Êxodo 32 - Kaxinawá Bíblia (BR)

¹ ha 40 shaba binukaini mati anua Moisés yane buturiamakẽ Israelĩ enabũ uĩ Arão anu hunibus bua haki itxashũ yuikĩ: —Ha Moisĩ Egito anua hatũ nuku tashnimabiranimarã, haskashinamẽ? Nũ unãmaki. Haskakenã, nukũ mekenika yushĩ betsabu wakĩ nuku dami washũwẽ, hau hatũ iyukĩ nuku bebushũbainũbunã— akabu

² hatũ hãtxa Arãonẽ nĩkatã hatu yuikĩ: —Ouro pau matũ aĩbuaibu anua inũ, matũ huni bakebu anua inũ, matũ aĩbu bakebu anua hatu biãbaũkĩ keyutã nenu eanu betãkãwẽ— hatu wa

³ hatũ ouro pau peka keyuabu itxawatã huni dasibibũ Arão anu bebirã bebirãkĩ inãbirãbiranaibũ

⁴ Arãonẽ bitã ouro pau dasibi mishki kuahairatã haki payukĩ txakã txakã akĩ ina awa baketiu wakĩ hawẽ shũpĩ wãti inũ hawẽ mastatiwẽ Arãonẽ datsa datsa akĩ shũpĩ wãkĩ ina awa bake dami wakẽ dasibibũ uĩkĩ hatu yuikĩ: —Israelĩ enabuũ, uĩkãwẽ. Narã, nukũ mekenika yushĩ deuski, hatũ Egito anua nuku tashnimabiranimarã— hatu abaunaibũ

⁵ Arãonẽ haskaibu uĩkĩ dami bebũ hawẽ kẽwãti txi tapu watã hui kushipawẽ hatu banabimakĩ: —Meshukirirã, nukũ mekenika yushĩ Senhor Deus benimawai nũ beyus shanũbũ ikis dasibi pewakãwẽ— hatu wa

⁶ ushashini penaya butushũ Deus kẽwãti inũ hawẽ daewati akĩ hatũ ina itxapa tesẽshũ ha txi tapu anu ina hanashũ menukĩ keyukẽ yurabu dasibi tsaubaũshũ pikĩ mabesh akĩ keyutã dasibi benimai beyusaibũ

⁷ hanua haskaibũ Senhor Deusũ Moisés yuikĩ: —Uĩwẽ. Minabu Egito anua mĩ hatu iweimarã, hatũmebi txakabui benukanikiki. Hatu uĩ hawaira butukaĩtãwẽ.

⁸ Haskai pe hiwebaĩtirubu ẽ hãtxa dama ẽ hatu yuibiashina hawaira ea henei pashkatã ourowẽ ina awa bake dami washũ inãkuĩ inãkĩ yuinaka menu keyukĩ yuikĩ: “Israelĩ enabuũ, nĩkakãwẽ. Egito anua nukũ mekenika yushinẽ nuku iweimatũ dami itsaki”, akĩ ma yuibaũkanikiki, minabunã—

⁹ akĩ ana yuikĩ: —Ha yurabu ẽ hatukiri shinainã, mawa huĩti kushihairabu ẽ hatu uiaiĩ.

¹⁰ Hawa hatuwẽ nuiyamawe, natiã ẽ hatuki sinatahairaiwẽ taeshũ ẽ hatu yamawairã. Hatu yamawatã mia pahaira wakĩ minabu ẽ mia itxapa washũshanaii, hatu kushipa wakinã— aka

¹¹ hawẽ mekenika Senhor Deuski datekĩ daewanũ ishũ Moisĩ eska hãtxa yuikĩ: —Senhor Deusuũ, Egito anua minabu mĩ kushipawẽ hatu uĩmakĩ mĩ hatu iweimarã, haskai mĩ hatuki sinata txakayamai?

