Daniel 2 - Kaxinawá Bíblia (BR)

Shanẽ ibuhaira Nabucodonosor usha namashina hatu yukakĩ unãti wanikiaki, na hãtxarã

¹ Nabucodonosor shanẽ ibuhairai ma 2 ano kainaitiã usha namakĩ nama betsa betsapa uĩkubainaiwẽ taea datekĩ shinãhairai ana ushatiruma

² haskawẽ taea hawẽ nama betsa betsapa hau hawẽ mukayabu inũ, haskashanai bishiwẽ unanikabu inũ, yushĩ yukanikabu inũ, unanepabũ hau hawẽ nama yui benũbũ hawẽ tsumabu yunua bushũ hatu ishũtanabu ha bebũ dasibi mapuabu

³ shanẽ ibu Nabucodonosorĩ hatu yuikĩ: —Ẽ usha namakĩ uĩshina hawẽ shinã ẽ tapĩpanã hawẽ datei ẽ bika teneaii— hatu wa

⁴ hatũ Siríaco hãtxawẽ unanepabũ hatũ shanẽ ibu yuikĩ: —Shanẽ ibuũ, habi mĩ hiweyukũkaĩshanaii, hawa beshtekeamarã! Nũ mĩ dayarurã, harakiri mĩ namashina nuku yuiwe, haskara hawẽ shinã nũ mia yuikĩ tapĩmairã— akabu

⁵ shanẽ ibũ hatu kemakĩ yuikĩ: —Ẽ namashinarã, ma kaĩkaina ẽ hakimaki. Hakia haska namakĩ ẽ uĩshina hakiri mã ea yuikĩ unãmama matũ yura meshte meshte akĩ matu txuri washãkanikiki. Ha inũ, matũ hiwe tibi berãtã hanus maspu washãkanikiki.

⁶ Hakia namakĩ hawara ẽ uĩshina inũ haska ẽ namakiri hawẽ pe shinãmati shabakabi mã ea yuiayarã, matu kẽhairawakĩ matu merabehairawakĩ hamapai sharabu mabu ẽ matu inãkuĩshanaii. Haskawẽ taeshũ namakĩ hawara ẽ uĩshina unãtã hakiri ea yuikãwẽ— hatu wa

⁷ ha katxu unanepabu betsã kemakĩ yuikĩ: —Ẽ shanẽ ibuũ, haska mĩ namashina nuku yuiwe, mĩ nuku yuia haska mĩ namakĩ uĩshina haska ishanai shabakabi nũ mia yuiairã— akabu

⁸ shanẽ ibũ ana kemakĩ hatu yuikĩ: —Ẽ manakuti mã nĩkashuwẽ taeshũ ea manamayukĩ mã ea nemayukatsis ikaii. Mã ea haska watirurã, ẽ unaiĩ.

⁹ Habiaskabiakẽ ẽ namashina mã ea yuiamarã, habias ẽ kupitiwẽ mã nuitapashanaii. Ẽ shinã betsa ea wamakatsis ikĩ unanumas txani hãtxa ea yuinũ— iwanã —yuinamekĩ habias mã shinaiĩ. Haska ẽ namashina besti ea yuitã, hanushũ ha nama ẽ uĩshina haska ishanai mã ea tapĩma nĩkatã ẽ unãshanaii— hatu wa

¹⁰ unanepabũ ana kemakĩ yuikĩ: —Hawara mĩ unãkatsis ikai mai hirabi anushũ tsuã haskatã haskakiri mia yuitirumahairaki. Ha dikabi shanẽ ibu betsabu kushipabiakĩ na mĩ yuka ikai keska huni mukayabu inũ, yushibu yukanikabu inũ, huni unanepabu haska hatu yukai hãtxaisbumaki.

