Gênesis 41 - Kaxinawá Bíblia (BR)

Shanẽ ibuhaira Faraó namakĩ uĩshina José shabakabi unãmanikiaki, na hãtxarã

¹ Bari dabe binukainaya hanua Faraó usha namakĩ Hene Nilo kesha ka ha mesti nishũ uiãyã

² 7 ina awa shua hawẽruahaira hene meranua neshekebirã basi piaibũ

³ hanua ha katxu habiatiri ina awa atimapa imanahaira neshekeriabirã ha shuabuki dasitã

⁴ imanahairabũ ha shuarãwã hatu pikĩ keyuai Faraónẽ uĩkubirã bestẽtã

⁵ shinãshini ana usha namakĩ uiãyã 7 shekiwã hawẽ shai bestitxaiki ewai hawẽ bimi ewapabui meshkã dakakẽ

^6-7 hanua txipu shai betsa habiatiri estekiria niwe itxapa bekĩ shana waya kaĩbirã hawẽ bimi shepã bimi ewapabu sheakĩ keyuaibũ uĩkubirã Faraó ana bestẽtã shinaĩ: “Haskakenã, ẽ nama besti ikaii”, ibiatã

⁸ penaya Faraó huĩti nishma punu nuka has shinãhairakĩ Egito anua hawẽ huni mukayabu dasibi inũ huni unanepabu dasibi hatu kena bea itxabu usha namakĩ uĩshinai Faraónẽ hatu yuia tsuã hawa unãma hawẽ nama shabakabi yuikĩ unãmatirubumahaira inibukiaki.

^9-13 Hanushũ vinho hushkeshũtã meshũmis shanẽ ibũ atimas Josékiri shinãtã Faraó yuikĩ: —Ẽ txakabuwẽ taeshũ mĩ nuku aka ẽ uĩyama ha shinãkĩ ẽ mia yuiaii. Mĩ tsumabuki sinatakĩ ea inũ misi wanika shanẽ ibu nuku dabe mekenika capitãonẽ hiwe anu mĩ hatu nuku yunua nuku bitximabu ea inũ misi wanika shanẽ iburã, shaba betsatiã habias meshu merã usha namakĩ nukũ nama betsa tibi uĩshĩkĩ hawẽ shinã nũ unãma shanẽ ibũ mekenika dayaru escravo Hebreu nawa berunãtũ nukũ nama tibi nũ yuia nukũ nama tibi shabakabi yuikĩ nuku unãmashĩkẽ shaba dabe inũ besti kaya habiaskari Hebreu nawã nuku yuishina keska wakĩ mĩ ana ea txĩtũwãyamaki, ẽ namayama keska wakinã. Ha inũ, misi wanika shanẽ ibu mĩ hatu teneshmayamaki, haska hawẽ nama yuiyama keska wakinã— aka

¹⁴ haska wa nĩkatã Faraónẽ hawaira bitxiti hiwe anu hatu yunua bushũ José kaĩmabirã Faraó anu iyukatsi mashtekĩ keshniyabi mawerẽ akĩ pewatã tari bena sawematã Faraó anu uĩmakĩ ha bebũ iyuabu

¹⁵ Faraónẽ José yuikĩ: —Ẽ usha namashinai ẽ hatu yuka tsuã ea shabakabi yuitirubumaki. Mianã, namabu mĩ hatu unãtã yuitirukiaki. Txanimamẽ?— aka

¹⁶ José kemakĩ: —Peki, haska mĩ ea yuiairã. Emebi ẽ unãmatirumaki. Hakia mĩ nukũ shanẽ ibuhaira ẽ mia yuinũ ẽ mekenika Deus kushipa dasibi binuatũ ea unãma ẽ miki txanitiruki, ewẽ taeshũ hau mia merabewanunã. Mĩ haskara uĩ namashini ikimẽkaĩ ea yuiwe— aka

^17-24 —Ẽ usha ẽ namashinairã, ẽ eska shinaiĩ. Hene Nilo kesha ka nishũ ẽ uiãyã 7 ina awa shua hawẽruahaira hene meranua neshekebirã basi piaibũ hanua txipu habiatiri haska Egito anua awa ẽ uĩsma atimapa imanahaira mapekeriabirã ha ina awa shuahaira pikĩ keyubiatã hawa ana shuama dasibi habiaskas imana atimapa mapuabu uĩkubirã ẽ besteã ishĩ hanua ana ushakaĩ ana nama betsa uĩkĩ eska ẽ uĩshinaii. 7 shekiwã hawẽ shai bestitxaiki ewai hawẽ bimi ewapabu hawẽrua meshkã dakakẽ hanua txipu shai betsa habiatiri estekiria niwe itxapa bekĩ shana waya kaĩbirã hawẽ bimi shepã bimi ewapabu sheakĩ keyuaibũ bestẽtã bika tenekĩ penaya huni mukayabu ẽ hatu kena beabu ẽ namashinai ẽ hatuki txanibia tsuã taska unãkĩ shabakabi ea yui pewabuma ẽ iki ikaii— aka

²⁵ nĩkatã José hawẽ shanẽ ibuhaira Faraó kemakĩ yuikĩ: —Ha nama dabe mĩ uĩshinairã, habias nama mĩ uĩ ishiaiĩ. Eska mĩ uĩ ishiaĩ mia shabakabi yuinũ nĩkawe. Mĩ mai pakea hirabi anua eska Deus kushipahaira dasibi binuatũ mia ashũkatsi mia unãmanũ ika ishĩkiki. Nĩkawe, mia yuinunã.