¹² Egito nawabũ mikiri shinã txakakĩ: “Senhor Deusũ harishũ hatu parãtã mati matipa anushũ tenanũ ishũ hatu iyuimashũ mai hirabi anua hatu yamawashinaki”, ikĩ mikiri yuitirubuki. Mikiri haska hãtxatirubukẽ haska hatuki sinatai henei beshtekeriwe, minabu mĩ hatu txakabuwatikiri mĩ shinãshurã.

¹³ Shinãwẽ. Miki txiti ikabu Abraão inũ, hawẽ bake Isaque inũ, hawẽ baba Israelĩ mia nĩkapaunibu ha dabe inũ besti ana shinãkubaĩwẽ, hatu hakimamarã. Miã kayabis habu tibi yubakĩ: “Bishiti wakĩ minabu ẽ pahairawakĩ na mai pakea hirabi ẽ hatu yunua ibu wakubaĩshãkanikiki”, hatu wakĩ mĩ kenawẽ mĩ hatu yubaniki. Haska mĩ yubani hakimama mĩ shinã betsa wawe, hatuki sinatakĩ yamawamarã— aka

¹⁴ Moisĩ hãtxa nĩkatã haska hatu txakabuwati hãtxashu Senhor Deusũ shinã betsa wai beshtekeaya

^15-16 mishki sapa dabe washũ uke dabebi bishakĩ hawẽ hãtxa keneshĩshũ Deusũ Moisés inã mebĩtã Moisés dabekekaĩkĩ hawẽ yunuti inũ hawẽ nemati hãtxa unãti mishki sapa dabe bakebirani butukiranaya

¹⁷ hanushũ hawenabu sai sai ikaibu Josué nĩkakĩ Moisés huai yuikĩ: —Nukũ mae anua detenamei sai sai ikaibu ẽ nĩkaii— aka

¹⁸ hakia Moisĩ kemakĩ: —Haskamaki. Hatu binutã benimai sai sai ikaibu inũ ma hatu deteabu bis bis ikaiburi ẽ nĩkamaki. Betsahaira ẽ nĩkaii— aka

¹⁹ hatũ ushati tari hiwe pũtebaunabu anu hikitushitã ina awa bake ouro dami kẽwaĩ nawaibu betxitã uĩ hatuki sinatakĩ mati tenãmãshũ mishki sapa dabe bakebirãshu sanãtã Moisĩ puta durukui sa iki keyuaya

²⁰ haska watã hawaira ouro dami washiãbu Moisĩ tsumashũ txi anu napua ouro dami ma menu keyua hatu durumashũ hanu ũpash bimisbu anu hawẽ duru hene anu sa sa akĩ hatũ txakabu hatu unãmakĩ ũpash ouro dami duruyabi Moisĩ Israelĩ enabu dasibi hatu amakĩ keyutã

²¹ ha haska hatu wamashinakiri hawẽ betsa Arão Moisĩ ha akĩ: —Yurabũ mia hawa txakabuwamabu hatuwẽ datekĩ Deuskiri mĩ hatubetã hawa txakabuhairawashinamẽ?— aka

²² Arãonẽ Moisés beparãkĩ kemakĩ: —Ẽ shanẽ ibuũ, eki sinatayamawe, na yurabũ txakabu betxipaikĩ amisburã, mĩ unaĩwẽ taearã.

²³ Habũ ea yuikĩ: “Mĩ betsa Moisinã, Egito anua nuku iwebiaima haskashinamẽkaĩ nũ unãmaki. Haskakenã, nukũ mekenika yushibu dami nũ uĩkubaĩshanũ nuku ashũwẽ, hau hatũ nuku mekebaĩkĩ iyushanunã”, ea wabu

²⁴ ea haska yunuabu hatu yuikĩ: “Mã tsuabura ouro pau hayaburã, ea beshũkãwẽ”, ẽ hatu wa itxawatã ea inãbu txi here hi ikai namakis ẽ napua ha ouro dami ina awa bake keska hamebi tashnishinaki— aka

