1 Coríntios 3 - Kaxinawá Bíblia (BR)

Deus dayashũkĩ hawẽ kakape yusĩnibukiaki, na hãtxarã

¹ Ẽ betsabu inũ ẽ puibuũ, ẽ matube hiweyukĩ habũ Jesus ikũwãkĩ hawẽ Yushĩ Pepa nĩkakubaĩmisbu mã hatu keskamakẽ matu yusĩkĩ dama ikũwãkĩ matũ xinã mestẽriama mã bakeixta keskabukẽ unãshubira Cristokiri ẽ matu unãmakubainiki.

² Bakeixta pimakĩ piti kuxi memayuama txutxu dukũ hatu beyawamamisbu keska wakĩ matu tapĩmakĩ unãshubira nũ matu yusĩkubainiki. Haska wakinã, haskarawẽ taeshũ nũ matu animẽ? Mã hawa nami kuxi pia unãriama keskabuki. Na habiatianã, mã habiaskaski, hawa piti kuxi pitirubuma keskaburã.

³ Mã kuxipai beyariama habias matũ hiwea keska xinaĩ mã babuwẽ taea ikũwaĩ betsabube ha iki hatu dabaĩ binunãnanũ ika inũ betsa kemutapaya ha xinaĩ sinai ikũwãbuma keska xinaĩ mã hiweabukiaki.

⁴ Haska hãtxakeakekĩ yuikĩ: “Eãnã, Paulõ nuku yusĩmis ikũwãkĩ ha besti ẽ txibãkubainaii”, ikaya betsari iki: “Eãnã, Apolõ nuku yusĩmis ikũwãkĩ ha besti ẽ txibãkubainaii”, ikeakei ikũwãbuma hiwemisbu keskai mã betsa betsapaikiaki.

⁵ Nũ haskarawẽ taeshũ mã nukukiri xinaĩ ikai? Tsuamẽ, Apolorã? Tsuamẽ, Paulorã? Mã haska nukukiri xinaĩnã? Nuku daberã, nũ Jesusũ dayaru bestiki. Haskawẽ taeshũ hawẽ daya nũ ashuãyã nukuwẽ taeshũ mã ikũwãniki, haska nukũ Shanẽ Ibũ nuku yununiwenã.

⁶ Nũ Deusũ tsuma dabe bestiki. Nuku ana kẽwãyamakubaĩkãwẽ. Ea dukũ matu anu kashũ ẽ matu yunu banakĩ akawaniki. Hanushũ Apolori kashũ ẽ banatãyama matu mibã naximakĩ akawayamaki. Nukũ dayawẽ nũ matu haska wabiaya hakia Deusũ ha mibã ewawakĩ kuxipa wamis keska wakĩ ha bestitũ matũ xinã betsa wamakĩ ewawakubainikiki.

⁷ Matu yusĩkĩ matũ huĩtiki Deusũ kakape ẽ bana keska watanima mibã naxima keska wakĩ Apolõ txanima matu merabewatanimaki. Hamẽ nuku daberã, nũ hawamaki. Hawẽ kakape matũ huĩti anu Deusũ besti ewawakĩ yumewamiski. Haskakẽ ha daya nũ amisrã, nukunamaki. Epa Deusũ daya bestikẽ ha besti kẽwãkubaĩkãwẽ.

^8-9 Hamẽ maturã, Deusũ hawẽ kakape heshe banamis keska mã hawẽ baiki. Hakia nukurã, nũ bai anu dayai keskakĩ nuku dasibibũ nũ Deus merabewakubainaii. Betsabũ kakape banai inũ betsabũ naximabiaya hamapai daya nuku yunua dasibibũ nũ pe akubainaiwẽ taeshũ Deusũ nuku pakakĩ manakushanikiki, nukũ daya tibi pepawenã. Hunibũ hiwe wamis keska wakĩ Deusũ matu wakatsis ikĩ

¹⁰ ea dukũ Deusũ ea katutã duawakĩ hiwe wanika unãnepa keska ea wakẽ hiwe tekeismawakĩ ha dukũ shãtu ewapa watã pukĩbaũkĩ haki tsamabirãkatsi mixki ewapa ẽ datãbaũkĩ itsa waniki, matukiri kakape yusĩkĩ taewakinã. Ẽ haska wanikẽ hiwe benibaũmisbu keska wakĩ huni betsã matu yusĩpakeikiki. Hiwe pepawai dayamisbu keska wakĩ huni tibitũ matu ana yusĩkĩ kanemama hau matu pehairawakubainũbũwẽ.

