Gênesis 46 - Kaxinawá Bíblia (BR)

José Egito anu hiweshũ hawẽ ibu Jacó kenashina kanikiaki, na hãtxarã

¹ Israelĩ dasibi hawẽ mabu pewakĩ keyutã hawenabube tsekekaini kai Berseba mae anu hikitã hanushũ txashuwã bake kuakĩ hawẽ epa Isaque Deus kẽwãkẽ

² habianushũri meshu merã nama keskawẽ Deus Israelbe hãtxakatsi kenakĩ: —Jacó— aka —Hawamẽ? ẽ nenukirã, earã— aka

³ hanushũ Deusũ yuikĩ: —Earã, ẽ Deuski, mĩ epa Isaque mekenika Deusrã. Mĩ Egitokiri kairã, dateama katãwẽ. Harishũ minabu ẽ mia hatu pa washũshanaii, mirimahaira hatu wakinã.

⁴ Earã, ẽ mibe kaii, Egito anurã. Habia ea kayabistũri minabu ẽ hatu tashnimabirãshanaii. Mĩ haria mawayarã, mĩ bake José mia putama mĩ haũbia mawashanaii— aka nĩka ishĩ

⁵ hanua Berseba anua Jacó bestẽtã kakatsi ikaya hawẽ bakebũ pewakĩ hatũ epa, inũ hatũ bakebu, inũ hatũ aĩbuaibu ha haki beshanũbũ jumento tarãtiya Faraónẽ hatu yunushinaki hatu nanea

⁶ Jacó dasibi hawenaya hawenabu inũ hawẽ txashuwã inũ dasibi Canaã anu hiweshũ mabu bimis haya dasibiya Egitokiri kakĩ

⁷ hawẽ huni bakebu inũ, hawẽ aĩbu bakebu inũ, hawẽ baba hunibu inũ aĩbu hatu iyui haska kainikiaki.

⁸ Israelbu, Jacó enaburã, hati kena bunibukiaki, Egitokirirã:

⁹ Jacó bake iyua Rúben inũ hawẽ huni bakeburã, hati bunibukiaki, Enoque inũ, Palu inũ, Esrom inũ, Carmirã.

¹⁰ Hanua ha katxu Simeão inũ hawẽ huni bakeburã, hati bunibukiaki, Jemuel inũ, Jamim inũ, Oade inũ, Jaquim inũ, Zoar inũ, Saulrã. Hanua Saulũ ewarã, Canaã nawa aĩbu inikiaki.

¹¹ Hanua Levi inũ hawẽ huni bakeburã, hati bunibukiaki, Gérson inũ, Coate inũ, Merarirã.

¹² Hanua Judá inũ hawẽ huni bakeburã, hati bunibukiaki, Er inũ, Onã inũ, Selá inũ, Perez inũ, Zerárã. Hanua na daberã, Er inũ Onã Canaã anua mawanikiaki. Hawẽ baba Perezĩ bakeburã, Esrom inũ Hamul burianibukiaki.

¹³ Hanua Issacar inũ, hawẽ huni bakeburã, hati bunibukiaki, Tola inũ, Puva inũ, Jó inũ, Sinromnã.

¹⁴ Hanua Zebulom inũ hawẽ huni bakeburã, hati bunibukiaki, Serede inũ, Elom inũ, Jaleelrã.

¹⁵ Hati huni bakebu inũ hawẽ aĩbu bake Diná Padã-Arã anua Jacó Léiaki bawa hawenaburã, 33 bunibukiaki, hunibu inũ aĩbuaiburã.

¹⁶ Hanua Gade inũ hawẽ huni bakeburã, hati bunibukiaki, Zifiom inũ, Hagi inũ, Esbom inũ, Suni inũ, Eri inũ, Arodi inũ Arelirã.

¹⁷ Hanua Aser inũ hawẽ huni bakeburã, hati bunibukiaki, Imna inũ, Isvá inũ, Isvi inũ, Berias inũ hatũ pui Sérarã. Hawẽ baba Beriasĩ bakeburã, Héber inũ Malquiel burianibukiaki.