²⁵ huni betsa betsapabu Israelĩ enabuki sinatamisbu hatuki kashetirubu Moisĩ unãkĩ inũ Arãonẽ hatu mekekĩ hatu hawa nemama hatũ txakabu besti txibaĩ beyakũkainai Moisĩ shabakabi uĩtã

²⁶ hatũ mae kesha nishũ hui kushipawẽ hatu yuikĩ: —Tsuabũra mã Senhor Deus txibãkatsis ikairã, neri ea anu itxai bekãwẽ— hatu hawẽtsaĩs akawã Levĩ enabu hunibu dasibi bei Moisés anu itxaibũ

²⁷ Moisĩ hatu yuikĩ: —Israelĩ enabũ mekenika Senhor Deusũ hãtxa matu yuinũ ea nĩkakãwẽ. Matũ mane detenameti kenu txaipa bitã tari hiwe tibi anu hikikubaũkĩ ha ouro ina awa bake dami habuã kẽwaĩ beyusi henekatsi ikabuma hatuwẽ nuiama hatu detekĩ keyubaũtãkãwẽ, mĩ betsabu inũ, mĩ haibuaibu, inũ mia dapi hiwebaunaburã— hatu wa

²⁸ haska Moisĩ hatu yunua nĩkatã Israelĩ bake Levĩ enabũ habu txakabui patapaibu detekĩ 3.000 hunibus tenãkĩ Moisĩ yunua ashũkĩ meneshunabu

²⁹ hanushũ Levĩ enabu Moisĩ yuikĩ: —Natiã Senhor Deusũ hãtxa txibãkĩ matũ bakebu inũ matũ betsabu kupikĩ mã hatu deteshuwẽ taeshũ natiã Senhor Deusũ matu duawakubaĩshanũ ika matu kushipawakĩ katushuki— hatu wa

³⁰ ushashini ana penaya hawenabu dasibi Moisĩ ana hatu yuikĩ: —Hawẽ hãtxa danãkĩ dami yushĩ watã kẽwainã, Senhor Deus itxakawai mã haki kashehairashinabuki, txakabuhairairã. Nukũ mekenika Senhor Deus anu ana mapekeshũ daewakĩ matũ txakabu hau matu buashunũ ẽ matu yukashuni kaii. Ẽ hãtxa nĩkatã Senhor Deusũ ana matu kupiama ishanimẽkaĩ, matũ txakabu ana shinãmarã— hatu watã

³¹ Senhor Deus anu ana mapekeshũ yuikĩ: —Txanimahaira yurabũ mĩ hãtxa danaĩ txakabuhairakĩ ouro yushĩ dami watã ha kẽwãshinabuki.

³² Habiaskabiakẽ eanã, ẽ mia hatu ea ashuaiĩ. Mĩ hatũ txakabu buakĩ ana shinãma mĩ hatu kupiamarã, haska peki. Hamẽ hatũ txakabu shinãkubaĩkĩ mĩ hatu kupikatsi ikairã, minabu hawẽ tanati una anua ẽ kena mĩ eki kenenirã, ẽ kena ea tere ariawe— aka

³³ hanushũ Senhor Deusũ Moisés kemakĩ: —Haskamaki. Tsuabũra ea danaĩ txakabuwaibu besti habuna besti ẽ tere akubaĩshanaii.

³⁴ Hakia natianã, ẽ hatu kupiyuamaki. Hakia hari ẽ mia yuima anu minabu hatu iyuritãshãwẽ. Hau hatũ mia merabewai bebushũkainũ ẽ nai tsuma kushipa ẽ mia yunushunaii. Hanu yurabu dasibi ẽ hatu unãti waitiã habu txakabunibu hatũ txakabuwẽ taeshũ ẽ hatu kupishanaii— atã

³⁵ hanushũ Israelĩ enabũ habũ ha ina awa ouro dami Arãonẽ hatu ashũshina kẽwãshinabu shinãkĩ hawẽ hatu kupikĩ isĩ paepa hatu yununikiaki.