¹¹ Shanẽ ibuũ, hawara mĩ yuka ikairã, bikahairaki. Tsuã mia yuitiru hayamahairaki, yushibubũ besti atiruburã. Hakia haburã, yurabube hiweabumaki— akabu

¹² haska waibu hatũ hãtxa nĩkatã sinatahairakĩ Babilônia anu unanepabu dasibi hau hatu tenanũbũ shanẽ ibuhaira Nabucodonosorĩ hatu yunua

¹³ haska hatu banabimakĩ keyutã Daniel inũ hawẽ haibuaiburi hatube tenanũ ishũ hatu benabaunaibũ

Shanẽ ibuhaira namakĩ uĩshina Danielĩ yuikĩ unãmanikiaki, na hãtxarã

¹⁴ unanepabu tenanũ ika shanẽ ibuhaira mekenikabu yununika hawẽ kena Arioquẽ Daniel betxishũ atxia daewakĩ unãshubira hãtxa beshuniwẽ hãtxa wakĩ

¹⁵ Danielĩ yukakĩ: —Haskakĩ nukũ shanẽ ibuhairatũ hatu tenãkãwẽ, iwanã, hawaira matu yunushumẽ?— aka haskawẽ taeshũ hatu akai Arioquẽ Daniel shabakabi yuikĩ nĩkama

¹⁶ habe hãtxakatsis ikaya Nabucodonosor anu Arioquẽ Daniel iyua hikikaĩ Danielĩ yuikĩ: —Shanẽ ibuhairatuũ, ea nĩkayuwe. Haska mĩ namashina tapĩtã ẽ mia yuitiruki. Shaba bestitxai ea heneyuwe— aka haska wa shanẽ ibuhairatũ nĩkatã: —Peki— aka

^17-18 hanua kaĩkaini hawẽ hiwe anu kai hikishũ Babilônia anua unanepa betsabube hau nuku tenãyamanũbũ, iwanã, hawẽ haibuaibu Hananias inũ, Misael inũ, Azarias Danielĩ hatu yuia: “Hau nuku Deusũ merabewanũ Deus nai anua yukanãkãwẽ”, hatu wa

¹⁹ habias meshu merã uĩmakĩ shanẽ ibũ nama inũ haska ishanai yuiti Deusũ Daniel unãmakĩ keyukẽ haskawẽ taeshũ nai anua Deus kẽwãkĩ

²⁰ na eska hãtxawẽ Danielĩ yuikĩ: “Deusrã, unanepa inũ kushipa hawena hayaki. Haskawẽ taeshũ Deusũ kena ikibi ika yuikĩ hau kẽwãkubaĩshanũbũwẽ, hawa heneamarã.

²¹ Hanu bari tibi uitiã inũ bariãtiã ha tashnimamistunã, Deusũ besti atiruki. Haska wamis shũ shanẽ ibu betsa putakĩ nitxĩtã hawẽ shãtukũ shanẽ ibu betsabu tsaũtiruki. Unanepabu unãmamiski. Tsuara tapinika hawaira tapĩmamiski.

²² Hawara tapiã bika huĩti uke merã inũ hawara hunea unãmakĩ keyumiski. Hamapai meshu meranua unã keyuikiki. Shabarã, habia habe ketashameaki.

²³ Mĩ ea unanepa wakĩ kushipa waniwẽ taeshũ ẽ shenipabũ mekenika Deus mĩ miarã, mia duawakĩ, benimawakĩ ẽ mia kẽwaiĩ. Haska natiã nũ mia yukashu ikis mĩ ea tapĩmashuki, hawara shanẽ ibũ shinãkĩ bika teneaikiri nuku unãmakinã”, atã

²⁴ Deus kẽwãkĩ keyutã haska Babilônia anua unanepabu dasibi tenãkãwẽ, akĩ shanẽ ibuhairatũ Arioque yunushina anu ana uĩ kashũ Danielĩ Arioque yuikĩ: —Unanepabu nuku hatu tenãmayamawe. Haska namashina inũ haska ishanai shabakabi ẽ yuitiruki. Shanẽ ibuhaira bebũ ea iyuwe— aka

²⁵ haska wa shanẽ ibuhaira Nabucodonosor anu Daniel iyushũ ha bebũ nitxĩshũ yuikĩ: —Shanẽ ibuũ, Judá enabu mĩ hatu iweni anua na huni betxishũ ẽ mia iweshunaii. Mĩ namashina inũ haska ishanai hatũ mia unãmaikiaki— aka

²⁶ hanushũ shanẽ ibuhairatũ Daniel hawẽ kena betsa Beltessazar yukakĩ: —Haska ẽ namashina inũ haska ishanai mĩ ea yuitirumẽ?— aka

²⁷ Danielĩ kemakĩ yuikĩ: —Shanẽ ibuũ, hawara mĩ unãkatsis ikai unanepabu inũ, yushĩ yukamisbu inũ, mukayabu inũ, bebũkiri haskashanai bishiwẽ unanikabu tsuã haska mia yuitirubumahairaki.