¹⁸ Hanua Labão hawẽ tsuma Zilpa hawẽ aĩbu bake Léia hau dayashunũ inãni hanubi Léiã hawẽ dayaru Zilpa Jacó yunua haki bake washuni Zilpã enaburã, 16 bunibukiaki.

¹⁹ Hanua Jacó aĩ Raquelĩ bakeburã, José inũ Benjamim inibukiaki.

²⁰ José bakewakĩ hawẽ aĩ Asenateki bakewarã, Manassés inũ Efraim Egito anua kainibukiaki. Asenatẽ eparã, maewã Om anua hatũ mekenika yushĩ kẽwanika Potífera inikiaki.

²¹ Hanua Benjamim inũ hawẽ huni bakeburã, hati bunibukiaki, Bela inũ, Bequer inũ, Asbel inũ, Gera inũ, Naamã inũ, Eí inũ, Rôs inũ, Mupim inũ, Hupim inũ, Arderã.

²² Jacó inũ Raquelĩ bakebu inũ hatũ bababurã, 14 bunibukiaki.

²³ Hanua Dã inũ hawẽ huni bake Husim bunibukiaki.

²⁴ Hanua Naftali inũ hawẽ huni bakeburã, hati bunibukiaki, Jazeel inũ, Guni inũ, Jezer inũ, Silémnã.

²⁵ Hanua Labão hawẽ tsuma Bila hawẽ aĩbu bake Raquel hau dayashunũ inãni hanubi Raquelĩ hawẽ dayaru Bila Jacó yunua haki bake washuni Bilã enaburã, 7 bunibukiaki.

²⁶ Jacó enabu huni betsama hati hawẽ yurabuyas Egito anu hikirã, 66 habe bunibukiaki, hawẽ bakebũ aĩbuaibu hatu tanamarã.

²⁷ Hanua Egito anushũ José aĩyãtã bakewarã, dabe inikiaki. Hanua ha Jacóbe Egito anu bea Joséki dasitushiabu tanabu 70 hawenabu habus inibukiaki.

²⁸ Gósen anu kakĩ José anu bebũkiri Jacó txanimakĩ Judá yunukĩ yuikĩ: —“Ẽ ma huai hani haskapa?” ea washũtãwẽ— aka kakẽ Gósen anu hikiaibũ

²⁹ José hawẽ betsã yuia unushuri nĩkatã hawẽ tsumabu hatu yunua hawẽ jumento tarãtiya pewashunabu haki inatã Gósen anu hawẽ epaki haki nukui kai haki kemashũ betximatushitã hawẽ epabe ikukunã habe teikukurabetã nui kasha txakayamai nesetã

³⁰ hanushũ hawẽ epa Israelĩ José yuikĩ: —Epaã, txanima mĩ ea hiweshũyuaki, ea kayabis ma ẽ miki nukutushiairã. Hanũkaĩ mĩ berubi ẽ mia mawashũshanaii— aka

³¹ nĩkatã José hawẽ betsabu inũ hawẽ epã enabu hatu yuikĩ: —Habianu iyukãwẽ. Ẽ matukiri Faraó txanishũyui kairã. “Ma ẽ epa inũ ẽ betsabu Canaã anua ma ebe hiweyui bekãshuki”, akĩ ẽ matu yuishuni kairã.

³² “Hatũ txashuwãyã inũ hatũ ina awaya inũ hatũ mabuya ma beabuki. Hatũ dayarã, txashuwã inũ ina awa mekenika imisbuki”, ẽ matu washuĩ kaii.

³³ Hanushũ Faraónẽ matu kenatã yukakĩ: “Hawa mã dayamismẽ?” matu wa

³⁴ unanumas yuiyamashãkãwẽ: “Nukurã, nũ txashuwã mekenikabuki, nukũ shenipabu keskarã”, mã wa matu nĩkatã ha mae Gósen anu matu hiwemashanikiki, Egito nawabu txashuwã mekenikabube mã husitã hiwetirubumawẽ taearã— hatu watã