¹¹ Ha inũ, ma ẽ mixki buya pewabianikẽ ana yusĩnã betsa hushũ ana betsa wakĩ taewatirumaki. Haska keskari wakĩ Jesus Cristokiri ẽ matu yusĩ taewanikiri tsuã yusĩa benawẽ matu yusĩkĩ ana betsa watirumariki.

¹² Na mixki ẽ bebuyakĩ taewani anu tsuãra hiwe wakĩ menẽnũ ishũ ouro mane kasmai prata mane kasmai mixki hawẽ daya karuwẽ amisbu keskarã, habũ Jesus Cristo ikũwãtã hawẽ hiwekĩ matu yusĩaĩbu hatũ hiwea keskaki. Hamẽ huni betsabũri habias mixki mamaki hiwewanũ ishũ hi tuash kasmai hepe kasmai tawa akaibu keskarã, habũ Jesus Cristo ikũwãbiatã haska Jesusũ abuai keska hiweama hatũ hiwea hi tuash inũ hepe inũ tawa besti keskabuki.

¹³ Nai anua nukũ Shanẽ Ibuhaira Jesus hukirã haska hawẽ yusĩa txibaĩ nũ hiwemis nuku tibi shabakabi nuku unãti washanikiki. Hanu nuku unãti waitianã, nukũ hiwea inũ nũ hawẽ taea nũ dayamis txiwẽ nuku unãti washanikiki.

¹⁴ Tsuara hiwe kuxipa txĩ menuisma keska hiwemisburã, hawa txĩ menuismawẽ taea hatũ manakuti pepa bishãkanikiki.

¹⁵ Hakia tsuãra hiwea kuxipa akama hawẽ hiwea hi tuash inũ tawa inũ shẽpã besti keskawẽ taeshũ txĩ menukĩ yamawashanikiki. Haska hiwe menuai anua hawẽ yura besti pashabiatã nai anu Jesus Cristobe hiweai bitã hawa manakuti hayama habe besti hiweshãkanikiki.

¹⁶ Haskawẽ taeshunã, matunã, mã unãmamẽ? Mã ikũwaĩbu Deus matubekẽ mã hawẽ hiwe keskawẽ taea Deusũ Yushĩ Pepa matuki dasia hiweaki.

¹⁷ Tsuãra ha Deusũ hiwe txakabu wakĩ nuitapawamis ha yurari Deusũri nuitapawariashanikiki. Hakia ha Deusũ hiwe meribi peparã, habia mã matuki, hiwe keskarã.

¹⁸ Betsa betsapabu mã unãnepakatsis ikaii. Hakia haska unãnepabũ ibubis xinãkĩ kanemis Deusũ abuismaki. Mã ibubis keĩ unãnepaiburã, matũ xinã danãtã ana kẽkĩ haska xinãma txĩtũtã haska Deusũ abuai keskai unãnepa kayabikubaĩkãwẽ.

¹⁹ Na mai anu hiwea unãnepaiburã, Deusũ hatu danãkĩ unaĩsmapabukiri hatu xinãmiski. Habiaskari xinãkĩ ẽ shenipabu Jõ yuikĩ: “Unanepabũ betsa parãtã binunũ ikaibu Deus unãnepa kayabitũ hatu beshtekĩ hawauma hatu wamiski”, hatu waya huni betsã keneshuniki.

²⁰ Hanushũ Davĩ yuiriakĩ: “Haska unãnepabũ xinãmis unãkĩ danãkĩ: ‘Hawa unãbumaki’, iwanã, Deusũ unãmiski”, iwanã, keneniki. Haskakẽ ibubis parananãyamakãwẽ.

^21-22 Haskawẽ taea nũ yurabu nũ matũ yusĩnã bestibiakẽ daketapakĩ nuku kẽwaĩ hunibũ tsumabu nuku wayamakãwẽ. Hamẽ Deus hawa yauxiama nukũ nũ matu merabewanũ, iwanã, ẽ Paulo inũ, Apolo inũ, Pedro inũ, huni yusĩnãbu tibi nuku yununiki. Ha inũ, mã hiwea inũ, mã mawabu inũ, na habiatiã inũ, bari betsa ũ unuatiã dasibi inũ mai hirabi Deusũ matu yununi mã hawẽ hiwearã, matunaki.

²³ Dasibi matu ibuwamabiani, na haska dasibi mã hiwearã, mã Cristonaki. Ha inũ, Cristorã, Deusunaki, hawẽ bake kayabirã. Haskawẽ taeshũ Epa Deusũ hãtxa xinãkĩ nuku nũ yura bestibiakẽ ana nukukiri hãtxakĩ nuku kẽwãyamakãwẽ, nukũ Shanẽ Ibu besti kẽwãkinã.