Jó 2 - Kaxinawá Bíblia (BR)

¹ Hanua shaba betsatiã Senhor Deusũ hawẽ nai tsumabu hatu kena itxaibũ habiatiãri nai tsuma itxakanika Satanásri hua hatube nikẽ

² Senhor Deusũ Satanás yukakĩ: —Harakiria mĩ huai?— aka Satanásã kemakĩ yuikĩ: —Mai hirabi anu uĩkĩ keyukubaũtani ẽ huaii— aka

³ nĩkatã Senhor Deusũ yuikĩ: —Ẽ tsuma Jó mĩ uĩmisrã, haskara hakiri mĩ shinaĩ? Jó ea duawai txĩtuĩsma keska mai hirabi anu hiweabu tsua huni betsa haska keska hayamahairaki. Hakia Jó huni pepatũ hawa txakabu mekĩ txakabuwaismatũ tsua itxakawaismaki. Hawa txakabuwamabiakẽ Jó mĩ ea itxakawãbiashina Jó hawa shinã txakama hawẽ shinã pepa bestiwẽ taeshũ tsuã hakiri txakabu yuitirubumaki— aka

⁴ hakia itxakanika Satanásã Senhor Deus kemakĩ yuikĩ: —Tsuabũra hawẽ hamapai txakabuwabiatã hawẽ yura mekĩ itxakawariama shinãkĩ: “Peki. Ẽ tenetiruki”, itirubuki. Hakia tsuãra hawẽ yura itxakawaya hatu daewakĩ hawa yaushiama dasibi hawara haya hatu inãtiruki, mawakatsi ikamarã.

⁵ Hakia hawẽ yura mĩ itxakawaya txanima miabi yuputiruki, mia bebũshunã— aka

⁶ Senhor Deusũ itxakanika Satanás kemakĩ: —Peki. Haska mĩ akatsis ikai atãwẽ. Hakia hawẽ hiwea meyamashãwẽ— aka

⁷ haska wa nĩkatã Senhor Deus anua itxakanika kaĩkaĩ Jó yura hirabi txami atimapa isĩhaira hawẽ bushkayabis inũ hawẽ taeyabis atximashũ isĩ tenemakubainaya

⁸ haska Satanásã txami tenema hanu txi mapu urẽmisbu anu ka tsaushũ kẽti pakeshwẽ hawẽ txami shuai

⁹ hawẽ ainĩ uĩkubaĩkĩ atimas yuikĩ: —Haskai pepasnikapaikũkaĩkĩ haska mĩ shinaĩ ikai? Deus itxariwe, Deus miki sinataya mawarishunã!— aka

¹⁰ nemakĩ Jó yuikĩ: —Aĩbuũ, unaĩsmapatũ hãtxa yuiyamawe. Pepa Deusũ nuku inaĩ nũ bimiski. Haskai txakabu hanua huai ha dikabi bikĩ nũ tenetirumamẽ?— atã txakabu dasibi Jó tenekubaini Deuskiri hawa hãtxa txakabu yuiama ikũkainikiaki.

Jó haibu dabe inũ besti hushũ uĩ benibukiaki, na hãtxarã

¹¹ Haska Jó txami inũ bika betsa betsapa tenekubainai nĩkatã hawẽ haibuaibu Temã mae pakeanua Elifaz inũ, Suá mae pakeanua Bildade inũ, Naamá mae pakeanua Zofar habu Jówẽ nuikĩ merabewakĩ pe shinãmanũ ika hatũ mae tibi anua hanus dasitã haki nukui bekĩ

¹² txaikeshũ Jó uĩkubirani txaima haki nukutã unãkĩ: “Habia nukũ haibuki!” iki hawẽ taea bis bis iki kashai taekĩ hatũ tari ushni ushni atã Jówẽ nuitxakayamai hatũ huĩti nishmahairakĩ Jó uĩmakĩ mai mishpu manaũri puta puta akĩ hatũ bushka anuri mapu tukutã

¹³ hanua Jó dapi bua habe maĩ tsaushũ Jó isĩ tenehairaiwẽ taea unaĩ 7 shaba inũ 7 meshu habiatiri hawa hãtxa taskama ikaibũ