Êxodo 15 - Kaxinawá Bíblia (BR)

Benimai hawẽ huiwẽ Moisés kãtanikiaki, na hãtxarã

¹ Hanua Senhor Deus kẽwaĩ Moisés inũ Israelĩ enabu hatũ huiwẽ kãtakĩ: “Hatũ cavalo inũ haki katsaumebainaibu henewẽ hatu atxikĩ hasakĩ keyukĩ Deusũ hatu yamahairawashuwẽ taeshũ ẽ huiwẽ Senhor Deus kẽwaĩ ẽ kãtakũkaĩshanaii.

² Hakiri ẽ kãtakũkainũ ea kushipa wakĩ Senhor Deusũ ea merabewamiski. Ẽ mekenika Deus kayabiki. Haskawẽ taeshũ heneama ẽ kẽhairawakubaĩshanaii. Ẽ epã mekenika Deus iniwẽ taeshũ hakiri hãtxa pepa besti ẽ hatu yuikubaĩshanaii.

³ Senhor Deus kushipahairatũ yurabu kushipabu hatu binumiski. Hawẽ kenarã, Senhor Deus hamebi hiweaki.

⁴ Faraónẽ cavalo tarãbaĩti inũ, hawẽ detenamenikabu kushipabu ianẽwãwẽ hatu atximakĩ hawẽ detenamenikabu habũ hatu yunumisbu shanẽ ibuburi Ianẽwã Tashipa anu hatu hasashuki.

⁵ Mishki keskai hene nuahaira merã Faraónẽ detenamenikabu ibubis pukuaibũ ianẽwanẽ hatu atxishuki.

⁶ Ẽ Shanẽ Ibu Senhor Deusuũ, mĩ pũyã yusiuri kushipahairawẽ miki sinataibu mĩ hatu binumakĩ keyumiski.

⁷ Tsuabũra mia sinatamaibu mĩ kushipa tsuã mia nematirumawẽ mĩ hatu kupikĩ keyumiski. Hatuki sinatakĩ basi txushia kua keska wakĩ mĩ hatu yamawamiski.

⁸ Hatuki sinatahairakĩ hatu shũ akĩ ianẽwã mĩ pashkaya hene tũkash tũkash ibiai mishkiwẽ kene kebeã keskashuki, hanua ianẽwã nuahairabia namakis tea nia hawa takash ikamarã.

⁹ Hanua Egito detenamenikabũ shinãkĩ: ‘Hatu txibãbaĩ atxishũ hatũ mabu mebĩshũ pashkanũ bukãwẽ, hatu haska wai nũ benimanũbunã. Hanua derati kenuhaira txaipa sitã ẽ mekẽwẽ bais bais akĩ ẽ hatu yama washanaii’, ikaibũ

¹⁰ hakia mĩ shũ akaya ianẽwanẽ hatu shea keyushuki, hene tũkash tũkash ikai anu mane chumbo shãkama hamebi pukumis keskairã.

¹¹ Ẽ Shanẽ Ibu Senhor Deusuũ, mekenika yushĩ betsa mia keska tsua hayamahairaki. Meribi pepahairakĩ dasibi mĩ binu keyuaki. Hamapai sharabu wakĩ: ‘Habaa!’ imakĩ mĩ hatu datemamiski. Haskabia hau mia kẽwãshanũbũ mĩ pepa ikũkainaii.

¹² Mĩ kushipawẽ hatu kupikĩ mai tuash akĩ hashpa watã mai mĩ hatu sheamashuki.

¹³ Nukunabu hatu detepanãbũ mĩ nuikipawẽ nuku duawakĩ mekeshũ mĩ hatu nuku nemashũshuki. Egito detenamenikabu anua mĩ nuku hatu mebĩshũ mĩ kushipawẽ mĩ nuku yunuaii, unanuma mĩ hiwe meribi anu iyukinã.

¹⁴ Haska mĩ amis nĩkai nawa betsa betsapabu datehairashãkanikiki. Filisteu nawabu datei saki saki ikaibũ

¹⁵ Edom nawabu shanẽ ibubu dakei hawa hãtxabumakẽ Moabe nawabu kushipaburi datei saki saki iriaibũ Canaã nawabu kushipabia ana kushipa hayama shinaĩ dasibi huĩti nishmashãkanikiki.