²⁸ Habiaskabiakẽ Deus bestitxai nai anu hiweatũ hawara hunea unãmamiski. Haskanũbariai mĩ shanẽ ibuhairakẽ mia unãmashinaki. Mĩ usha namakĩ hawara mĩ uĩshina ẽ mia unãmaii.

²⁹ Mĩ dakati anu dakashũ mĩ haska wakatsis ikaikiri mĩ shinãkĩ taewaya hawara hunea unãmamistũ mĩ namaiwẽ mia uĩmashinaki.

³⁰ Ha dikabi na habias mĩ nama hunea eari ea uĩmariashinaki. Haska ea unanepakĩ yura betsabu ẽ binukĩ taewama hakia mĩ namakĩ uĩshina haska ishanai ẽ mia unãmanũ Deusũ ea unãmashinaki. Mĩ haska shinaĩ mia anu hushũ mia uĩmashina ẽ mia haska tapĩmatiruki.

³¹ Shanẽ ibuũ, mĩ usha namayarã, mia bebũ ha dami huni itsa ewapa keyatapa txashahaira mese pakea tibi benia nia mĩ uĩshinaki.

³² Ha damipã bushkarã, mane ouro has pepaki. Hawẽ shutxi inũ hawẽ pũyanã, mane prata has pepaki. Hawẽ puku nashtu inũ hawẽ kishirã, mane bronze kushipaki.

³³ Hawẽ bikeranã, mane ferro due keska kushipaki. Hawẽ taerã, mane ferro kushipa inũ mapu bawa kushipa husiaki.

³⁴ Mĩ shanẽ ibũ haska uiãyã mati keyatapa anua mishki ewapa bestitxai tsuã hawa mekĩ shutuamabia hamebi tsekei mati anua taramekirãkĩ hawẽ tae tu akĩ txakãtushia ha dami tĩ iki tureke tureke ikaya

³⁵ hawaira mane ferro inũ, mapu bawa inũ, mane bronze inũ, mane prata inũ, mane ouro ibubis tureke tureke iki mishpui keyushinaki, baritiã shekiwã trigo tsekatã manaũrishũ kata kata aka niwẽ hawẽ shaka sa abaĩkĩ txai bua hawa hawẽ shaka betsa dakama keskairã. Hakia mishkipã ha dami tu aka di iki mishpuaya hanubi ha mishki hawẽ shãtukũ ewakauani mati itamamatã dasibi mai hirabi atxi keyushinaki. Haska mĩ namashinaki, ha haskarã.

³⁶ Usha namakĩ mĩ uĩshinaki. Haska kaĩshanai mĩ unãkĩ tapinũ ẽ mia yuiaii.

³⁷ Dami bushka mĩ uĩshinarã, habia mĩ miaki. Hau shanẽ ibu betsa betsapabũ mia kẽwãkubaĩshanũbũ mia kushipa wakĩ Deus nai anuatũ mia shanẽ ibuhaira waimawẽ taea shanẽ ibubu betsabu yunukĩ dasibi hatu binukubaini mĩ shanẽ ibu ewapakũkainaii,

³⁸ hanira yurabu inũ yuinaka inũ nai anua peiyabu hiwemisbu dasibi Deusũ mia ibu wamaimashũ mĩ bushkarã, ha dami ouro bushka keska mia uĩmashinaki.

³⁹ Mĩ shanẽ ibukũkaini keyui mawakẽ pe beshmas shanẽ ibu betsa mina keskama ishanikiki. Ha shanẽ ibu mawariakẽ hawẽ shãtukũ shanẽ ibu betsa mane bronze keskatũ mai hirabi yunukubaĩshanikiki.

