Gênesis 42 - Kaxinawá Bíblia (BR)

José betsabu Egito anu benibukiaki, na hãtxarã

¹ Habiatiãri Egito anu shekiwã haya yuiaibu Jacó nĩkatã hawa pitima hawẽ bakebu itxawashũ hatu yuikĩ: “Nenua mã hawawẽ hiwetimaki. Hanua uinanã bestiama nũ ha pi hiweyunũbũ

² Egito anu shekiwã haya ea yuaibu ẽ nĩkashinaki. Hari bushũ nukũ peiwẽ biriatãkãwẽ”, hatu wa

³ hatũ epã hãtxa nĩkatã shekiwã bitanũ ika Egito anu José 10 betsabu buaibũ

⁴ hakia José betsa mashku habe nanea Benjamim hatũ epa Jacó yaushikĩ hatube nitxiãma yuikĩ: “Ẽ hatuki dateaii. Benjamim hari ea itxakawãtirubuki”, inikiaki.

⁵ Canaã mai pakea anuri dasibi buniriaibube Israelĩ bakebũ shekiwã hatubetã bi buriaibũ

⁶ José Egito mai pakea hirabi shanẽ ibukĩ hatũ besti peiwẽ taeshũ shekiwã hatu inãyã hawẽ betsabũri binũ ishũ yukai bua haki nukutã hatũ beya txibaĩ José namã beti ikabu

⁷ José hatu uĩkĩ hawẽ betsabu hatu unãbiakĩ unãma itsakĩ inũ habũ Hebreu hãtxa unãma itsariakĩ hatũ hãtxa mae wanikabetã Egito hãtxa bestiwẽ hatube hãtxakĩ sinatai keskakĩ hatu yukakĩ: —Maturã, hania mã bekãshumẽ?— hatu wa habũ kemakĩ: —Nukurã, nukũ mai pakea Canaã anua shekiwã binũ ika nũ mia anu hushuki— akabu

⁸ José hatu unãbia habũ José unãbumakẽ

⁹ haska namani José hawẽ betsabukiri shinãtã hatu datekĩ hatu unãti wakĩ yuikĩ: —Haskamaki. Mã txanitxakaii. Haratura mae babu nuku deteshanũ ishũ nuku unãti wai mã bekãshuki— hatu wa

^10-11 —Haskamaki, shanẽ ibuũ. Matũ shekiwã peiwẽ matu bianũ ika besti nũ hushuki, nũ mĩ tsumaburã. Nukurã, nũ huni bestitxaitũ bakebuki. Nũ huni pepaki, nũ unãti naismarã, huni txakabumarã— abiabu

¹² José ana hatu yuikĩ: —Mã haskakiri ea yuiairã, haskamahairaki. Haratura nũ mae babubu nuku deteshanũ ika nuku unãti wai mã bekãshuki— hatu wa

¹³ habũri ana kemakĩ: —Nũ haskamahairaki, nukurã, nũ 12 betsabuki, hunibusrã, Canaã anu huni bestitxai hiweatũ bakeburã. Uiã, nukũ betsa mashku hawẽ epa anuki. Hakia betsarã, ma nuku benushuniki— akabu

^14-16 haska wabiabu José ana hatu yuikĩ: —Haska ẽ matu hãtxa wai keskarã, maturã, mã unãtinã nikabuki. Haskakenã, hawẽ matu unãti wakatsirã, Faraónẽ kushipawẽ txanima ẽ matu hãtxa waii. Nenuarã, mã kayuamaki, hau matũ betsa mashku mã iyutanũbunã. Haskawẽ taeshũ matu bestitxai kashũ itãwẽ. Hakia maturã, na hiwe merã ẽ matu bitxiyuai hanushũ manayukãwẽ. Haska txanima kaya mã yui ikimẽkaĩ matũ hãtxa ẽ matu unãshanunã. Faraó shanẽ ibu kayabiwẽ taea matũ betsa mashku huamakẽ mã unãtinã nikabu ẽ matu unãshanaii— hatu watã

¹⁷ ha bitxiti hiwe anu hatu dasibi bitxishina ma shaba dabe inũ besti kaya

^18-20 José ana hatu yuikĩ: —Deusũ kushipaki ẽ meseaii. Haska ẽ matu yuiai keska ikãwẽ, mã hiwenunã, txanima mã huni pepamẽkaĩ. Matu bestitxai bitxiti hiwe anu bashikukãwẽ. Hatiri shekiwãyã bukĩ hau matunabũ pinũbũ hatu bushũrikãwẽ. Ana hukinã, matũ betsa mashku ea uĩmakĩ iweshãkãwẽ, mã haska wabiranaya matũ hãtxa ẽ ikũwãshanaii. Hamẽ matũ betsa mashku mã iweamarã, ana piti biama mã mawashanaii— hatu wa habũ yuikĩ: —Mĩ nuku haska wairã, peki— ikaibũ

²¹ hãtxa maewanika ma kakẽ habu besti hatũ hãtxa shabakabi yuinamei: —Nukunã, nukũ betsa José nũ itxakawaniki. José: “Ea haska wayamakãwẽ”, iki nuitapakĩ nuku haska wabiaya nũ nĩkama iniki. Haskawẽ taeshũ ikis nukũri nũ bika teneriaii— ikaibũ