¹⁶ Ẽ Shanẽ Ibu Senhor Deusuũ, Egito nawabu kushipa anua mebĩtã mina wakĩ mĩ nuku iweaya nũ hatu daĩbaĩkĩ keyuriama mĩ kushipawẽ datei mishki keskai hawa tukuama hau pes manishanũbũwẽ!

¹⁷ Ẽ Shanẽ Ibu Senhor Deusuũ, hari nũ hiwenũ mati meribi pepa mĩ nuku katushuni anu nũ hiweshanũ nuku iyuwe, mĩ kushipawẽ mĩ ma nuku pewashuni anu hanu mĩ meribi hiwea anurã.

¹⁸ Senhor Deusuũ, miarã, mĩ shanẽ ibu ikũkaĩshanaii, ikibi ikirã.”

Benimai Miriã kãtanikiaki, na hãtxarã

¹⁹ Ianẽwã namakis cavalo tarãbaĩtiki mapuabu inũ cavalo katsaumenikabube Faraó hikia Senhor Deusũ henewẽ hatu atximashukẽ hakia habias ianẽwã namakis mai tsusĩ anu bebũkiri Israelĩ enabu pukei keyubainabũ

²⁰ hanua Miriãnẽ Deus kẽwaĩ hakiri hãtxashũmis Arãonẽ pui hawẽ mimawati bitxi turu tũ tũ atiya kai aĩbuaibu dasibi bitxi tũ tũ atiyabũri Miriã txibaĩ nawakubainaibũ

²¹ hatu kebi Miriã kãtakĩ: “Egito nawabu nuku binumakĩ hatu yamahairawashuwẽ taeshũ Senhor Deus kẽwaĩ kãtakubainãkãwẽ, ianẽwã merã cavalo inũ katsaumenikabu ianẽwãwẽ hatu yamahairawashurã”, ikaya aĩbuaibũ hatũ mimawati tsuma Miriãbe nawai shekebaunibukiaki.

Ũpash muka anushũ yurabũ Moisés yuanibukiaki, na hãtxarã

²² Ianẽwã Tashipa anua Moisĩ hatu kaĩmabaĩkĩ iyua bui hanu tsua hiweabumanu hawẽ kena Sur anu shaba dabe inũ besti bukubaini ũpash hawa betxiama

²³ atimas txatxa betsa Mara anu nukushũ ha txatxa ũpash meabu mukahairakẽ danãkĩ: “Haska nũ atirumaki”, ikaibũ

²⁴ ha hene mukahairakẽ Moiséski sinatakĩ ana yuãkĩ: “Ũpash manutxakayamakĩ nũ hania akai?” ikaibũ

²⁵ Senhor Deusũ hau hatu merabewanũ Moisĩ hatu ea ashũkĩ yuka ni mashu betsa Senhor Deusũ Moisés unãmakĩ yuikĩ: “Ha ni mashu betsa ha hene mukahaira anu putawe”, aka haska wa dami hene batahairanikiaki, ana mukamarã.

²⁶ Hanushũ Senhor Deusũ hatu yubakĩ yuikĩ: “Haska ẽ matu yunuai besti ea benimawakĩ ẽ yunuti akubaĩkĩ ẽ nemati nĩka pewakubaĩkĩ ẽ hãtxa dasibi mã nĩkakubainaibũ Egito nawabu ẽ hatu yumãwãshina keska wakĩ ẽ matu kupiama ishanaii. Hamẽ mã ea nĩkamahairakẽ ẽ matu kupishanaii. Earã, ẽ Senhor Deuski, matũ shusha wanikarã, ẽ ea bestiki.”

²⁷ Hanua ana bukubaini hanu 12 txatxa netsuisma pepa inũ 70 panĩwã mapu anu hawẽ mae kena Elim anu hikiabu hanu txatxa ũpash itxapa anu hatũ tari hiwe dũkemabaũkĩ pũtebaunabũ