Seanfhocal 7 - An Bíobla Naofa 1981

¹ Coinnigh greim ar mo bhriathra, a mhic, agus cuir m'aitheanta i dtaisce duit féin.

² Comhlíon m'aitheanta agus mairfidh tú beo; coinnigh mo theagasc mar mhac imreasan do shúile.

³ Ceangail de do mhéireanna iad agus scríobh ar chlár do chroí iad.

⁴ Abair leis an eagna: “Is tú mo shiúr,” agus tabhair do “chara dil” ar an tuiscint,

⁵ Le thú a chosaint ar an mbean drúisiúil, ón strainséir mná le briathra bladair.

⁶ D'fhéach [sí] ó fhuinneog a tí, amach ar an tsráid,

⁷ [Féachaint] an raibh i measc na bhfear óg gan taithí aon ógánach éaganta.

⁸ Seo an tsraid síos anois é, le hais a cúinne, agus ag gabháil an chosáin chun a tí,

⁹ Idir dhá sholas, um thráthnona, faoi choim na hoíche agus sa dorchadas.

¹⁰ Ach, féach, seo bean faoina dhéin, gléasta mar striapach agus calaois ina croí.

¹¹ Báirseach gan iontaoibh í, nach dtéann suaimhneas ar a cosa sa bhaile.

¹² Bíonn sí san airdeall ar an tsráid, sa mhargadh, agus ag gach cúinne.

¹³ Beireann sí greim air agus pógann é, agus deir sí leis lena gnúis mhínáireach:

¹⁴ “Bhí íobairtí le hofráil agam, agus chomhlíon mé mo mhóide inniu.

¹⁵ Uime sin tháinig mé amach i do choinne, agus mé sa tóir ort; agus fuair mé thú.

¹⁶ Chóirigh mé mo leaba le brait, agus [leath mé uirthi] togha brailliní ón Éigipt.

¹⁷ Chroith mé miorra, aloes, agus cainéal mar chumhráin ar mo leaba.

¹⁸ Tar! bímis ag ól ár sáith de dheoch an ghrá go maidin; bíodh suáilceas an ghrá againn.

¹⁹ Óir níl m'fhear céile sa bhaile, ach é imithe ar aistear fada.

²⁰ Thug sé mála airgid leis; fillfidh sé abhaile leis an lánré.”

²¹ Cuireann sí cluain air lena tuile de bhladar mealltach, agus áitíonn air lena plámás séimh.

²² Leanann sé í de gheit, faoi mar a rachadh damh chun a mharaithe, Nó mar a rachadh fia i ngaiste,

²³ nó go gcuirfí saighead ina ionathair; Nó mar a sceinnfeadh éan i súil ribe gan a fhios aige go bhfuil an bás faoina chomhair.

²⁴ Éist liom anois, [a mhic], agus tabhair aird ar bhriathra mo bhéil:

²⁵ Ná lig do do chroí dul amú ina bealaí, agus ná bí ag faoileáil ar a cosáin.

²⁶ Óir is iomaí fear a leag sí ar lár, agus thug sí íde ar na gaiscígh go léir.

²⁷ Sé a teach an bealach go Seól agus an tslí síos go cúirteanna an bháis.