²² hanushũ Rúben iyuatũ hatu yuikĩ: —Uĩkãwẽ. Ẽ matu yuibia: “Ha berunã itxakawayamanãkãwẽ”, ẽ matu wabia mã ea nĩkama iniki. Uiã, José tenanibuwẽ taeshũ manakukĩ nukuri txakabuwakĩ Deusũ nuku bika tenemaikiki— hatu waya

²³ hatũ Hebreu hãtxawẽ hawẽ betsabu José hatu hãtxa wama hatũ hãtxa maewanikabetã José hawẽ betsabube hãtxakĩ hakia hatũ hãtxa nĩkahairabiaya: —Nukũ hãtxa nĩkamaki— ikaibũ

²⁴ hatu nĩkatã ana hatu hãtxa wama nui José dabekekaĩ dĩtu betsa merã hikia kashai nesetã hatu anu ana hua hãtxa maewanikã merabewaya ana hatube hãtxakĩ José Simeão katutã hatu dapashkamabainai uiaĩbũ José Simeão hatu metaush amatã hawẽ hiwe merã hatu bitximatã

²⁵ hanushũ Egitõ hãtxawẽ hawẽ tsumabu yunukĩ yuikĩ: —Hatũ saku tibi shekiwã matawashũ hune haki hatũ pei naneshũ hatu tibi ana inãwẽ. Ha inũ, bukĩ hau ha pikubaĩtanũbũ pitiri hatu inãkãwẽ— hatu wakĩ yunua hatu ashuãbu

²⁶ Jacó bakebũ hatũ jumentoki shekiwã saku katsaũtã beshetã kaĩbaini bukĩ

²⁷ hanu niti itã ushaibu anushũ hatũ jumento pimakĩ betsã hawẽ saku depetã uĩkĩ saku merã hawẽ pei betxitã

²⁸ hanushũ hawẽ betsabu yuikĩ: —Ehee, uiã! Ẽ pei ea ana naneshuna ẽ betxiairã, ẽ saku meranuarã— hatu wa dasibi datehairai saki saki iki yuinamei: —Haskara nuku wai ikimẽkaĩ, Deusũnã?— ika

²⁹ ana bui Canaã anu hatũ epa Jacóki nukushũ Egito anu haska hatu washiãbu

^30-34 txanikĩ: —Ha huni Egito shanẽ iburã, nukuki sinatai keskakĩ yuikĩ: “Mã unãtinã nikabuki”, nuku wa: “Nũ 12 huni bakebuki, huni bestitxaitũ nuku bawarã. Canaã anu nukũ betsa mashku hawẽ epabe hiweaki. Betsarã, ma nuku debuwanibuki”, nũ aka nuku ana yuikĩ: “Ẽ hãtxa nĩkakãwẽ. Haskawẽ taeshũ mã huni pepabu ẽ matu unãshanaii. Maturã, nenu bestitxai bashikuyukãwẽ. Hakia hatiritũ shekiwã bushũ matunabu buniaibu pimayutãkãwẽ. Hanua matũ betsa mashkurã, ea uĩmakĩ iwetãshãkãwẽ. Haskawẽ taeshũ mã huni pepabu unãti naisma ẽ matu unãshanaii. Mã ha iwei ana huaya matũ betsa ẽ hatu metaush amaima ẽ matu tashnimashũshanaii. Ẽ matu haska waya na mai pakea anu bea hawama mã nipakeshanaii”, nuku washiãki— akĩ hatũ ibu yuiabu

³⁵ hakimamari hatũ saku apatã pewakĩ depetã uiã akeakebaũkĩ hatũ pei tibi betxiaibu hatũ epa dikabitũ uĩ e iki dasibi datehairaibũ

³⁶ haska uĩkĩ Jacó shinãkĩ hatu yuikĩ: —Ea nuitapawakĩ mã ea bakeuma waii. José yama inũ Simeão hayamariki. Ikis ẽ hawẽ henea bake Benjamim iyukatsi mã yuishuki. Haska wakĩ bakeuma wakĩ mã ea nuitapawa txakayamaii. Hawai eã besti ẽ bika teneai?— ikaya

³⁷ Rúbenẽ hawẽ epa yuikĩ: —Egito anu Benjamim mĩ ebe nitxiã mia mekeshũbaĩtãkĩ haririshũ ẽ mia ana iweshũshanaii. Hakia ẽ Benjamim txĩtũwãmakẽ hawẽ taeshũ ea kupikatsi ikĩ ẽ huni bake dabe mĩ tenãtiruki— aka

³⁸ Jacó yuikĩ: —Ẽ bakerã, ẽ matube nitxiãmahairaki. Hawẽ betsa José mawaniwẽ taeshũ hawẽ ewã ha besti bitã haya ea mawashunikẽ haskawẽ taea matube kai bai namakia yutekakenã, earã ẽ haskashanai? Matũ ibu mestebu mã ea tenãshanaii, nui paewenã— hatu waimakẽ