Salm 26 - An Bíobla Naofa 1981

Urnaí an Duine Neamhurchóidigh

1 Le Dáiví.

¹ Le Dáiví. 1 Tabhair breithiúnas ar mo shon, a Thiarna, óir shiúil mé ar shlí an ionracais, agus bhí mo dhóchas sa Tiarna gan staonadh.

² Déan mo phromhadh, a Thiarna, agus mo thástáil; scrúdaigh m'áranna agus mo chroí;

³ Óir bíonn do bhuanghrá os comhair mo shúl, agus bím ag siúl de réir d'fhírinne.

⁴ Ní bhím i bhfochair lucht éithigh ná ní ghabhaim i gcomhluadar na gcluanairí.

⁵ Is gráin liom tionól na n‑urchóideach, agus ní shuím i bhfarradh na n‑éagráifeach.

⁶ Ním mo lámha san ionracas, a Thiarna, agus gabhaim mórthimpeall d'altóra.

⁷ Bíonn altú buíochais á chanadh agam, agus d'éachtaí go léir á n‑aithris agam.

⁸ Thug mé taitneamh, a Thiarna, do d'áras, don áit a gcónaíonn do ghlóir.

⁹ Ná sciob mé chun siúil leis na peacaigh ná m'anam le lucht doirte fola;

¹⁰ Is dream iad a mbíonn an urchóid ina lámha acu, agus is lomlán a ndeaslámh de bhreabanna.

¹¹ Ach caithimse mo shaol go hionraic: fuascail mé agus nocht dom do thrócaire.

¹² Tá mo chosa ina seasamh ar an réidh; molfaidh mé an Tiarna sna tionóil.