea haibuwatirubumaki. Hakia hatu kena ea ikũwaĩbu hawẽ heneai shabatiã ẽ hatu bestẽwãshanaii. Deusũ hãtxa Isaíasĩ keneni matu yuinũ nĩkakãwẽ: ‘Deusũ dasibi hatu yusĩkĩ meshtãmashanikiki’, aniki. Haskawẽ taeshũ tsuãra Deusũ hãtxa nĩkakĩ tapĩkubaĩmisshunã, ea haibuwakanikiki.

⁴⁶ Epa Deus tsuã mã uĩsmaki. Hakia Deus anua besti tashninitũ Epa Deus uĩniki.

^47-48 Hiwekuĩmati misirã, habia ẽ eaki. Txanima tsuabũra ea ikũwaĩ hiwekuĩkanikiki, ikibi ikirã.

⁴⁹ Ha inũ, hanu tsua hiweabumanushũ Deus anua misi matũ shenipabũ pibiakubaini atimas bika tenei mawanibuki.

⁵⁰ Hakia misi nai anua butunikiri ẽ hãtxaii. Na misi pikubaini ana mawatirubumaki.

⁵¹ Nai anua butuni misi hiwearã, habia ẽ eaki. Tsuabũra na misi hiwea pikubaini hiwepakeshãkanikiki, ikibi ikirã. Na misi ẽ hatu inãshanairã, ẽ yura kayabiki. Haskawẽ taea na mai anu yurabu shukuabu tibi hawẽ hiwetirubuwẽ taeshũ ẽ yura kayabi ẽ hatu inãshanaii— akĩ hunea hãtxawẽ hatu yuiaya

⁵² nĩkama e itã judeu shanẽ ibubu hãtxa tibiwẽ yuinamei ha ikaibũ: —Haskakĩ nũ pinũ hawẽ nami nuku inãtirumẽ? Huni kuĩnẽ namirã, nũ pitaskatirumaki— ikaibũ

⁵³ habũ xinã unãkĩ Jesusũ ana hatu yuikĩ: —Txanima matu yuinũ nĩkairakãwẽ. Matũ Hutxi Kayabi Iuwatũ nami piama inũ ẽ himi akamarã, mã hiwekuĩa hayatirumaki.

⁵⁴ Hakia tsuabũra ẽ nami pikĩ ẽ himi aki hiwekuĩshãkanikiki, ikibi ikirã. Ha inũ, hawẽ henea shabatiã ẽ hatu bestẽwãkĩ tashnimashanaii.

⁵⁵ Haska inũ, ẽ namirã, piti kayabiki. Ha inũ, ẽ himirã, nushuti kayabiki.

⁵⁶ Tsuabũra ẽ nami pi inũ ẽ himi akirã, ebe hiweaibũ eari hatube dasitã ẽ hiwekũkaĩshanaii.

⁵⁷ Haska inũ, Epa Deus hiwei ikibi ikatũ ea yununiwẽ taea hawẽ kuxipawẽ ẽ hiwekũkainaii. Habiaskariai tsuabũra ea pi ẽ kuxipawẽ hiwekubaĩshãkanikiki.

⁵⁸ Nai anua misi butunikiri ẽ hãtxaii. Matũ shenipabu hiwekĩ ha misi pikubauni mawanibu keskamaki, na misi ẽ matu yuiairã. Na misi pikubaini hiwekubaĩshãkanikiki, ikibi ikirã— hatu wakĩ

⁵⁹ Cafarnaum anu hanu itxati hiwe anushũ Jesusũ haska hatu yusĩayã

Jesus hamebi hiwea ikibi ini hayakiri hatu yusĩnikiaki, na hãtxarã

⁶⁰ hawẽ hãtxa nĩkatã Jesuski txiti ikabu itxapabu yuinamei: —Na haska yuiairã, bikaki. Tsuã haska txibãkĩ ashũtirumaki— ikaibũ

⁶¹ habu hakiri yuaĩbu unãkĩ Jesusũ hatu yukakĩ: —Ẽ hãtxã matu dakewakĩ danãmaimẽkaĩ?

⁶² Hanua ẽ huni anu hawẽri ẽ matũ Hutxi Kayabi Iuwa ẽ ana kai uĩkĩ mã xinã betsa washanaii.

⁶³ Shabakabi matu yusĩnũ nĩkakãwẽ. Ẽ yushinĩ hatu hiwemashanikiki. Hamẽ yurabũ hãtxawenã, hawa hatu hiwemakĩ kuxipa watirumahairaki. Ẽ hãtxa ẽ matu yuiairã, ẽ yushĩ keskaki. Mã ikũwãyã ẽ hãtxã matu hiwekuĩmaikiki— iwanã,

^64-65 yusĩkĩ taewabirãshuwẽ hawẽ hãtxa ikũwãbuma inũ tsuãra atximashanai unaĩwẽ taeshũ Jesusũ ana yuikĩ: —Hamẽ matunã, betsa betsapabũ mã ea ikũwãbumaki. Haskakẽ: “Epa Deusũ matu kenama mã ea ikũwãtirubumaki”, akĩ ẽ matu yuishuki— ikaya

⁶⁶ haskawẽ taeshũ Jesuski txiti imisbu itxapabu niti iki baxikutã Jesusbe ana buama ikaibũ

⁶⁷ hakia nũ hawẽ 12 tsumabu nũ pashkabainabumakẽ Jesusũ nuku yuikĩ: —Matũri mã ea henekatsi ikimẽkaĩ?— nuku wa

^68-69 Simão Pedrõ yuikĩ: —Shanẽ Ibuũ, mia henebaĩ tsua mia keska nũ txibãtirumaki. Hiwekuĩmati hãtxa mĩ nuku yusĩmiski. Deusũ bake meribi peparã, habia mĩ mia nũ unaiĩ— aka

⁷⁰ Jesusũ nuku yuikĩ: —Eãnã, ẽ matu katubiayama bestitxai yushĩ txakabu mã hayaki— nuku wa

⁷¹ nũ hawẽ 12 tsumabu betsã Jesus hatu atximashanaiwẽ taea Simão Iscariotẽ bake Judaskiri xinãkĩ haska nukukiri hãtxaniki.