²⁶ Ha 7 ina awa shua hawẽruarã, 7 bariki. Ha 7 shekiwã tashu ewapaburã, habias baririki. Ha nama daberã, habias namaki.

²⁷ Hamẽ ha 7 ina awa atimapa imanarã, uatiã 7 bari iriashãkanikiki. Habiaskari ha 7 shekiwã niwe estekiria bekĩ shana warã, 7 baririki. Ha bari haskaitiã 7 ano piti beneamakẽ minabũ buni tenekubaĩshãkanikiki.

²⁸ Na namapã mia uĩma shinainã, haska miki txanishinaki. Deus kushipahaira dasibi binuatũ haska uatiã kaĩmashanai mĩ shanẽ ibukẽ mia unãmashina shabakabi ẽ mia yuiaii.

²⁹ Hanushũ mia shabakabi eska washanikiki, mia yuinũ nĩkawe. Na Egito mai pakea hirabi 7 ano shekiwã mirima hamẽ iyushanikiki.

³⁰ Hanua 7 ano kakẽ ana piti beneama buni paepa teneshãkanikiki, dasibibũ yunu keyukũkainirã.

³¹ Haska hiwekĩ hawa piti hayama buni tene txakayamaibuwẽ taeshũ ha 7 ano haskaitiã mã hiweshũ shekiwã itxapawashũ pikubaini mã ana shinãma ishanaii, bunirã.

³² Hanushũ Deus kushipahaira dasibi binuatũ haska wakatsis ikĩ mia uĩmashina samama taewashanaiwẽ taea mia dabeki namapã uĩmashinaki. Uĩrawe.

³³ —Na habiatiã mĩ nukũ shanẽ ibuhairawẽ taeshũ menã huni betsa unanepa anika benabaũkĩ betxitã yunuriwe, hau mĩ mai pakea hirabi anu piti mekekĩ bebũkiri mia pewashũkubainunã.

^34-35 Nukũ shanẽ ibu Faraónẽ, ha huni katutã mĩ eska watiruki, mia yuinũ. Shanẽ ibu beshmas tibiri katutã hatu yunuwe, mai pakea hirabi piti dayaibu tibi anua hau uĩbaunũbunã. Ha 7 ano shekiwã bimitxakayamaitiã shekiwã shemekĩ itxawakĩ 5 maspuaibu tibi anua uĩbaũkĩ bestitxai tibi mina mia washũtirubuki. Hanushũ mia arushũkĩ hanu piti meketi hiwe mia washũtã ha merã ha shekiwã ikai bipakekĩ hau mia hatu mekemashũkubaĩshanũbũwẽ, minabũ pishanairã.

³⁶ Mĩ hatu haska wamakẽ Egito anua ha 7 ano yurabũ buni tenetxakayamaibutiã unanepakĩ mĩ bebũkiri hatu arumaimawẽ taea minabũ ha piti pi mawama hiweshãkanikiki— aka

José Egito anua shanẽ ibu ha katxu yununika inikiaki, na hãtxarã

³⁷ haska wakĩ José hatu yuia Faraó hawẽ shanẽ ibu beshmas yununikabubetã nĩka pewatã

³⁸ Faraónẽ hatu yuikĩ: —Na huni keskarã, hania haska huni nũ haki nukutirumẽ, Deusũ yushĩ hayarã?— hatu atã

³⁹ José yuikĩ: —Tsua mia keska unanepa hayamaki, Deusũ dasibi unãmakĩ yuimamisrã.

^40-41 Haskawẽ taeshũ Egito mai pakea hirabi anushũ habia mia ẽ mia katuaii. Mĩ ẽ yunua akai enabũ mia nĩkatã ẽ hiwe ewapa hawẽrua anu inũ ẽ mai pakea dasibi anushũ mia uĩkĩ hau dasibibũ mĩ yunua txibãkubaĩshanũbũwẽ, hamẽ earã, ẽ shanẽ ibuhaira bestikirã, mia binuarã— atã

⁴² hanushũ Faraó shanẽ ibuhairatũ hatũ besuubi hawẽ meitxikiti metseketã José sawematã hanushũ hawẽ tsumabu yunukĩ hau tari pe hawẽrua txasha txasha ikai sawemakĩ inũ ouro teuti teumakĩ hatu hawẽrua wamatã