⁴⁰ Ha shanẽ ibu mawariakẽ mane ferro kushipa keska shanẽ ibuhaira betsa hushanikiki. Mane ferro hawẽ mastati ewapa keskatũ ture ture akĩ dasibi shanẽ ibu betsabu txakabuwashanikiki, hatu binukinã.

⁴¹ Shanẽ ibuũ, ha dami tae dabe inũ hawẽ mekẽ teshpa tibi mapu bawa ture inũ mane ferro ture husia keska yuiarã, shanẽ ibu bestitxaimatũ yunukubainaibu yununikabu wakĩ pashkatã mane ferro keska kushipa beshmastũ yunukubaĩshanikiki, haska mĩ uĩshinarã.

⁴² Hawẽ tae inũ hawẽ mekẽ teshpa sharabu mane ferro inũ mapu bawa haya husia keskarã, ha haska yuiarã, habiatiãri shanẽ ibu kushipa inũ babu ikubaĩshãkanikiki.

⁴³ Mane ferro inũ mapu bawa husia mĩ uĩshina keska hatũ aĩbu bake bitã habe shanẽ ibube yubakabia ha shanẽ ibu kushipa ikatsi ibiakĩ yununika betsabu daewakubaĩtirubumawẽ taea haska hatuki dasiama ishãkanikiki, mane ferro inũ mapu husitiruma keskairã.

⁴⁴ Ha shanẽ ibubũ yunukubainaibutiã shanẽ ibubu betsabu keskama nai anu hiwea Deusũ shanẽ ibu betsa katukĩ yununika kayabi wakẽ tsuã hawẽ shanẽ ibu maema taskama ikũkaĩshanikiki. Shanẽ ibu betsabũ kushipa keyuaya na yununika kayabi niti ikama shanẽ ibupakeshanikiki.

⁴⁵ Ha haska mishkiri yuiarã, mĩ uiãyã mati keyatapa anua mishki ewapa bestitxai tsuã meshte meshte akama ibubis tsekekirani mati anua taramekirãkĩ mane ferro inũ, mane bronze inũ, mapu bawa inũ, mane prata inũ, mane ouro haki tĩ ikĩ dasibi mishpu wakĩ keyua keskashanai mĩ shanẽ ibuhaira Deus kushipahairatũ mia unãkĩ mia uĩmashinaki, haska tashninũbariairã. Mĩ namashina txanimahairaki. Ha inũ, ẽ mia nĩkamakĩ yuiairã, txanimariki— aka

⁴⁶ haska wa nĩkatã Daniel bebũ shanẽ ibuhaira Nabucodonosor dãti iki maiki beti itã hanushũ inãkuĩ inãtã sheni inĩti hau kuashunũbũ hawẽ tsumabu yunua haska yunua akĩ keyuaibũ

⁴⁷ Nabucodonosorĩ Daniel yuikĩ: —Na nama hunea tsuã atiruma ẽ mia hawa unãmakĩ yuiamabia mĩ ea tapĩmashũwẽ taea txanimahaira matũ mekenika Deus kushipakũkaĩkĩ yushibubu dasibi binuhairaikiki. Shanẽ ibubu dasibibũ shanẽ iburiki, hawara hunea hãtxa unãmamisrã— atã

⁴⁸ hanushũ hatu binumakĩ keyukĩ hau Daniel kẽwãkubaĩshanũbũ mabu inãkuĩ hawẽrua itxapa inãtã maewã Babilônia mai pakekauana yununika washũ habetã unanikabu hatũ shanẽ ibu washũ hawẽ dayarubu dasibi shanẽ ibuhaira Nabucodonosorĩ Daniel hatu binumashĩkẽ

⁴⁹ hawẽ habuaibu shinãkĩ Danielĩ shanẽ ibuhaira hawẽ haibuaibu hatu yukashuna maewã Babilônia mai pakekauana anu haburi shanẽ ibu wamaima hanushũ hatu mekekĩ hau hatu yunukubaĩshanũbũ Sadraque inũ, Mesaque inũ, Abede-Nego shanẽ ibuhairatũ hatu yunua hanu hawẽ haibuaibu dayakubainaibũ shanẽ ibũ hiwe ewapa hawẽrua anu shanẽ ibuhaira merabewamisbube Daniel hari tsaua dayakũkainikiaki.