⁴³ Faraónẽ hatu haska wamatã hatu yuikĩ: —Ha cavalo tarãti dabe ẽ haya ha hawẽrua beshmas ẽ José ibuwamaii. Txipu hawena ishanikiki. Haskakẽ na habiatiã hau uĩ taewabaunũ ẽ matu yunuaii. Mã haska taewamabaĩtanũbũ ea nĩkakãwẽ. José hawẽ tarãtiki nia kaya bebũ kushibaĩkĩ hui kushipawẽ hãtxa wakĩ yura mapuabu hatu yuibaĩkĩ: “Bai tapĩshũbaini ha kai bebũ dãti ishũbaĩkãwẽ, hau hari kanunã. Hatu akubaũtãkãwẽ”— hatu wa haska hatu yunua nĩkatã José imabaunabu dasibi Egito mai pakea anu shanẽ ibui taekĩ uĩkubaunikiaki.

⁴⁴ Haskakaũtani txĩtũkiranaya Faraónẽ José yuikĩ: —Mia mĩ haskabia earã, ẽ shanẽ ibuhaira Faraó bestiki. Haskawẽ taeshũ hau mia txibãkĩ kaneyamanũbũ enabu hatu yunupakeshãwẽ, Egito hirabi anuaburã, mĩ hatu yunuama tsuã hawa watirumakirã— atã

⁴⁵ Egito hãtxawẽ José kena benawakĩ: “Zafenate-Panéiaki”, anikiaki, nukũ hãtxawẽ yuiarã: “Deus Hiweatũ Hãtxamamiski”, akĩ kenakĩnã. Haska watã Egito maewã betsa hawẽ kena Om anushũ hatũ mekenika deus hawenabu yukashũmis Potíferã aĩbu bake Asenate José bimakĩ aĩwãmaima haskai José shanẽ ibukĩ Egito mai pakea uĩkubaini hiwekũkainikiaki.

⁴⁶ Ha José haskairã, 30 bariya Egito shanẽ ibuhaira Faraó anu iyuabu shanẽ ibu washina hanushũ José Faraó yuikĩ: “Haska mĩ ea yunushinarã, natiã mia taewashũkĩ ẽ ma aki kaii, dasibi Egito uinũ ikarã”, ikaini

⁴⁷ hanua ha haska txanima 7 ano shekiwã mirima hamẽ ikaya

⁴⁸ 7 ano hatũ mae tibi anu shekiwã dayai taekĩ itxawaibu anu José tsumabu bushũ hatũ mae anu shekiwã itxawakĩ ano tibi mãtxĩ betsa bikubaĩkĩ hanushũ mae ewapa betsa betsapa anuri shekiwã habiari aruti hiwe merã itxawariakĩ hatu mekemakeake mekekubainaibũ

⁴⁹ hati shekiwã itxawaibu tsuã hati tanatiruma mashiti keska arukĩ hatira arutã José ana tanatiruma henenikiaki.

⁵⁰ Hanua buni tekiriamatiã José huni bake dabe wanikiaki, hawẽ aĩ Asenatekirã.

⁵¹ Ha dukũ bakewaima kaiã José yuikĩ: “Ẽ epa hakimai inũ, hawenabu hakimai inũ, haska bika betsa betsapa ẽ binukubirãshina Deusũ ea hakimawaimawẽ taea ẽ bakẽ kena Manasséski”, akima

⁵² hanushũ ha katxu hawẽ bake kaiã, shinãkĩ yuikĩ: “Nenushũ ea itxakawabianibu anushũ Deusũ ea pawaiwẽ taea ẽ bakẽ kenarã, Efraimki”, anikiaki.

⁵³ Ma 7 ano ka yunu mirima hamẽ ishiã Egito anua binukainkiranaya

⁵⁴ hanua haska José yuini keskai 7 ano buni pakei taeaibũ mai pakea betsa betsapa tibi hiwebaunabu buniaibũ hakia Egito anu besti piti aru hayakẽ

⁵⁵ hanua Egito nawaburi buni taebaũkĩ hatiritũ Faraó shekiwã aru yukabu shanẽ ibuhaira Faraónẽ hawenabu dasibi hatu yuikĩ: —Ea yukama José anu bushũ haska matu yunuai keska habe hãtxakĩ yukatãkãwẽ— hatu wa

^56-57 hatu haska waimakẽ mae betsa betsapa anu buni pabauni pikuaya hanushũ José hawẽ piti aruti hiwe anua Egito nawabu shekiwã peiwẽ hatu inãkatsi bepeãyã hawẽ tsumabũ hatu inãkĩ taewanibukiaki. Hatu haska waya buni pikukũkainaya hanua mai pakea tibi anuaburi hawa pitima Egito anu besti piti haya txaniaibu nĩkatã yura shukua betsa betsapatũ hanua binũ ika José anu bebirã bebiranibukiaki, hatũ mae anu hawa piti hayamawẽ taearã.